بەيسەنبى, 28 ناۋرىز 2024
جاڭالىقتار 3166 0 پىكىر 1 جەلتوقسان, 2009 ساعات 05:34

شالقار ەستەن. يۋران قازاقتان كەشىرىم سۇراسىن!

جۋىردا بىرقاتار باق قۇرالدارى «لوكوموتيۆ» فۋتبول كلۋبىنىڭ بۇرىنعى باپكەرى سەرگەي يۋران مەن وسى كوماندانىڭ مۇشەسى جامبىل كوكەەۆ اراسىنداعى كيكىلجىڭگە قاتىستى حابار تاراتتى.

جۋىردا بىرقاتار باق قۇرالدارى «لوكوموتيۆ» فۋتبول كلۋبىنىڭ بۇرىنعى باپكەرى سەرگەي يۋران مەن وسى كوماندانىڭ مۇشەسى جامبىل كوكەەۆ اراسىنداعى كيكىلجىڭگە قاتىستى حابار تاراتتى.

ەندى وسى داۋدىڭ قالاي باستالعانىن بايانداپ وتەلىك. بۇدان ءبىراز ۋاقىت بۇرىن رەسەيلىك مامان جامبىل كوكەەۆتى كوماندانىڭ نەگىزگى قۇرامىنان شىعارىپ تاستادى. ءسويتىپ الاڭداعى اقىلدى ويىنىمەن جانكۇيەر جۇرەگىنەن ورىن الىپ ۇلگەرگەن دارىندى فۋتبولشى «لوكوموتيۆتىڭ» قوسالقى قۇرامىندا «جازاسىن» وتەدى. ارينە بۇل جاعداي كوپتىڭ نازارىنان تىس قالا قويمادى. كوكەەۆتىڭ نە سەبەپتەن الاڭعا شىقپاي جۇرگەنىنە الاڭداۋلى جانكۇيەر قاۋىمنىڭ كوكەيىندەگى سۇراققا جاۋاپتى باس باپكەر يۋران بەردى. ول جامبىلدى كوماندا مۇشەلەرىنە ورتاق ءتارتىپتى بۇزدى دەپ ايىپتادى. وعان ارينە كوپشىلىگىمىز سەندىك تە. ويتكەنى جاس فۋتبولشىلار تاراپىنان نە قيلى «ەركەلىكتەردىڭ» ءجيى ورىن الىپ جاتاتىنىنا كۋا بولىپ جۇرگەنىمىز راس. قالاي بولعاندا دا باس باپكەردىڭ شەشىمى كوماندا مۇشەلەرى ءۇشىن ورىندالۋعا ءتيىس زاڭ. كوكەەۆ تە سول بۇيرىققا باعىنىپ، يۋراننىڭ قالاۋىمەن قوسالقى قۇرامدا دوپ تەبۋگە ءماجبۇر بولدى. ال ءدال وسى تۇستا «لوكوموتيۆ» بىرنەشە ماڭىزدى كەزدەسۋلەر وتكىزدى. الگى ويىنداردا شابۋىلعا دەم بەرىپ وتىراتىن تالانتتى جارتىلاي قورعاۋشىنىڭ ورنى ويسىراپ قالعانى انىق بايقالدى. اندرەي تيحونوۆ قانشا جەردەن كومانداسىن العا سۇيرەپ، جەڭىسكە جەتەلەۋگە تىرىسسا دا بولمادى - «لوكوموتيۆ» ماڭىزدى ۇپايلاردان كوز جازىپ قالدى. بىراق يۋران سوندا دا كوكەەۆتى نەگىزگى قۇرامعا قايتارۋعا اسىقپادى. مىنەزى بىرتوعا، تاربيەلى ورتادان شىققان جامبىل سونشالىقتى نە ءبۇلدىرىپ قويدى ەكەن دەستىك. كەيىنىرەك «جازاسىن» وتەپ بولعان كوكەەۆ كوماندانىڭ نەگىزگى ساپىنا قايتىپ ورالدى جانە جاسىل الاڭ تورىندە ءوزىنىڭ شەبەرلىگىن سان مارتە دالەلدەپ تە بەردى. ول گول دا سوقتى، تيحونوۆتارعا ناتيجەلى پاس تا جەتكىزدى. كىم بىلەدى، بالكىم يۋران قيتىقپاي، كوكەەۆتى نەگىزگى قۇرامعا ەرتەرەك قايتارعاندا «لوكوموتيۆ» چەمپيوندىق اتاققا قول سوزىپ قالار ما ەدى؟ بىراق بولار ءىس بولدى، «تەمىرجولشىلار» وزدەرىنە بۇيىرعان جۇلدەنى يەلەندى. ال سەرگەي يۋران چەمپيونات اياقتالماي جاتىپ-اق كوماندادان كەتتى.

ايتسە دە ماۋسىم اياقتالعان تۇستا جاڭاعى داۋدىڭ جاڭعىرىعى ەستىلدى. 21 جاسار جامبىل كوكەەۆ جالپاق جۇرتقا اقيقاتتىڭ بەتىن اشتى:

- بىردە كوماندالىق ارىپتەسىم ماقسات بايجانوۆ ەكەۋمىز قازاق تىلىندە سويلەسىپ كەلە جاتتىق. ءجاي انشەيىن ازىلدەسىپ، كۇلگەن ەدىك. بىراق مۇنىمىزدى يۋران باسقاشا ءتۇسىنىپ، ءوزىن مازاق ەتتى دەپ قابىلدادى. سوندىقتان بولار ول بۇدان بىلاي ءوزىنىڭ كوزىنشە ءبىزدىڭ تەك ورىس تىلىندە سويلەۋىمىزدى تالاپ ەتتى. مەن وعان كونبەدىم.

مىنە كوكەەۆتىڭ قوسالقى قۇرامعا قۋىلۋىنىڭ ءتۇپ-توركىنى وسىندا ەكەن. جازىقتى بولعان جامبىل ءوز قانداسىمەن ءوز انا تىلىندە سويلەسكەنى ءۇشىن جاپا شەكتى. «لوكوموتيۆ» قوسىنىنداعى يۋران تۇزگەن «تارتىپكە» مويىنسۇنعىسى كەلمەگەن جامبىلعا ارا تۇسەر قازاقستاننىڭ فۋتبول فەدەراتسياسى شوشقا تاعالاپ وتىرعان با؟ شىندىقتىڭ بەتى اشىلعالى بەرى بىرنەشە كۇن وتسە دە قۇزىرلى ورىنداعى شەنەۋنىكتەردىڭ بىرەۋسى دە جۇمعان اۋزىن اشقان جوق. نامىستى ەل ەكەنىمىز راس بولسا اشەيىندە اۋىز جاپپاس شەشەندەرىمىز نەگە بۇعىپ قالدى؟  بوساعامىزدان اتتاپ، بىردەن تورىمىزگە ءوتىپ كەتەتىن يۋران سياقتىلاردى تاۋبەسىنە كەلتىرۋگە ءتيىسپىز. ول ءۇشىن وسى سالاعا جاۋاپتى قازاقستاننىڭ فۋتبول فەدەراتسياسى مالىمدەمە تاراتسىن، ەلىمىزدە قىزمەت ەتەتىن شەتەلدىك ماماندارعا ەسكەرتۋ جاساسىن، قاتاڭ تالاپ قويسىن. بۇندايعا جول بەرگەن جەتەسىزدەرگە جازا تاعايىنداسىن. بىرقاتار كلۋبتاردى شىرىلداتىپ، ايىپپۇل تولەتتىرگەن فەدەراتسيامىز انشەيىندە ءپرينتسيپشىل ەدى عوي. وسى جولى كورسەتسىن مىقتىلىعىن. ۇلتتىق نامىسىمىزدى اياققا تاپتاعان يۋراندى حالىقتان كەشىرىم سۇراسىن. ويتپەيدى ەكەن وعان قازاق شەكاراسىن اتتاپ باسۋعا تىيىم سالىنسىن. قازاك ەلىنىڭ فۋتبولىن وركەندەتۋگە شىن نيەتپەن كەلگەندەرى راس بولسا، جاتجۇرتتىقتار ءبىزدىڭ ۇلتتىق قۇندىلىقتارىمىزدى سىيلاسىن. تىلىمىزگە، دىلىمىزگە قول سۇقپاسىن!

 

«ايقىن» گازەتى

 

 

0 پىكىر

ۇزدىك ماتەريالدار

العىس ايتۋ كۇنى

العىس ايتۋ كۇنى جانە ونىڭ شىعۋ تاريحى

جومارتبەك نۇرمان 1562
الاشوردا

قوجانوۆ مەجەلەۋ ناۋقانىندا (جالعاسى)

بەيبىت قويشىباەۆ 2256
عيبىرات

قايسار رۋحتى عازيز جان

مۇحتار قۇل-مۇحاممەد 3532