2026 جىلعى 12 قاراشادا جەنەۆاداعى ۇلتتار سارايىندا قازاقستان دەلەگاتسياسى جاساندى ينتەللەكت قولدانىلاتىن تسيفرلىق پارلامەنتتىك پلاتفورما - AI-Quryltai جوباسىن تانىستىردى. تانىستىرىلىم بۇۇ-نىڭ جەنەۆاداعى بولىمشەسىنىڭ «قازاقستان» زالىندا ءوتتى.

قازاقستاندىق دەلەگاتسيا قۇرامىندا «ادىلەت» پارتياسى توراعاسىنىڭ ورىنباسارى قانىش تولەۋشين، قازاقستان رەسپۋبليكاسى قۇرىلتايىنىڭ تسيفرلاندىرۋ، يننوۆاتسيالار جانە عىلىم كوميتەتىنىڭ توراعاسى دارحان احمەديەۆ جانە تسيفرلىق ۇكىمەتتى قولداۋ ورتالىعىنىڭ باس ديرەكتورى ءاليا وسپانوۆا بار.

ءىس-شارا كىرىسپە بەينەروليكتى كورسەتۋ مەن قۇتتىقتاۋ سوزدەردەن باستالدى. قاتىسۋشىلارعا قازاقستان رەسپۋبليكاسى قۇرىلتايىنىڭ 2027–2029 جىلدارعا ارنالعان جي-ستراتەگياسى، e-Quryltai ينتەگراتسيالانعان تسيفرلىق پارلامەنتتىك پلاتفورماسى جانە پارلامەنتتىك قىزمەتتە جاساندى ينتەللەكتىنى قولدانۋ باعىتتارى تانىستىرىلدى.

باعدارلامانىڭ جەكەلەگەن بلوكتارى پارلامەنتتىك زەرتتەۋلەر مەن تالداۋعا، جي قولدانۋ ارقىلى زاڭ جوبالارىن ازىرلەۋ مەن قۇقىقتىق ساراپتاما جۇرگىزۋگە، سونداي-اق جي-زەرتحانانىڭ قىزمەتىنە ارنالدى.

ستراتەگياعا سايكەس، AI-Quryltai تسيفرلىق پروتسەستەردى، پارلامەنتتىك دەرەكتەردى، قۇقىقتىق ءبىلىم مەن زياتكەرلىك سەرۆيستەردى بىرىڭعاي قورعالعان ورتادا بىرىكتىرە وتىرىپ، e-Quryltai جۇيەسىن دامىتۋدىڭ كەلەسى كەزەڭىنە اينالادى. بۇل ترانسفورماتسيانىڭ نەگىزگى ماقساتتارى - زاڭ شىعارۋ ساپاسىن، قابىلداناتىن شەشىمدەردىڭ نەگىزدىلىگىن، پارلامەنتتىك باقىلاۋدىڭ تيىمدىلىگىن جانە قوعاممەن ءوزارا ءىس-قيمىلدىڭ اشىقتىعىن ارتتىرۋ.

AI-Quryltai پلاتفورماسىنىڭ پراكتيكالىق مىندەتى - جاساندى ينتەللەكتىنى قولدانۋ ارقىلى دەپۋتاتتار جۇمىسىنىڭ تيىمدىلىگىن ارتتىرۋ. ازىرلەنىپ جاتقان قۇرالدار پارلامەنتتىك دەرەكتەر مەن ازاماتتاردىڭ وتىنىشتەرىن تالداۋعا، زەرتتەۋلەر جۇرگىزۋگە، تالدامالىق ماتەريالدار دايىنداۋعا جانە زاڭ جوبالارىن ازىرلەۋ پروتسەسىن سۇيەمەلدەۋگە مۇمكىندىك بەرەدى.

AI-Quryltai جۇيەسىنىڭ نەگىزىندە مەملەكەتتىك دەرەكتەر مەن پارلامەنتتىك جۇمىس قۇرالدارى بىرىكتىرىلگەن تىلدىك مودەلدەر جانە مامانداندىرىلعان جاساندى ينتەللەكت اگەنتتەرىنەن تۇراتىن وزىندىك تسيفرلىق پلاتفورما جاتىر. شەشىم قابىلداۋدى قولداۋ جۇيەسى جۇيەلى ماسەلەلەردى انىقتاۋعا جانە ۇسىنىلاتىن شارالاردىڭ سالدارىن باعالاۋعا كومەكتەسسە، قۇقىقتىق يادرو ءوز كەزەگىندە نورمالاردىڭ ءوزارا بايلانىستارىن تالداۋعا جانە زاڭنامالىق وزگەرىستەردى ازىرلەۋگە مۇمكىندىك بەرەدى. جەرگىلىكتى مودەلدەر جابىق نۇسقادا جۇمىس ىستەيدى، ال قورىتىندىلار بولسا، تەكسەرىلەتىن دەرەككوزدەرگە، تالداۋ ادىستەمەلەرىنە جانە ساراپتامالىق باعالاۋعا سۇيەنەدى. مۇنداي ءتاسىل ازاماتتىڭ وتىنىشىنەن باستاپ شەشىمدى دايىنداۋعا جانە ونىڭ ورىندالۋىن باقىلاۋعا دەيىنگى بۇكىل پروتسەستى سۇيەمەلدەۋگە تولىق مۇمكىندىك بەرەدى.

جي-ءدى جاۋاپكەرشىلىكپەن قولدانۋعا دا ايرىقشا نازار اۋدارىلدى. جي-زەرتحانا شەشىمدەردى ەنگىزبەس بۇرىن ولاردىڭ دالدىگىن، قاۋىپسىزدىگىن جانە قۇقىقتىق زاڭدىلىعىن سىناقتان وتكىزۋ مەن باعالاۋدى قامتاماسىز ەتەدى. جي كومەگىمەن دايىندالعان ماتەريالدار مامانداردىڭ تەكسەرۋىنەن وتەدى، ال تۇپكىلىكتى شەشىمدەر ءۇشىن جاۋاپكەرشىلىك ادامداردىڭ وزىندە قالادى. اقپاراتپەن جۇمىس ىستەۋ قولجەتىمدىلىكتى شەكتەۋ جانە كيبەرقاۋىپسىزدىك تالاپتارىن ساقتاۋ قاعيداتتارىنا نەگىزدەلەدى.

باعدارلاما قورىتىندى سوزدەرمەن، پارلامەنتتىك يننوۆاتسيالار ماسەلەلەرى جونىندەگى جوعارى دەڭگەيدەگى ديالوگپەن جانە پىكىر الماسۋمەن اياقتالدى.

Abai.kz