سەيسەنبى, 17 قاراشا 2026
جاڭالىقتار 110 0 پىكىر 17 قاراشا, 2026 ساعات 13:43

قازاقستاندا وبىرعا قارسى دنك-تەست ازىرلەنۋدە

سۋرەت: forbes.kz سايتىنان الىندى.

الەمدىك مەديتسينا بۇگىندە بارلىق ناۋقاسقا بىردەي قولدانىلاتىن ورتاق ەمدەۋ تاسىلدەرىنەن باس تارتىپ، ادامنىڭ جەكە جاسۋشالارى مەن گەنەتيكالىق كودىنا نەگىزدەلگەن دەربەس (تارگەتتى) مەديتسيناعا بەت بۇرۋ جاسادى.

وسى جاھاندىق كوشتەن قازاقستان دا قالىس قالماي، وتاندىق عىلىم مەن كلينيكالىق تاجىريبەدە ۇلكەن بەتبۇرىس جاساپ جاتىر.

دەنساۋلىق ساقتاۋ مينيسترلىگىنىڭ مالىمەتىنشە، ۇلتتىق عىلىمي مەديتسينالىق ورتالىقتىڭ (ۇعمو) ماماندارى پلاتسەنتا مەن كىندىك قانىنىڭ دىڭگەكتى جاسۋشالارىنان جاڭا وتاندىق ءدارى-دارمەك ازىرلەپ، سونىمەن قاتار قاتەرلى ىسىكتى ەرتە ءارى ءدال انىقتايتىن دنك-دياگنوستيكانى ەنگىزۋگە كىرىستى.

جاسۋشالىق تەراپيا جانە 2025–2027 جىلدارعا ارنالعان جوسپار

2025–2027 جىلدارعا جوسپارلانعان بۇل اۋقىمدى عىلىمي جوبا اياسىندا عالىمدار دىڭگەكتى جاسۋشالاردىڭ اعزاداعى قابىنۋدى قالاي باساتىنىن جانە تىندەردى زاقىمدانۋدان قالاي قورعايتىنىن تەرەڭ زەرتتەلۋ ۇستىندە. ەڭ ماڭىزدى جاڭالىقتاردىڭ ءبىرى – ماماندار پرەپاراتتى ەمدىك قاسيەتىن جوعالتپاي ۇزاق ۋاقىت ساقتاۋعا مۇمكىندىك بەرەتىن ليوفيليزاتسيا (مۇزداتىپ كەپتىرۋ) تەحنولوگياسىن دا قاتار جاساپ جاتىر.

بولاشاقتا بۇل وتاندىق جاسۋشالىق پرەپارات تومەندەگىدەي:

  • قانت ديابەتى;
  • ينسۋلتتان كەيىنگى اۋىر زارداپتار;
  • جۇرەك جەتكىلىكسىزدىگى مەن اۋتويممۋندى اۋرۋلار;
  • بەدەۋلىك جانە جۇلىن جاراقاتتارى سياقتى كۇردەلى دەرتتەردى ەمدەۋدە قولدانىلماق.

وبىرعا قارسى دنك-دياگنوستيكا: ءار ناۋقاسقا – جەكە ەم

ورتالىقتا جاسۋشالىق تەحنولوگيالارمەن قاتار، ونكولوگيالىق اۋرۋلاردى دنك دەڭگەيىندە دياگنوستيكالاۋ باعىتى دا قارقىندى دامىپ كەلەدى. عالىمدار مىڭعا جۋىق گەندى ءبىر مەزەتتە تەكسەرەتىن ارنايى ميكروچيپتەر مەن جاڭا بۋىندى سەكۆەنيرلەۋ (NGS) ءادىسىن قولدانۋدا. بۇل تەحنولوگيا وبىر كەزىندەگى گەنەتيكالىق اقاۋلاردى ءدال تاۋىپ، ءاربىر ناۋقاسقا جەكە، ەڭ ءتيىمدى ەمدەۋ حاتتاماسىن تاڭداۋعا جول اشادى.

بۇدان بولەك، وتاندىق دارىگەرلەر حالىقارالىق باعدارلامالار اياسىندا سەمىزدىك پەن كرون اۋرۋىنا قارسى جاڭا پرەپاراتتاردى سىناقتان وتكىزىپ جاتىر. وسى ورايدا ءبىر ايتا كەتەتىن جايت، بۇعان دەيىن قازاق ونكولوگيا جانە راديولوگيا عىلىمي-زەرتتەۋ ينستيتۋتىندا ءسۇت بەزى مەن انالىق بەز وبىرىنا شالدىققان ناۋقاستارعا ارنالعان تەگىن گەنەتيكالىق زەرتتەۋ (NGS) جوباسى ىسكە قوسىلعان ەدى.

بۇل جاڭالىق ەل مەديتسيناسىنا نە بەرەدى؟

دىڭگەكتى جاسۋشالار نەگىزىندەگى پرەپاراتتار الەمدىك نارىقتا وتە قىمبات تۇرادى. وتاندىق عالىمداردىڭ ءوز ءونىمىن جاساپ شىعارۋى – قازاقستاندىق ناۋقاستار ءۇشىن وزىق ەمنىڭ قولجەتىمدىلىگىن ارتتىرىپ، شەتەلدىك كلينيكالارعا كەتەتىن قارجىنى ەلدە قالدىرادى.

جاسۋشالىق پرەپاراتتاردى ساقتاۋ مەن تاسىمالداۋ – الەمدىك مەديتسيناداعى ەڭ كۇردەلى ماسەلە دەسەك ەش ارتىق ايتپايمىز. وتاندىق عالىمداردىڭ پرەپاراتتى ۇزاق ساقتاۋ تەحنولوگياسىن (ليوفيليزاتسيا) يگەرۋى بۇل دارىلەردى ەلىمىزدىڭ ەڭ شالعاي ايماقتارىنا دەيىن جەتكىزۋگە مۇمكىندىك بەرەدى.

NGS جانە ميكروچيپتەر ارقىلى دنك-دياگنوستيكا جۇرگىزۋ – «سوقىر ەمدەۋدەن» باس تارتىپ، اۋرۋدىڭ تۇپكى سەبەبىنە ءدال سوققى بەرۋ دەگەن ءسوز. بۇل ونكولوگيالىق ناۋقاستاردىڭ ءومىر ءسۇرۋ ۇزاقتىعى مەن ساپاسىن ايتارلىقتاي جاقسارتادى.

قورىتا ايتقاندا، قازاقستان عالىمدارىنىڭ بۇل باستامالارى – وتاندىق دەنساۋلىق ساقتاۋ سالاسىنىڭ جاي عانا تۇتىنۋشى ەمەس، الەمدىك دەڭگەيدەگى عىلىمي-يننوۆاتسيالىق ءونىم ءوندىرۋشى دەڭگەيىنە كوتەرىلىپ كەلە جاتقانىنىڭ ايقىن دالەلى بولىپ تابىلماق.

Abai.kz

0 پىكىر