دۇيسەنبى, 20 قىركۇيەك 2021
قوعام 4632 0 پىكىر 1 قىركۇيەك, 2014 ساعات 02:18

ءسارىنجىپوۆتان جاۋاپ كۇتكەن سۇراق - 1

Abai.kz اقپاراتتىق پورتالى شىلدە ايىنىڭ 17-ءسى كۇنى ءبىلىم جانە عىلىم ءمينيسترى اسلان ءسارىنجىپوۆتى ينتەرنەت-كونفەرەنتسياعا شىعارعان ەدى. وقىرماندار تاراپىنان مينيسترگە ۇزىن سانى 95 سۇراق قويىلدى. اسلان مىرزا شىلدەنىڭ 31-ءى مەن تامىزدىڭ 1-ءى ارالىعىندا 27 ساۋالعا جاۋاپ بەردى. مىنە، ارادا تۋرا ءبىر اي ءوتتى، 68 سۇراق ءسارىنجىپوۆتان جاۋاپ كۇتىپ سارعايىپ ءالى تۇر. وقىرماندار كۇن سايىن رەداكتسياعا حابارلاسىپ، مينيستر ءالى دە بولسا جاۋاپ بەرىپ قالار دەگەن ۇمىتتە ەكەندىكتەرىن ايتىسىپ جاتادى. ءبىز دە ءۇمىتتىمىز!

بۇگىن - ء بىرىنشى قىركۇيەك. العاشقى قوڭىراۋدىڭ سىڭعىرى دا ەستىلدى. ال، جاۋاپ ءالى جوق. 68 سۇراققا جاۋاپ بەرۋگە الا جازداي قولى تيمەگەن ءمينيستردىڭ ەندى قاۋىرت جۇمىستان قولى بوسامايتىنىن ءىشىمىز سەزىپ وتىر. سوندىقتان، اسلان ءسارىنجىپوۆ جاۋاپ بەرمەگەن 68 سۇراقتى كۇنىنە ءبىر ساۋالدان جەكە-جەكە 68 كۇن بويى جاريالاۋدى باستاپ وتىرمىز.

ايتەسە دە، كۇندەردىڭ كۇنى بولعاندا، استانادان وڭتۇستىككە  - الماتىعا بەت تۇزەگەن قۇستاردىڭ قاناتىنا بايلاپ جىبەرسە دە ءبىر جاۋاپ بەرەر، ءۇمىت ۇزگىمىز كەلمەيدى...

Abai.kz

جاۋابى جوق جەتىم ساۋال - 1

17/07/2014 - 14:23

مەن 2003 جىلى ءال-فارابي اتىنداعى قازاق ۇلتتىق ۋنيۆەرسيتىنەن دايىندىق فاكۋلتەتىندە وقىعانمىن. ول كەزدە شەتەلدەن كەلگەن قازاقتاردىڭ وقۋىندا كوپ پروبلەما بولمايتىن ەدى... ايتالىق، شەتەلدەن كەلگەن 130 تالاپكەر قازاق ءتىلى مەن ماتەماتيكادان تەست تاپسىرۋ ارقىلى "كازگۋ"-دەن ءبىلىم الۋ مۇمكىندىگىنە يە بولدىق. جاڭىلىسپاسام، سوڭعى كەزدەرى سول ورىنداردى اۋعانستاننان كەلگەندەر باسقان. وسى ءۇردىس بىلتىر عانا وزگەرىپتى دەپ ەستىدىم. وتە قۋانىشتىمىن. شەتەلدە ءجۇرىپ، قازاقستاننىڭ باس ۋنيۆەرسيتەتىن ارمانداعان قازاق جاستارىنىڭ ماڭدايىنان قاقپاۋ كەرەك شىعار. سۇرايىن دەگەنىم، كەيىنگى كەزدەرى باكالاۆردى شەتەلدە ءتامامداپ ء(وزى تۇرعان مەملەكەتتە), ماگيستراتۋرا مەن دوكتورانتۋرانى قازاقستاندا وقىپ، وسىندا تۇراقتاپ قالىعىسى كەلەتىن باۋىرلارىڭىزدىڭ قاتارى ارتىپ وتىر. سولارعا قانداي جەڭىلدىكتەر قاراستىرلادى؟ ەگەر ءوز بىلىمدەرىن دالەلدەپ، گرانتقا يە بولىپ جاتسا نۇر ۇستىنە نۇر بولار ەدى. ويتكەنى ءبىز ولاردىڭ مەكتەپتە، ۋنيۆەرسيتەتتە وقۋىنا ءبىر تيىن جۇمساعان جوقپىز. دايىن مامان. تەك وزىمىزگە بەيىمدەپ، وقۋىن تولىقتىرىپ جىبەرسەك بولعانى. وسى تاراپتا شەتەلدە جۇرگەن 5 ميلليون قازاق ۇرپاعى وزىڭىزدەن قولداۋ كۇتەدى.

0 پىكىر