قازرگى كەزدە سۋپەركومپيۋتەرلەر بارعان سايىن جوعارى قۋاتتى بولىپ بارا جاتقاندىقتان، ولاردى قاجەتتى قۋاتپەن قۋاتتاي الاتىن ءونىمدى ءتاسىلدى تابۋ وڭايعا سوقپاي وتىر دەيدى الەمنىڭ ەڭ ۇلكەن تەح-كومپانيالارى وزدەرىنىڭ جولىققان قيىندىقتارىن جاسىرماي.

CNN-نىڭ التىنشى مامىرداعى جاڭالىقتار توپتاماسىنا سۇيەنسەك، بۇل قيىندىقتى شەشۋدىڭ جولىن ءىۆم ماماندارى تاۋىپ ۇلگەرىپتى. ءىۆم-دىقتار بۇل ماسەلەنى شەشۋدە ادامزات ميىن ۇلگى ەتىپ، تەح-كومپانيالاردى كولدەنەڭ قيىندىقتاردان ارىلتا الامىز دەگەنگە سەندىرەدى.

ادام ميى قازىرگى تاڭداعى كەز-كەلگەن كومپيۋتەردەن نەشە مىڭ ەسە قۋاتتى ءارى ءونىمدى، سەبەبى ادام ميى قان تامىرلاردىڭ تورلارى ارقىلى جىلۋ مەن ەنەرگيانى وتە جوعارى دەڭگەيدە تاسىمالداي الادى،-دەيدى ءىۆم-نىڭ ماتەريالدار عىلىمى مامانى برۋنو ميشەل.  

ءىۆم-نىڭ «ەلەكتروندى قان» دەپ اتالاتىن جاڭا تەحنولوگياسى زەرتحانادا تابىسقا جەتىپ ۇلگەرگەن. ەلەكتر اعىنىمەن قۋاتتالعان «ەلەكتروندى قان» دەپ اتالاتىن سۇيىقتىق اعىپ وتىرىپ، كومپيۋتەردىڭ پروتسەسسورىنا بارادى، سوسىن سۇيىقتىق قۇرىلعى قاجەت ەتەتىن قۋاتتى قامتاماسىز ەتەدى.

قازىرگى كومپيۋتەرلەردىڭ كولەمى ۇلكەن ەتىپ جاسالادى، سەبەبى، قۋاتتى كومپيۋتەرلەر تۋدىرعان كۇشتى جىلۋ چيپتەردى جاقىن ورنالاستىرۋعا مۇمكىندىك بەرمەيدى. ەگەر سۇيىق قۋاتتاۋ جۇيەسى بولسا، وندا ءۇش ولشەمدى كەڭىستىكتى تولىقتاي پايدالانۋعا بولادى، ناتيجەدە كومپيۋتەردىڭ كولەمىن جوعارى دەڭگەيدە كىشىرەيتۋگە مۇمكىندىك بولادى.

- ءبىر سەكۋندتا ءبىر كۆادريلون وپەراتسيانى ىسكە اسىرا الاتىن قازىرگى سۋپەركومپيۋتەر-«پەتافلوپتىڭ» جارتى فۋتبول الاڭىنداي ۇلكەندىگىن ەسەپكە الساق،-دەيدى ءىۆم-دىق ماماندار،- ەگەر، ونىڭ ورنىندا 3-D ءۇش ولشەمدى ەلەكتروندى قانمەن قۋاتتالاتىن كومپيۋتەر بولسا، ونىڭ كولەمى تەك ۇستەلدىك كومپيۋتەردىڭ ۇلكەندىگىندەي عانا بولار ەدى.

- جاقىن بولاشاقتا سۇيىقتىقپەن قۋاتتالاتىن سۋپەركومپيۋتەرلەردى دۇنيەگە اكەلەتىن بولامىز، ال ولاردىڭ ۇلكەندىگى قانت ۇنتاعىنداي بولادى،-دەيدى ءىۆم زەرتتەۋ ورتالىعىنىڭ وكىلى كريس شاككا.

الداعى جيىرما جىلعا دا جەتە قويمايتىن بولاشاقتا سەكۋندىنا تريلليون ميلليارد  (1,000,000,000,000,000,000,000)  رەتكى وپەراتسيانى جۇزەگە اسىرا الاتىن سۋپەركومپيۋتەرلەر جارىققا شىعاتىن بولادى. بۇلار قازىرگى سۋپەركومپيۋتەردەن 300,000 ەسە جىلدام. «ارينە، ولار قازىرگى ءبىز دايىنداپ جاتقان تەحنولوگيامەن عانا جارىققا شىعا الادى»،-دەيدى ءىۆم-دىقتار.

اعىلشىن تىلىنەن اۋدارعان: تالعار دالەلعازى.

Abai.kz