Almaty SuperSki جوباسى اياسىندا تۋريستىك ينفراقۇرىلىممەن قاتار، عىلىمي-تانىمدىق باعىتتى دامىتۋ جوسپارلانۋدا. وسى ماقساتتا اۋماقتا ۇلكەن عىلىمي زەرتحانا سالۋ كوزدەلىپ وتىر.

مامانداردىڭ ايتۋىنشا، مۇنداي ورتالىق تەك زەرتتەۋشىلەر ءۇشىن ەمەس، تابيعاتقا قىزىعۋشىلىق تانىتاتىن تۋريستەر ءۇشىن دە تانىمدىق الاڭعا اينالۋى عاجاپ ەمەس.

عىلىمي ورتالىقتىڭ اشىلۋى تۋريستىك قىزمەت تۇرلەرىن ارتاراپتاندىرۋعا دا مۇمكىندىك بەرەدى. ماسەلەن، تانىمدىق ەكسكۋرسيالار ۇيىمداستىرۋ، گيد قىزمەتىن دامىتۋ جانە جەرگىلىكتى تابيعي ەرەكشەلىكتەردى تانىستىرۋ باعىتتارىنا سۇرانىس ارتۋى مۇمكىن.

بۇل ءوز كەزەگىندە جەرگىلىكتى كاسىپكەرلەر ءۇشىن جاڭا مۇمكىندىكتەر قالىپتاستىرادى. ال ۋنيۆەرسيتەت عالىمدارىنىڭ زەرتتەۋلەرى تۋريستىك قىزمەتتىڭ مازمۇنىن بايىتىپ، كەلۋشىلەرگە ۇسىنىلاتىن سەرۆيستىڭ ساپاسىن ارتتىرۋعا نەگىز بولا الادى.

"ايماقتا ۇلكەن عىلىمي تانىمدىق لابوراتوريانىڭ سالىنۋى جوسپارلانىپ وتىر. وعان عالىمدار تاراپىنان ۇسىنىستارىمىزدى بەرىپ وتىرمىز. ول بيولوگيا جانە وسىمدىكتەر الەمىن جانە جانۋارلار الەمىن جانە دە تابيعاتتى زەرتتەۋ باعىتىندا عىلىمي جۇمىستار جۇرگىزۋگە ارنالعان ۇلكەن تانىمدىق لابوراتوريا بولادى", - دەدى ءال-فارابي اتىنداعى قازۇۋ بوتانيكا جانە اگروەكولوگيا كافەدراسىنىڭ مەڭگەرۋشىسى نۇرسۇلۋ احتاەۆا.

Abai.kz