تۇركيادا جول اپاتىنا ۇشىراعان قازاقستاندىقتاردىڭ دەنساۋلىقتارى جامان ەمەس. بۇل تۋرالى قر سىرتقى ىستەر مينيسترلىگىنىڭ ءباسپاسوز حاتشىسى ءىلياس وماروۆ حابارلادى.

تۇركيادا جول اپاتىنا ۇشىراعان قازاقستاندىقتاردىڭ دەنساۋلىقتارى جامان ەمەس. بۇل تۋرالى قر سىرتقى ىستەر مينيسترلىگىنىڭ ءباسپاسوز حاتشىسى ءىلياس وماروۆ حابارلادى.
«دارىگەرلەر وقيعادان زارداپ شەككەن ءبىر قىرعىزستان ازاماتىنىڭ قولىن كەسىپ تاستادى. ال اۋىر جارالانعان قازاقستاندىق ەكى ايەلدىڭ بىرەۋىنىڭ ميى شايقالسا، كەلەسىسىنىڭ ومىرتقاسىنا زاقىم كەلگەن. قازىر ولارعا كۇردەلى وپەراتسيا جاسالدى. جاعدايلارى جاقسى. اۋرۋلاردىڭ كوڭىلىن اۋلاۋ ءۇشىن ولاردىڭ تۋىستارى دا اۋرۋحاناعا ورنالاستىرىلعان»، –دەيدى ءى.وماروۆ. سونىمەن تۇركيانىڭ سيدە قالاسىندا قازىر ءتورت قازاقستان ازاماتى ەمدەلىپ جاتىر. بۇعان دەيىن جاراقاتى ءبىرشاما جەڭىل ون استام ادام العاشقى مەديتسينالىق جاردەمنەن كەيىن اۋرۋحانادان شىعارىلعان. الايدا اپاتقا ۇشىراعانداردىڭ بارىنە پسيحولوگيالىق كومەك كورسەتىلۋدە. ويتكەنى كەيبىر جولاۋشىلار، اسىرەسە بالالار كولىك كورسە، مازاسىزداناتىندى شىعارعانعا ۇقسايدى. بۇدان بۇرىن ءمالىم بولعانداي، مامىردىڭ 22-سىندە انتاليا كۋرورتتى قالاسى ماڭىندا تۋريستەر مىنگەن اۆتوبۋس تاس جولدان اۋدارىلعان ەدى. كولىكتە 36 ادام وتىرعان. ونىڭ 21-ءى – ءبىزدىڭ ەلىمىزدىڭ ازاماتتارى. سىرتقى ىستەر مينيسترلىگىنىڭ ءباسپاسوز حاتشىسىنىڭ مالىمەتىنشە، ازاماتتاردىڭ كونستيتۋتسيالىق قۇقىعىنا قايشى كەلەتىندىكتەن، اپاتقا ۇشىراعانداردىڭ اتى-ءجونى جاريا ەتىلمەي وتىر. ال جول-كولىك وقيعاسىنا اۆتوبۋس ەمەس، قاراما-قارسى باعىتتا جۇيتكىپ كەلە جاتقان الدەقانداي جەڭىل ماشينا جۇرگىزۋشىسى كىنالى. قازىرگى ۋاقىتتا بۇل جايدىڭ سەبەپ-سالدارى ءالى دە تولىق تەكسەرىلىپ جاتىر. سونداي-اق وسى ساپاردى ۇيىمداستىرماق بولعان تۋريستىك كومپانيا ساقتاندىرۋ بويىنشا جاۋاپكەرشىلىكتەرىن ورىنداۋعا نيەت بىلدىرگەن. ال تۋريستىك ساپاردا جولى بولماعان وتانداستارىمىزعا قاجەتتى كومەك بەرۋدى ۇكىمەت باسشىسى كارىم ءماسىموۆ توتەنشە جاعدايلار ءمينيسترى ۆلاديمير بوجكو باستاعان جۇمىس توبىنا تاپسىردى.
ۆلاديمير بوجكو، قر توتەنشە جاعدايلار جونىندەگى ءمينيسترى:
– ءبىز وقيعانى العاشقى ساتىنەن-اق باقىلاۋىمىزعا الدىق. اتىراۋدا تۋ-104 اۋە تەحنيكاسى دايىندىققا كەلتىرىلدى. ءبىزدىڭ ۆەدومستۆودان بولەك، دەنساۋلىق ساقتاۋ جانە سىرتقى ىستەر مينيسترلىكتەرى دە قازاقستاندىقتارعا قول ۇشىن بەرۋگە ساقاداي-ساي. بىراق ازاماتتارىمىزدى دەرەۋ ەلگە قايتارۋدىڭ قاجەتتىلىگى بولا قويعان جوق. جول اپاتىنا تاپ بولعانداردىڭ جاعدايلارى جاقسارىپ كەلەدى.

“الاش ايناسى” گازەتى 26 مامىر 2009 جىل