قازاقستان رەسەيگە قارسى باتىc ەلدەرى تاراپىنان سالىنىپ جاتقان ەكونوميكالىق سانكتسيالارعا قاراپ  الاڭداي باستادى. بۇل تۋرالى ۇلتتىق بانك توراعاسى قايرات كەلىمبەتوۆ مالىمدەدى.

«رەسەيگە باتىس ەلدەرى تاراپىنان سالىنىپ جاتقان ەكونوميكالىق سانكتسيا رەجيمىنىڭ كۇشەيۋى ءبىزدى الاڭداتادى. رەسەي ءبىزدىڭ ەڭ ءىرى ساۋدا ارىپتەسىمىز. قازاقستانعا كەلەتىن تاۋاردىڭ 36 پايىزى - رەسەيلىك ونىمدەر، ال قازاقستان ەكسپورتىنىڭ 7 پايىزى رەسەي نارىعىنا شىعارىلادى. ءبىز بۇل ەلدەن كوپ مولشەردە كاپيتالدىڭ سىرتقا كەتىپ جاتقانىن كورىپ وتىرمىز. بيىل رەسەي ەكونوميكاسىندا ءوسىم بولمايتىن سياقتى. ەكى ەلدىڭ ەكونوميكاسى ءبىر-بىرىمەن تىعىز بايلانىستى بولعاندىقتان سانكتسيالاردىڭ قاتايا ءتۇسۋى ءبىزدى الاڭداتىپ وتىر»، - دەدى كەلىمبەتوۆ.

ال، ناۋرىزدىڭ 25-ءى كۇنى نيدەرلاندتىڭ گااگا قالاسىندا قازاقستان پرەزيدەنتى نۇرسۇلتان نازارباەۆ «باتىس ەلدەرىنىڭ  رەسەيگە قارسى سانكتسيالارىنىڭ قازاقستانعا قاتىسى جوق» دەپ مالىمدەگەن ەدى. (http://news.nur.kz/307534.html)

پرەزيدەنتتىڭ وسى سوزىنەن كەيىن ەلىمىزدەگى ەكونوميكالىق ساراپشىلار رەسەيگە قارسى سالىنىپ جاتقان سانكتسيالاردىڭ قازاقستانعا اسەرى بولمايتىنى تۋرالى جارىسا ايتقان.

دەگەنمەن، ەكونوميست، ەكونوميكا ينستيتۋتى استانا فيليالىنىڭ ديرەكتورى جانگەلدى شىمشىقوۆ مىرزا 27 ناۋرىز كۇنى بىزگە بەرگەن سۇحباتىندا اقش پەن ەۋروپا ەلدەرىنىڭ رەسەيگە جاساپ جاتقان ەكونوميكالىق قىسىمىنىڭ قازاقستانعا مىندەتتى تۇردە سالقىنى تيەتىنىن  قاداپ ايتقان بولاتىن:

- ۋكراينا مەن رەسەي اراسىنداعى شيەلەنىستى جاعداي قازاقستان ەكونوميكاسىنا اسەر ەتۋى مۇمكىن بە؟

 - قازىرگى جاھاندانۋ زامانىندا الەمدىك ەكونوميكا ءبىر-بىرىمەن تىعىز بايلانىستا. ۋكراينا مەن قازاقستان اراسىنداعى ساۋدا، كاپيتال اينالىمى جانە كاسىپورىندار بايلانىسى قازاقستان مەن رەسەي اراسىنداعى ساۋدا اينالىمىنا جەتپەسە دە قوماقتى دەۋگە بولادى.. سوندىقتان، ۋكرايناداعى كەز كەلگەن ەكونوميكالىق وزگەرىس قالاي دەسەڭىزدە قازاقستانعا اسەر ەتپەي قويمايدى. اسەر ەتپەيدى دەپ جاھاندانۋدىڭ زاڭدىلىقتارىن تۇسىنبەيتىن ادام عانا ايتۋى مۇمكىن. ۋكراينا عانا ەمەس، قازاقستان ەكونوميكالىق بايلانىسى بار وزگەدە ەلدەردەگى جاعداي بىزگە مىندەتتى تۇردە اسەرىن، ىقپالىن جاسايتىنى ءسوزسىز.

- اقش پەن ەۋروپا ەلدەرىنىڭ رەسەيگە جاساپ جاتقان ەكونوميكالىق قىسىمدارىنىڭ قانداي ءبىر ناتيجەسى بولا ما؟

 - مىندەتتى تۇردە اسەر ەتەدى. «جىعىلعان كۇرەسكە تويمايدى» دەيدى عوي، رەسەي تۋرالى قازىرگى ايتىپ جاتقان سوزدەر ءدال وسى ءسوزدىڭ كەرى. ەگەر ونىڭ اسەرى بولمايتىن بولسا، اقش ونداي قادامعا بارماس ەدى. بۇل ەكونوميكالىق قىسىمداردىڭ كەرى اسەرى رەسەي ارقىلى قازاقستان ەكونوميكاسىنا دا ءتيۋى مۇمكىن.

(http://abai.kz/post/view?id=113)

Abai.kz