Rtit ۇكىمەت وتىرىسىندا تىلدەردى دامىتۋ مەن قولدانۋدىڭ 2011-2020 جىلدارعا ارنالعان مەملەكەتتىك باعدارلامانىڭ ورىندالۋ بارىسى قارالدى. وسىعان وراي ورتالىق كوممۋنيكاتسيالار قىزمەتىندە وتكەن بريفينگتە  پرەمەر-ءمينيستردىڭ ورىنباسارى گۇلشارا ابدىحالىقوۆا مىناداي مالىمەتتەر كەلتىردى: قازاقستان حالقىنىڭ 62-63 پايىزى قازاق ءتىلىن، 92 پايىزى - ورىس جانە 16,6 پايىزى اعىلشىن ءتىلىن مەڭگەرگەن. ۆيتسە پرەمەر حانىم ەلباسىنىڭ ءۇش تۇعىرلى ءتىلدى دامىتۋ تاپسىرماسىن الداعى ۋاقىتتا باسا نازارعا الۋ كەرەك دەپ سانايدى.

ال، بريفينگكە قاتىسقان قر مادەنيەت ءمينيسترى ارىستانبەك مۇحامەديۇلى بولسا  باعدارلاما اياسىندا جاسالعان جۇمىستاردىڭ ناقتى كورسەتكىشتەرىنە توقتالىپ، قازتەست جۇيەسىن جەتىلدىرۋ بويىنشا مەملەكەتتىك ءتىلدى وقىتۋعا ارنالعان 5 دەڭگەيدەن تۇراتىن وقۋ-ادىستەمەلىك كەشەن ازىرلەنگەنىن ايتتى. بۇل ەلىمىزدەگى 351 ءتىلدى دامىتۋ ورتالىقتارى ارقىلى وقىتىلماق. سونداي-اق مينيستر: «كەزەكتە مەملەكەتتىك قىزمەتشىلەرگە قازاق ءتىلىن مەڭگەرۋدى مىندەتتەگەن دۇرىس. مۇنى 2015 جىلدان باستاپ ورتالىق جانە جەرگىلىكتى اتقارۋشى ورگانداردىڭ ستراتەگيالىق جوسپارلارىنا ساتىلى تۇردە قازتەست جۇيەسىن ەنگىزۋ ارقىلى شەشەمىز", - دەپ باياندادى.

اتالعان مەملەكەتتىك باعدارلاما قازاقستان رەسپۋبليكاسى پرەزيدەنتىنىڭ 2011 جىلعى 29 ماۋسىمداعى № 110 جارلىعىمەن قابىلدانعان بولاتىن. ايتا كەتەتىن بولساق بۇل تىلدەردى دامىتۋعا ارنالعان 3-باعدارلاما.  تىلدەردى دامىتۋ باعدارلاماسىنىڭ العاشقى كەزەڭى 1997 جىلعى «قازاقستان رەسپۋبليكاسىنداعى ءتىل تۋرالى» زاڭى قابىلدانۋىنا وراي 1998-2000 جىلدارعا العاشقى باعدارلاما جاساقتالدى.  2001 - 2010 جىلدارى تىلدەردى قولدانۋ مەن دامىتۋدىڭ ون جىلعا ارنالعان كەلەسى مەملەكەتتىك باعدارلاماسى. ءۇشىنشى ون جىلدىق تىلدەردى دامىتۋ باعدارلاماسىنىڭ العاشقى كەزەڭى بىلتىر – 2013 جىلى اياقتالدى. قازىر ءبىز اتالعان باعدارلامانىڭ 2014-2017 جىلدارعا ارنالعان ەكىنشى كەزەڭىندەمىز. بۇل باعدارلامانىڭ ماقساتىنا ساي قازاقستان 2020 جىلى ءبىر تۇتاس مەملەكەتتىك تىلگە كوشەتىن بولادى جانە ەلدە مەملەكەتتىك ءتىلدى بىلمەيتىن بىردە ءبىر ادام بولمايدى.

پرەزيدەنت نۇرسۇلتان نازارباەۆتىڭ: «قازاق ءتىلى 2025 جىلعا قاراي ءومىردىڭ بارلىق سالاسىندا ۇستەمدىك ەتىپ، كەز كەلگەن ورتادا كۇندەلىكتى قاتىناس تىلىنە اينالادى»، - دەگەن ءسوزى بار-دى. جاڭا مينيستر ارىستانبەك مۇحامەديۇلىنىڭ اۋزىنان شىققان «مەملەكەتتىك قىزمەتكە مەملەكەتتىك تىلمەن» باعدارلاماسى شىنىمەن قولعا الىنار بولسا، قازاق تىلىندەگى قازاقستاندا عۇمىر كەشەتىن كۇندەرىمىز ۇزاي قويماس.

نۇرعالي نۇرتاي

Abai.kz