سارسەنبى, 18 قاراشا 2026
انە، كوردىڭ بە؟ 112 0 پىكىر 18 قاراشا, 2026 ساعات 14:57

ءاربىر 100 باررەل مۇنايدىڭ 88-ءى قازاقستاندا وندىرىلەدى...

سۋرەت: جي ارقىلى جاسالعان.

كەيدە كۇندەلىكتى قىمباتشىلىق، قوعامدىق داۋ مەن تۇرمىستىق ماسەلەلەردىڭ اراسىندا ءوز ەلىمىزدىڭ ەكونوميكالىق اۋقىمىن بايقاماي قالامىز. قيىندىقتارىمىز بار، ونى ەشكىم جوققا شىعارمايدى. بىراق قازاقستاننىڭ وڭىردەگى سالماعىن دا ورنىمەن باعالاي ءبىلۋىمىز كەرەك.

يتاليانىڭ ءىرى ەنەرگەتيكالىق كومپانياسى Eni الەمدىك ەنەرگەتيكانىڭ احۋالىن تالدايتىن World Energy Review 2026 ەسەبىن جاريالادى. بيىل 25 جىلدىعىن اتاپ وتكەن وسى شولۋدا قازاقستانعا قاتىستى نازار اۋدارارلىق ساندار بار.

سونىڭ ەڭ سالماقتىسى مىنادا. ورتالىق ازياداعى مۇناي ءوندىرىسىنىڭ شامامەن 88 پايىزى ءبىزدىڭ ۇلەسىمىزدە. وڭىردەگى بەس مەملەكەت وندىرەتىن ءاربىر ءجۇز باررەلدىڭ سەكسەن سەگىزى قازاقستاننان شىعادى. بۇل جاي عانا ءبىرىنشى ورىن ەمەس، ءوندىرىس اۋقىمى جاعىنان ۇلكەن باسىمدىق.

ەسەپتەگى ادىستەمە بويىنشا، گاز سۇيىقتىقتارىن قوسا ەسەپتەگەندە، 2025 جىلى قازاقستاننىڭ تاۋلىكتىك مۇناي ءوندىرىسى 2,098 ميلليون باررەلگە جەتكەن. ءبىر جىلداعى ءوسىم 11,8 پايىز، ال ون جىلداعى ءوسىم 24 پايىزعا جۋىق. مۇنداي كولەم قازاقستاننىڭ الەمدىك ەنەرگيا نارىعىنداعى ورنىن دا ايقىندايدى.

مۇناي دەگەندە بۇل كەن ورنىنداعى ۇڭعىما عانا ەمەس. ونىڭ اينالاسىندا كولىك، قۇرىلىس، سەرۆيستىك كومپانيالار، ينجەنەرلىك قىزمەت، مىڭداعان جۇمىس ورنى بار. ەكسپورتتان تۇسكەن ۆاليۋتانىڭ تەڭگە باعامىنا، بيۋدجەتكە، ۇلتتىق قورعا ىقپالى بار. سوندىقتان ءوندىرىستىڭ وسىنداي اۋقىمى تۇتاس ەكونوميكانىڭ مۇمكىندىگىنە اسەر ەتەدى.

ەسەپتەگى تاعى ءبىر قىزىق كورسەتكىش جەل ەنەرگەتيكاسىنا قاتىستى. Eni سالىستىرمالى دەرەك كەلتىرگەن ءوڭىر ەلدەرىنىڭ اراسىندا قازاقستاننىڭ جەل ەلەكتر ستانتسيالارىنىڭ بەلگىلەنگەن قۋاتى 1 909 مۆت، وزبەكستاندا 1 652 مۆت بولعان. مۇندا ءسوز وندىرىلگەن ەلەكتر كولەمى تۋرالى ەمەس، ورناتىلعان قۋات تۋرالى بولىپ وتىر. ءداستۇرلى ەنەرگەتيكاداعى تاجىريبەمىزبەن قاتار، جاڭا باعىتتاعى وندىرىستىك نەگىزىمىز دە قالىپتاسىپ كەلە جاتقانىن وسىدان كورۋگە بولادى.

قازىر قازاقستاننىڭ قولىندا كەلەسى دامۋ كەزەڭىن قارجىلاندىراتىن ەلەۋلى مۇمكىندىك بار. ەنەرگەتيكادان تۇسەتىن تابىستى وڭدەۋ ونەركاسىبىنە، سەنىمدى ەلەكتر جەلىلەرىنە، بىلىمگە جانە تەحنولوگياعا اينالدىرا الساق، بۇگىنگى باسىمدىعىمىز ۇزاق مەرزىمدى ناتيجەگە جۇمىس ىستەيدى. سوندىقتان ەلىمىزدىڭ الەۋەتىن باعالاعاندا جەتىستىكتى كورە ءبىلۋ ماڭىزدى. ودان كەيىن سول جەتىستىككە ساي تالاپ قويا الامىز.

ايبار ولجاەۆ

Abai.kz

0 پىكىر