جاڭاوزەن قالاسىندا قۇرىلتاي دەپۋتاتى اببات ورىسباەۆ قالالىق كوپسالالى اۋرۋحانانىڭ مەديتسينا قىزمەتكەرلەرىمەن كەزدەستى. جيىنعا دەنساۋلىق ساقتاۋ مينيسترلىگى مەديتسينالىق باقىلاۋ كوميتەتىنىڭ ءتورايىمى لاۋررا احمەتنياز دا قاتىستى.

اۋرۋحانا ۇجىمىمەن اڭگىمە بارىسىندا اببات ورىسباەۆ مەملەكەت باسشىسىنىڭ «جاڭا تاريحي كەزەڭدەگى قازاقستاننىڭ وزەكتى مىندەتتەرى» اتتى جولداۋىنداعى نەگىزگى رەفورمالارعا، وندا بەلگىلەنگەن مىندەتتەردىڭ ەل دامۋىنداعى  ماڭىزىنا توقتالدى.

– پرەزيدەنت جولداۋى ەل تاۋەلسىزدىگىنىڭ 35 جىلدىعى قارساڭىنداعى اۋقىمدى ساياسي رەفورمالاردىڭ جالعاسى بولىپ سانالادى. اتاپ ايتقاندا، جاڭا كونستيتۋتسيانىڭ قابىلدانۋى، ءبىر پالاتالى قۇرىلتايدىڭ سايلانۋى، قازاقستان حالىق كەڭەسىنىڭ جۇمىسىن باستاۋى جانە ۆيتسە-پرەزيدەنت ينستيتۋتىنىڭ قۇرىلۋى ەل باسقارۋ جۇيەسىندەگى ماڭىزدى وزگەرىستەردىڭ ءبىرى بولىپ وتىر، – دەدى دەپۋتات.

سونىمەن قاتار اببات ورىسباەۆ وڭىردە «حالىقتىق قۇرىلىس» جوباسى اياسىندا جۇزەگە اسىرىلاتىن مەديتسينالىق ينفراقۇرىلىمدى دامىتۋ باستامالارىنا نازار اۋداردى. جولداۋدا حالىقتىڭ ءومىر ساپاسىن جاقسارتۋ، مەديتسينالىق قىزمەتتىڭ قولجەتىمدىلىگىن ارتتىرۋ جانە الەۋمەتتىك نىسانداردى جاڭعىرتۋ ماسەلەلەرى باسىم باعىتتاردىڭ ءبىرى رەتىندە ايقىندالعانىن جەتكىزدى.

ال دەنساۋلىق ساقتاۋ مينيسترلىگى مەديتسينالىق باقىلاۋ كوميتەتىنىڭ ءتورايىمى لاۋررا احمەتنياز سالا بويىنشا الداعى ۋاقىتتا اتقارىلاتىن اۋقىمدى جوبالارعا توقتالدى. ول مەديتسينالىق ينفراقۇرىلىمدى جاڭعىرتۋ، انا مەن بالا دەنساۋلىعىن قورعاۋ جانە دەنساۋلىق ساقتاۋ سالاسىنا وزىق تەحنولوگيالاردى ەنگىزۋ باعىتىنداعى جۇمىستاردى اتاپ ءوتتى.

بۇدان كەيىن ماڭعىستاۋ اتوم ەنەرگەتيكالىق كومبيناتىنىڭ (ماەك) قىزمەتكەرلەرىمەن كەزدەسۋ ءوتتى. جيىنعا قازاقستان حالىق كەڭەسىنىڭ مۇشەلەرى بەكمۇرات ءجۇسىپوۆ پەن كيريلل وسين، وبلىستىق اقساقالدار كەڭەسىنىڭ توراعاسى وڭايبەك ءابدىلوۆ قاتىستى.

جيىندا ەلدىڭ ەكونوميكالىق دامۋى، ەنەرگەتيكالىق قاۋىپسىزدىك، كولىك-لوگيستيكا الەۋەتى، الەۋمەتتىك ينفراقۇرىلىمدى جەتىلدىرۋ جانە قوعامدىق كەلىسىمدى نىعايتۋ ماسەلەلەرى تالقىلاندى. سونداي-اق قازاقستاننىڭ ترانزيتتىك مۇمكىندىكتەرىن ارتتىرۋ، اەس سالۋ، كەندىرلى اۋەجايىنىڭ اشىلۋى جانە ءوڭىردىڭ تۋريستىك الەۋەتىن دامىتۋ باعىتتارىنا نازار اۋدارىلدى.

كەزدەسۋلەر بارىسىندا قاتىسۋشىلار وزدەرىن تولعاندىرعان سۇراقتارىن قويىپ، ۇسىنىس-پىكىرلەرىن ورتاعا سالدى. جۇمىس توبىنىڭ وكىلدەرى جولداۋدا بەلگىلەنگەن مىندەتتەردى جۇزەگە اسىرۋ جولدارىن جان-جاقتى ءتۇسىندىردى.

Abai.kz