اسىق اتۋدان رەسپۋبليكالىق اشىق تۋرنير وتەدى دەگەندى ەستىگەندە ەرەكشە قۋاندىق. ۇلتتىق سپورت تۇرلەرى قاۋىمداستىعىنا الدىن-الا ء(بىر اي بۇرىن!) تاپسىرىس بەرىپ، سادۋاقاس جانە باسقا دا جاقسى ويىن كورسەتىپ جۇرگەن بىرنەشە باۋىرلارىمىزبەن بىرگە باق سىناپ قايتايىق ءارى ۇلتتىق ويىنىمىزدىڭ دامۋىنا ءوز ۇلەسىمىزدى قوسايىق دەپ ويلادىق. بۇل كۇندى اسىعا كۇتتىك. 25 مامىر كۇنى تاڭەرتەڭ ەرتە الىپ–ۇشىپ ويىن بولاتىن جەرگە جەتتىك. جارىس باستالعالى جاتىر ەكەن. مىنە، قىزىق، ءبىزدىڭ اتى-ءجونىمىز تىزىمدە جوق. سەبەبىن ءبىلۋ ءۇشىن ۇيىمداستىرۋ القاسىنا باردىق. ولار: ء«بىز بىلمەيمىز، بارلىعى الدىن-الا جازىلىپ قويعان، كەش قالدىڭىزدار» دەپ قاراپ وتىر. ءبىز  الدىن-الا جازىلعانىمىزدى ايتىپ، شىر-پىر بولدىق. «كەش قالدىڭىزدار، باۋىرىم، بولدى، جەتەر ەندى» دەپ سۋىق قايىردى ۇيىمداستىرۋشىلاردىڭ ءبىرى. «ايتقان ءسوزدى ۇعاسىڭ با، ءبىر ايتقان سوڭ بولدى عوي، نەگە قازبالاي بەرەسىڭ. اشىق پا، جابىق پا وندا شارۋام جوق. ءار وبلىستان ءبىر كوماندا قاتىسادى، بولدى، ءبىتتى» دەپ زەكىپ تاستادى  تاعى ءبىرى. رەسپۋبليكالىق تۋرنيرگە الدىمەن اۋىلدا، سودان سوڭ اۋداندا ىرىكتەۋ بولماۋشى ما ەدى؟ «جينالعان  كوماندالار قاشان، قايدان ىرىكتەۋدەن ءوتتى؟» دەگەن سۇراعىما ىرىكتەۋ بولعان جوق دەگەن جاۋاپ الدىم. دەمەك، ءار ايماقتان ويىنشىلار قاتىسسا جارىس رەسپۋبليكالىق دەگەن  اتاۋعا يە بولا ما؟

مەن قاراپ قالماي ويىنعا قاتىسىپ جاتقان ويىنشىلاردان بۇل جارىسقا قالاي كەلگەندەرىن سۇراستىردىم. ولار ۇيىمداستىرۋشىلاردىڭ وزدەرى شاقىرعانىن ايتتى.  بۇل كۇنى بىزدەن  باسقا دا قانشاما بالا ويىنعا قاتىسا المادى. وسى كۇنگە دەيىن ۇتىپ العان ءۇش جۇزگە جۋىق  اسىعىن ارقالاعان سادۋاقاس  پەن جەتىم قوزىداي كوزدەرى الاق-جۇلاق ەتكەن باۋىرلارىمىز كىمگە شاعىنارىن بىلمەي شاراسىز كۇي كەشتى. وسى ساتتە سادۋاقاستىڭ قورجىنىنداعى تومپيعان كوپ اسىقتى بايقاپ قالعان جۋرناليستەر كامەرالارىن الىپ، ەنتەلەي جونەلدى. ولار: «مۇنشاما اسىقتى قايدان الدىڭ، كىم بەردى؟» دەپ جان-جاقتان سۇراقتارىن جاۋدىرىپ جاتىر. كوڭىل حوشى بولماي تۇرعان بوزبالا بولسا، كامەراعا ءتۇسۋ ءۇشىن كەلمەگەنىن ايتىپ، سويلەمەي قويدى. ونىڭ اسىعىنا قىزىققان جۋرناليستەر قويار دا قويماي، اقىرى ونى كامەراعا تۇسىرۋگە كوندىردى. «مەن بۇل اسىقتاردى اۋىل بالالارىنان ۇتىپ الدىم، وسى كۇنگە دەيىن مەنى ۇتقان بالا بولعان ەمەس» دەپ ءبىر ماقتانىپ قويدى، «بىراق وسى جارىسقا كەلىپ، قاتىسا الماي تۇرعانىم وكىنىشتى. سوندا بۇل جارىس كىمدەر ءۇشىن ۇيىمداستىرىلعان؟» دەپ رەنىشىن ءبىلدىردى. جۋرناليستەردىڭ «ويىنعا نەگە قاتىسا المادىڭ؟» دەگەن ساۋالدارىنا: «ول جاعىن ۇيىمداستىرۋشىلاردان سۇراڭىزدار» دەپ بۇرتيىپ، تەرىس قارادى.

بۇل شارانىڭ  كەمشىلىگىن ايتىپ، ايىبىن بەتىنە باسۋ ءبىزدىڭ ماقساتىمىز ەمەس، ارينە. قاراپايىم قازاق بالاسى ويناپ جۇرگەن اسىق ويىنىن تىم رەسميلەندىرىپ جىبەرگەندەرىنە قىنجىلدىق. ايتپاقشى، ويىن سوڭىندا ورتاعا ونەر جۇلدىزدارىن شاقىرىپ، اسىق اتقىزىپ، سولاردى تاماشالاۋعا شاقىردى.  «اسىق اتۋلارىن قاراڭىزدارشى» دەپ ولاردى اسىرا ماقتادى. سوندا بۇل جارىستىڭ ماقساتى نە؟ ول كىمدەر ءۇشىن ۇيىمداستىرىلعان؟ الدەبىرەۋى ماعان كەلىپ: «ونەر جۇلدىزدارىمەن بىرگە اسىق اتىڭىز» دەپ شاقىردى. اۋىلدان شىققان قارا دومالاق باۋىرلارىم ەسىكتەن سىعالاپ تۇرعاندا، مەن قالاي الاڭسىز اسىق اتادى ەكەنمىن؟! ۇلتتىق ويىنىمىزدى ۇلىقتاعانىمىز وسى ما؟ ونى جانداندىراتىن جاس ۇرپاقتىڭ ىنتا-ىقىلاسىن ارتتىرۋدىڭ ورنىنا ولاردىڭ كوڭىلىن قالدىرساق، كەلەشەگىمىز قالاي بولماق؟  سونى ويلاعان جان بولدى ما ەكەن؟ نە كەرەك، بۇل كۇنى اسىق اتامىز دەپ قۇلشىنىپ بارعان كوڭىلىمىز سۋ سەپكەندەي باسىلىپ، ەڭسەمىز ءتۇسىپ، ۇيگە قايتتىق.  

P.S.

جاس كەزىمىزدە اتالارىمىز ەر بالالاردى شاقىرىپ: «قايسىسىڭ قويدى جۇلمالاماي سويا الاسىڭدار» دەۋشى ەدى. سول ايتقانداي، قويدى دا شىن قاساپشىنىڭ سويعانى دۇرىس-اۋ. بالۋانى ساي بولسا، بايگەسىن كۇلىپ بەرگەن قازاقتىڭ بالاسى ەدىك قوي، ءبىر بالانى ويىنعا قوسۋدىڭ سونشالىقتى قيىن بولعانى ما؟ مىنا  جاعدايدان كەيىن تالايعا ۇلگى بولىپ جۇرگەن سادۋاقاس ءىنىمىز  اسىقتارىن  تاستاي سالماسا  جارار ەدى...

مۇحتار تۇرتايۇلى

Abai.kz