سەيسەنبى, 17 قىركۇيەك 2019
بيلىك 2799 0 پىكىر 6 ماۋسىم, 2014 ساعات 16:12

قازاق جاستارى كونيادا رەپرەسسيا مەن اشارشىلىق قۇرباندارىن ەسكە الدى

تۇركيا رەسپۋبليكاسى، كونيا قالاسىندا 31 مامىر- اشارشىلىق پەن قۋعىن-سۇرگىن قۇرباندارىن ەسكە الۋ كۇنىنە ارنالعان ءىس-شارا بولىپ ءوتتى. ەسكە الۋ كەشى كونيا قازاق جاستارى بىرلەستىگىنىڭ ۇيىمداستىرۋىمەن جانە كونيا تۇرىك وشاعى جاستار ۇيىمىنىڭ قولداۋىمەن جۇزەگە استى. ءىس-شارا قۋعىن-سۇرگىن قۇرباندارىنىڭ رۋحىنا قۇران باعىشتاۋمەن باستاۋ الىپ، XX عاسىردىڭ باسىندا قازاق حالقىنىڭ باسىنان وتكەن ۇلى ناۋبەت تۋرالى باياندامامەن ءوز جالعاسىن تاپتى. اشارشىلىقتىڭ سەبەپتەرى، سالدارى جانە قورىتىندىسى جايلى جينالعان جۇرتقا مالىمەت بەرىلدى. قۋعىن-سۇرگىنگە ۇشىراعان، اتۋ جازاسىنا كەسىلگەن الاش ارىستارىنىڭ قىسقاشا ءومىربايانى كورسەتىلىپ، الاش ۇرانى وقىلدى.

اشارشىلىق پەن قۋعىن-سۇرگىن قۇرباندارىن ەسكە الۋ كۇنىنە وراي قازاق ستۋدەنتتەرىنىڭ ۇيىمداستىرۋىمەن بولعان بۇل شارا كونيا قالاسىندا ءبىرىنشى رەت ۇيىمداستىرىلدى. ءىس-شارانىڭ ماقساتى الىستا جۇرگەن قانداستارىمىزعا، تۇرىك حالقىنا قازاق حالقىنىڭ تاريحىن، قۋعىن-سۇرگىن قۇرباندارىن ەسكە الۋ كۇنىن ناسيحاتتاۋ. باعدارلاما سوڭىندا اعايىن تۇرىك ەلى ورنى تولماس قازاعا كوڭىل ايتتى جانە ارقاشان باۋىرلاس قازاق حالقىنىڭ جانىنان تابىلاتىندارىن ايتىپ، ءوز تىلەكتەرىن ءبىلدىردى.


ايگەرىم سارپەكوۆا

كونيا قالاسىنان

0 پىكىر