پرەزيدەنت قاسىم-جومارت توقاەۆتىڭ توراعالىعىمەن قاۋىپسىزدىك كەڭەسىنىڭ كولىك-ترانزيت سالاسىن دامىتۋ ماسەلەسىنە ارنالعان شۇعىل وتىرىسى ءوتتى.

جيىندا حالىقارالىق كولىك دالىزدەرىن دامىتۋ پەرسپەكتيۆاسى جانە ەلىمىزدىڭ ترانزيت الەۋەتىن نىعايتۋ شارالارى قارالدى.

پرەمەر-ءمينيستردىڭ ورىنباسارى – كولىك ءمينيسترى اسەل جاناسوۆا، قارجى ءمينيسترى ءمادي تاكيەۆ جانە ۇكىمەتتىڭ وزگە دە مۇشەلەرى سالانىڭ قازىرگى احۋالى، جۇزەگە اسىرىلىپ جاتقان جوبالار مەن الداعى دامۋ باعىتتارى تۋرالى بايانداما جاسادى.

قاۋىپسىزدىك كەڭەسىنىڭ توراعاسى الەمدە كولىك-لوگيستيكا بايلانىستارىنىڭ جاڭا جۇيەسى قارقىندى تۇردە قالىپتاسىپ كەلە جاتقانىن اتاپ ءوتتى.

مەملەكەت باسشىسى حالىققا ارناعان جولداۋىندا ەلىمىزدىڭ ترانزيت الەۋەتىن نىعايتۋدىڭ نەگىزگى باعىتتارى ايقىندالعانىنا نازار اۋدارىپ، قازاقستان حالىقارالىق كولىك قۇرىلىمىندا پرواكتيۆتى پوزيتسيا ۇستانۋى كەرەك ەكەنىن ايتتى.

ەلىمىزدىڭ گەوگرافيالىق تۇرعىدان ۇتىمدى ورنالاسۋى بىرقاتار ارتىقشىلىق بەرەدى. الايدا مەملەكەتتىڭ باسەكەگە قابىلەتتىلىگى تاسىمالدىڭ جىلدامدىعىنا جانە سەنىمدىلىگىنە، ونىڭ شارتتارى مەن مەرزىمدەرىنىڭ الدىن الا ايقىن بولۋىنا، سونداي-اق تاريفتەردىڭ تيىمدىلىگىنە بايلانىستى.

ەڭ الدىمەن، ترانزيتتىك جۇكتەردى وتكىزۋ مۇمكىندىگىن ارتتىرىپ، وتاندىق اۋە تاسىمالداۋشىلارعا جاعداي جاساۋ جانە تەڭىز كولىگىن دامىتۋ كەرەك.

قاسىم-جومارت توقاەۆ كولىك سالاسىنداعى احۋالدى سىنعا الىپ، ينفراقۇرىلىمدى جاڭا جاعدايعا دەر كەزىندە بەيىمدەۋ ستراتەگيالىق دامۋدىڭ شەشۋشى فاكتورى ەكەنىن جەتكىزدى.

اتاپ ايتقاندا، مەملەكەت باسشىسى «قازاقستان تەمىر جولى» ۇك» اق قىزمەتىن قاتاڭ سىناپ، كىرىستى ارتتىرۋ، قىزمەتتى وڭتايلاندىرۋ، سونىڭ ىشىندە تسيفرلاندىرۋ قۇرالدارى ارقىلى كومپانيانىڭ جۇمىس تيىمدىلىگىن كوتەرۋ مىندەتىن قويدى.

پرەزيدەنت لوگيستيكا ورتالىقتارىن كەڭەيتۋ، شەكارالىق جانە كەدەندىك راسىمدەردى جەتىلدىرۋ، سالاداعى بارلىق ۇدەرىستى كەشەندى تسيفرلاندىرۋ، سونداي-اق جۇكتەردىڭ ىركىلىسسىز ءوتۋىن قامتاماسىز ەتۋ ءۇشىن ينفراقۇرىلىمداعى كەدەرگىلەردى جويۋ ماسەلەلەرىنە ايرىقشا توقتالدى.

بۇدان بولەك، «زاڭ مەن ءتارتىپ» قاعيداتىن ساقتاي وتىرىپ، ينۆەستورلارعا، كولىك-لوگيستيكا كومپانيالارىنا بارىنشا قولايلى جاعداي جاساۋ قاجەتتىگىنە نازار اۋدارىلدى.

وسى ورايدا، پرەزيدەنت «سامۇرىق-قازىنا» قورى مەن «قازاقستان تەمىر جولى» كومپانياسى باسشىلارىنىڭ ۇستالۋىنا قاتىستى پىكىر ءبىلدىردى.

كەڭەس قورىتىندىسى بويىنشا جاۋاپتى مەملەكەتتىك ورگاندار مەن ۇيىمدارعا كولىك-ترانزيت سالاسىن ودان ءارى دامىتۋ جانە قازاقستان اۋماعى ارقىلى وتەتىن حالىقارالىق كولىك باعىتتارىنىڭ باسەكەگە قابىلەتتىلىگىن ارتتىرۋ جونىندە ءتيىستى تاپسىرمالار بەرىلدى.

تاپسىرمالاردىڭ ورىندالۋىن باقىلاۋ قاۋىپسىزدىك كەڭەسىنىڭ اپپاراتىنا جۇكتەلدى.

Abai.kz