ەلىمىزدە  2017 جىلى وتەتىن حالىقارالىق «ەكسپو-2017» مامانداندىرىلعان كورمەسىن وتكىزۋگە دايىندىق جوسپار بويىنشا ءجۇرىپ جاتىر. وسى رەتتە كورمە نىساندارىنىڭ قۇرىلىسى دا كەستەگە سايكەس جۇرگىزىلىپ، شىعىستار وڭتايلاندىرۋ ماقساتىندا ارلەۋ جۇمىستارىنا وتاندىق ونىمدەردى پايدالانۋ كوزدەلۋدە.

 مەملەكەت باسشىسى ن.نازارباەۆ ەكسپو كورمەسى وتاندىق ەكونوميكاعا جانە جاڭا تەحنولوگيالاردى يگەرۋ ىسىنە سەرپىن بەرە الاتىن ۇلتتىق جوباعا اينالاتىنىن ايتادى.  «كورمەنىڭ اشىلۋىنا ءبىر جارىم جىل قالدى. بارلىق قۇرىلىس جۇمىستارى كەلەسى جىلدىڭ كۇزىنە دەيىن اياقتالۋى ءتيىس. كۇردەلى ەكونوميكالىق احۋالعا قاراماستان، ءبىز كورمەنى دايىنداۋعا قاجەتتى بارلىق قاراجاتتى ءبولىپ جاتىرمىز. قۇرىلىسقا قازاقستاندا مول جۇمىس تاجىريبەسى بار مەردىگەرلەردى تارتتىق. سونداي-اق ميلانداعى كورمەنى وتكىزۋ تاجىريبەسىن تىڭعىلىقتى زەردەلەدىك. سوندىقتان ەكسپو-نى ۇيىمداستىرۋ ىسىنە قاتىستى تۇسىنىكسىز ەشتەڭە جوق، – دەگەن بولاتىن نۇرسۇلتان نازارباەۆ.

داعدارىستىق جاعدايدى ەسكەرە وتىرىپ، ەكسپو كورمەسىن ۇيىمداستىرۋدا بىرقاتار وزگەرىستەر ەنگىزىلمەك.  باستىسى كورمەگە جۇمىسالاتىن شىعىنداردى مۇمكىندىگىنشە قىسقارتا وتىرىپ، ساپالى جۇمىس جۇرگىزۋ. وسى رەتتە  شىعىستاردى وڭتايلاندىرۋ ماقساتىندا بارلىق ارلەۋ جۇمىستارىن وتاندىق ونىمدەردى بارىنشا پايدالانا وتىرىپ جۇرگىزۋ كوزدەلۋدە. بۇل بىرىنشىدەن وتاندىق ونىمدەردى قولداۋ شاراسى بولسا، ەكىنشىدەن كورمە بيۋدجەتىن ۇنەمدەۋگە مۇمكىندىك بەرەدى. سونىمەن قاتار، كومپانيا قۇرىلىمىن وزگەرتۋ اياسىندا «استانا ەكسپو-2017»  ۇلتتىق كومپانياسىنىڭ  دەپارتامەنتتەر  قىزمەتى ناقتىلانىپ، باسقارما توراعاسىنىڭ ورىنباسارلارى مەن باسقارۋشى ديرەكتورلار سانى ەكى ەسە قىسقارعان. بۇل 150 ميلليون تەڭگەدەن استام قاراجاتتى ۇنەمدەۋگە مۇمكىندىك بەردى.  جانە كەيبىر ساۋلەت قۇرىلىس جوبالارىن قايتا قاراۋ ەسەبىنەن شىعىستار كولەمى 78 ميلليارد تەڭگەگە ازايتىلدى.  بۇل رەتتە جالپى ساۋلەت كەلبەتى مەن نىسانداردىڭ بەيىمدىلىگى ساقتالۋى ءتيىس. قازىنادان بولىنگەن قاراجاتتىڭ ماقساتقا ساي ءتيىمدى پايدالانىلۋىنا باسا نازار اۋدارىلۋدا. قازاقستاندىق قامتۋ ۇلەسىن ۇلعايتۋ مەن وتاندىق كاسىپكەرلەردى تارتۋ دا ۇنەمدەۋ شارالارىنىڭ ءبىرى بولىپ سانالادى. وسى تۇرعىدا ەلىمىزدىڭ 10 وڭىرىمەن ىنتىماقتاستىق تۋرالى مەموراندۋمعا قول قويىلعان. ناتيجەسىندە 20 مىڭنان استام ادامدى جۇمىسپەن قامتىعان 220 وتاندىق كاسىپورىن قۇرىلىسقا تارتىلىپ، 30 ميلليارد تەڭگەنىڭ ءونىمى جەتكىزىلگەن.   

الداعى كورمە بۇكىل قازاقستاندىقتار ءۇشىن ماڭىزدى شارا ەكەنى راس. بۇل كورمە ەلىمىزدىڭ ايبىنى مەن دامۋ دەڭگەيىنىڭ كورسەتكىشى بولماق. سوندىقتان قازىرگى داعدارىس جاعدايىنا قاراماستان دايىندىق جۇمىستارى ءوز دەڭگەيىندە جۇرگىزىلۋى اسا ماڭىزدى. بۇل تۋرالى مەملەكەت باسشىسى:  «الەمدە داعدارىستىق احۋال بايقالىپ وتىر، ول ءبىزدىڭ ەلگە دە اسەر ەتۋدە. سوعان قاراماستان، قازاقستان حالىقارالىق كورمەگە دايىندىقتى، يندۋستريالىق ساياسات اياسىندا جاڭا نىساندار سالۋدى، جاڭا جۇمىس ورىندارىن اشۋدى جالعاستىرۋدا. بۇل ءبىزدىڭ ەكونوميكانىڭ قارقىنى مەن مۇمكىندىكتەرىن كورسەتەدى»، – دەدى نۇرسۇلتان نازارباەۆ.

2017 جىلعى الەمدىك ايگىلى كورمە بارىسىندا قازاق ەلىنىڭ مادەنيەتىن، تاريحى مەن داستۇرلەرىن كورسەتۋدىڭ ماڭىزدىلىعى زور. سوندىقتان وتاندىق مادەنيەت قايراتكەرلەرىنىڭ ونەر كورسەتۋىنە باسىمدىق بەرىلۋى كەرەك. مادەني-دۋماندى شارالار كورمە اۋماعىندا عانا ەمەس، بۇكىل قالادا ءوتۋى قاجەت. مۋزەيلەر، كورمەلەر مەن تەاترلار قوناقتاردى ەڭ جوعارى دەڭگەيدە قارسى الۋعا دايىن بولۋى ءتيىس. مادەني-دۋماندى شارالار جوسپارى مەن قالانىڭ قاۋىپسىزدىگى ماسەلەسى دە اسا ماڭىزدى.  بۇل  رەتتە مادەني شارالار جانە قاۋىپسىزدىك ماسەلەسى پىسىقتالۋ ۇستىندە.  ارناۋلى قىزمەتتەر مەن قۇقىق قورعاۋ ورگاندارى قاۋىپسىزدىك پەن قۇقىق ءتارتىبىن قامتاماسىز ەتۋى ءتيىس. ءىىم، ۇقك جانە «سىربار» وسى باعىتتاعى ۇيلەسىمدى جۇمىستى جالعاستىرۋ قاجەت. ەلوردانىڭ جانە كورمەنىڭ قاۋىپسىزدىگى وسىعان بايلانىستى.  

«استانا ەكسپو-2017»  ۇلتتىق كومپانياسى قازىرگى تاڭدا  كورمە ءيميدجىن ىلگەرىلەتۋ جانە ونى تاقىرىپتىق جاعىنان تولىقتىرۋ جۇمىستارىن جۇيەلى جۇرگىزۋدە.

ايتا كەتەيىك، ەلوردامىزدا 2017 جىلى وتكىزىلەتىن الەمدىك ايگىلى كورمەگە دايىندىق بارىسىنداعى شارالار اياسىندا بۇگىندە 53 ەل جانە 11 حالىقارالىق ۇيىم كورمەگە قاتىساتىنىن راستادى.

ءجانيا ابدىبەك

Abai.kz