ەرتەڭ الماتىداعى قۇرمانعازى اتىنداعى كونسەرۆاتوريانىڭ كونفەرەنتسيا زالىندا  اقىن، فيلولوگيا عىلىمدارىنىڭ كانديداتى مارجان ەرشۋدىڭ «ەرىك قۇرمانعاليەۆ» اتتى كىتاپ-البومىنىڭ تۇساۋكەسەرى وتەدى.

    كىتاپقا جازعان العىسوزىندە كسرو جانە قر حالىق ءارتىسى، كسرو مەملەكەتتىك سىيلىقتىڭ لاۋرەاتى ، ەڭبەك ەرى بيبىگۇل تولەگەنوۆا: «مۋزىكاتانۋ الەمىنىڭ ن.ل. دورلياك، الەكساندر لاەرتسكي، دميتري بەرتمان تاعى دا باسقا بەلگىلى ونەر قايراتكەرلەرى « ەرىك قۇرمانعاليەۆتىڭ داۋىسى وتە جوعارى جۇمساق داۋىس.ونىڭ دىبىسىندا ءون بويىڭدى سيقىرلاپ، باۋراپ الاتىن ءبىر قۇدىرەت بار.مۇنىڭ سىرى- تابيعات بەرگەن ەرەكشە داۋىسىندا، تالانتىندا» دەپ باعا بەرگەن ەدى. ەرىك –قازاقتىڭ ماڭدايىنا سىيماي كەتكەن ءانشى. ەلدەن كوپ قولداۋ كورە الماعان تالانت. كوپ بولماسا دا،كونتسەرتتەرگە كەلىپ،اندەرىن شىرقاپ ءجۇردى. ول فونوگرامماعا سەنىپ العان ەسترادا ءانشىسى ەمەس قوي. كوبىنەسە شەتەلدە گاسترولدە ءجۇردى. مەن ونى شەتەلدە گاسترولدە جۇرگەنىمدە كوردىم. تالانتىن وتە جوعارى باعالادىم. مەنى دە اپالاپ سىيلاپ تۇراتىن. وتە قاراپايىم، بيازى، مادەنيەتى جوعارى ادام بولاتىن. وزگەلەرمەن قالاي سويلەسەتىنىن بىلمەيمىن، مەنىمەن سويلەسكەندە داۋىسىن تومەندەتىپ اقىرىن سويلەيتىن. مەنى قۇرمەتتەگەنى بولار دەپ ويلايمىن. بىرگە كينوعا دا تۇستىك. الەم مويىنداعان ايگىلى ءانشىنىڭ ەلەۋسىز قالعانى جانعا باتادى. ويتكەنى، ول سانادان تەز ۇمىتىلىپ قالاتىن كوپ جۇلدىزدىڭ ءبىرى ەمەس قوي.
    بيىل 2014 جىلى 31 جەلتوقساندا ەرىك قۇرمانعاليەۆتىڭ تۋعانىنا 55 جىل تولادى ەكەن. ەرىك تۋرالى ماتەريالدار جازىپ،  جاريالاپ، جوقتاۋشىسى بوپ جۇرگەن اقىن مارجان سىڭلىمە، گازەت-جۋرنالداعى جاريالاعان دۇنيەلەرىڭ ءبىر باسقا. ەرىك تۋرالى كىتاپ شىعارعانىڭ دۇرىس دەپ ايتقان ەدىم.
بۇل كىتاپتا ەرىكتىڭ وتباسى،اتا-اناسى ،تۋعان جەرى، وسكەن ورتاسى، ونەردەگى جەتىستىكتەرى مەن ومىردەگى ساتسىزدىكتەرى شىنايى باياندالعان. ناعىز تالانتتاردىڭ ءومىرى جەڭىل بولمايدى. الەم تانيتىن ەرىك قۇرمانعاليەۆ اتانۋ دا –وعان وڭايلىقپەن كەلگەن جوق. كىتاپتا ايگىلى ءانشىنىڭ پورترەتى اشىلعان دەۋگە بولادى» دەپ جازادى.
    ايگىلى ءانشى تۋرالى قازاق-ورىس تىلىندەگى تۇڭعىش ومىرباياندىق كىتاپ –البوم «فوليانت» باسپاسىنان 1000 دانامەن اتىراۋ وبلىستىق اكىمدىگىنىڭ قولداۋىمەن جارىققا شىعىپ وتىر.

اباي-اقپارات.