سەيسەنبى كۇنى قر ستاتيستيكا اگەنتتىگىنىڭ توراعاسى ءاليحان سمايىلوۆ استانادا جۋرناليستەرمەن ءباسپاسوز ءماسليحاتىن وتكىزدى. باس ساناقشى كەدەن وداعىنىڭ سوڭعى بەس جىلداعى جەتىستىكتەرىنە توقتالدى. ونىڭ ايتۋىنشا قازاقستاننىڭ كەدەن وداعىنا مۇشە ەلدەرمەن جاساعان تاۋار اينالىمى 2010 جىلدان بەرى 88 پايىزعا وسكەن. «اتاپ ايتار بولساق، ەكسپورتتىڭ كولەمى 63 پايىزعا، يمپورتتىڭ كولەمى 98 پايىزعا ارتتى» دەيدى ءا.سمايىلوۆ. قازاقستان ەكسپورتىنداعى شيكىزات تاۋارلارىنىڭ ۇلەسى 35 پايىزعا كوبەيگەن، ال وڭدەلگەن شيكىزات ەمەس تاۋارلاردىڭ ەكسپورتتىق ءوسىمى 97 پايىزعا تەڭ بولىپتى. ءا.سمايىلوۆ مىرزا جۋرناليستەردى وسى كورسەتكىشتى تومەندەتپەي ۇستاپ تۇرا الامىز دەپ سەندىردى.

كەدەن وداعىنا مۇشە مەملەكەتتەرمەن اراداعى تاۋار اينالىمىنا قاتىستى مالىمەتتەر وسى اپتانىڭ باسىندا مەملەكەتتىك رەسمي سايتتاردا جاريالانعان بولاتىن. وتكەن جىلعى سىرتقى ساۋدا اينالىمىنىڭ 18,4 ملرد. دوللارىن يمپورت قۇراسا، 5,9 ملرد. دوللارى ەكسپورتقا تيەسىلى ەكەن. رەسەي فەدەراتسياسى مەن بەلورۋس رەسپۋبليكاسىنا ەكسپورتتالعان ونىمدەردىڭ ىشىندە كومىر، مۇناي، ۋران، الليۋميني، استىق، جۇك كولىكتەرى جانە ت.ب. بار. ءبىر قۋانارلىق جاعداي – قازاقستان ەكسپورتتايتىن تاۋارلاردىڭ ىشىندە دايىن تاۋارلاردىڭ ۇلەسى كوبەيگەن. ەندى ءبىزدىڭ مەملەكەت تەك شيكىزات ەمەس، اككۋمۋلياتور، ەلەكتر جەلىلەرى، كونديتەرلىك ونىمدەر، ماقتا-ماتا، استىق ونىمدەرىن مولىنان ساتىپ وتكىزەدى. بۇل شيكىزاتتىق مەملەكەتتەن دايىن تاۋار ءوندىرۋشى مەملەكەتكە اينالعانىمىزدىڭ بەلگىسى.

ال يمپورتتىڭ كوپ بولىگىن مۇناي ونىمدەرى، جەڭىل اۆتوكولىكتەر، وندىرىستىك قۇرال-جابدىقتار، اۋىل شارۋاشىلىعى تەحنيكالارى، جيھازدار قۇرايدى. باستى ساۋدا ارىپتەسىمىز – رەسەي فەدەراتسياسى. كەدەن وداعى ىشىندەگى يمپورتتىڭ 96 پايىزى وسى ەلدىڭ ۇلەسىنە تيەدى.

سونىمەن قاتار ستاتيستيكا اگەنتتىگىنىڭ توراعاسى اعىمداعى جىلدىڭ العاشقى ماۋسىمىندا جالپى ىشكى ءونىمنىڭ ءوسىمى 2,9 پايىزدى قۇراعانىن جانە جىل باسىنان بەرى قازاقستانعا  900 ملرد. تەڭگە ينۆەستيتسيا قۇيىلعانىن اتاپ ءوتتى. بۇل وتكەن جىلعى كورسەتكىشپەن سالىستىرعاندا جوعارى ناتيجە. ءسوز سوڭىندا ءا.سمايىلوۆ ءجىو-گە قاتىستى كەلەسى ستاتيستيكالىق رەسمي قورىتىندى اعىمداعى جىلدىڭ تامىز ايىندا جاريالاناتىنىن جەتكىزدى.

كەدەن وداعىنا مۇشە ەلدەردىڭ شەكاراسىندا باج سالىعىنىڭ سالىنباۋى، اكىمشىلىك كەدەرگىلەردىڭ جويىلۋى تاۋار اينالىمىنا وڭ ىقپال ەتكەن. ەلارالىق ىنتىماقتاستىقتان اسىرەسە، شاعىن جانە ورتا بيزنەس وكىلدەرى كوپ پايدا تاۋىپ وتىر.

ەستەرىڭىزگە سالا كەتەيىك، كەدەن وداعى 2010 جىلدىڭ ماۋسىم ايىنان بەرى جۇمىس ىستەپ كەلە جاتىر. وعان ءۇش مەملەكەت – رەسەي فەدەراتسياسى، بەلورۋس رەسپۋبليكاسى جانە قازاقستان رەسپۋبليكاسى مۇشە. ۇيىمعا مۇشە ەلدەردىڭ شەكاراسىندا كەدەندىك سالىقتار سالىنبايدى. سونىمەن بىرگە كەدەن وداعى اياسىندا ءۇش مەملەكەتكە ورتاق بىرىڭعاي تاريفتەر بەلگىلەنەدى.

باۋىرجان ابەن