سۇراق:

«تۇرعىن ءۇي قۇرىلىسى جيناق بانكى» ماماندارى تاراپىنان وسى سايتتا جازىلىپ جاتقان كەڭەستەردەن كەيىن اۋىلداعىلارعا دا قالاعان قالادان باسپانا الۋعا بولاتىنىن ءبىلىپ جاتىرمىز. راحمەت. مەن ءوزىم وتەگەن باتىر كەنتىندە جۇمىس ىستەيمىن، مۇگەدەك ۇلىم بار. تۇرعىن ءۇي كەزەگىندە تۇرامىن. جاقىندا بارىپ ءبىلىم ەم، كەزەگىڭىز جاقىن، بىراق تۇرعىن قورىندا ءازىر ءۇي جوق دەپ قايتاردى. مەنىڭ بىلەيىن دەگەنىم، وسى تۇرعىن ءۇي قورى تۋرالى بانك ءتۇسىندىرىپ بەرە مە ەكەن؟

ءلاززات، الماتى وبلىسى.

جاۋاپ:

ءلاززات، جىلى لەبىزىڭىزگە العىس ايتامىز. بىراق، بانكتىڭ قىزمەتكەرلەرىنىڭ مىندەتىنە ەلىمىزدەگى تۇرعىن ءۇي ساياساتى جايلى ءتۇسىندىرۋ جۇمىستارى كىرمەيدى. ونى ءسىز بارىپ ءوتىنىش بىلدىرگەن الەۋمەتتتىك ورگاننىڭ قىزمەتكەرى ءتۇسىندىرۋ ءتيىس ەدى. دەگەنمەن، سىزگە قاجەتى بولىپ قالار دەگەن نيەتپەن مىنا مالىمەتتەر مەن زاڭنامالىق قۇجاتتاردى ۇسىنامىز: 

تۇرعىن ءۇي قورى - تۇرعىن ءۇي-جايلاردىڭ، تۇرعىن ءۇي جانە تۇرعىن ۇيگە جاتپايتىن قۇرىلىستارداعى تۇرعىن ۇيلەرگە تيەسىلى كومەكشى ءۇي-جايلاردىڭ جيىنتىعى. تۇرعىن ءۇي قالاسىنىڭ شاماسى تۇرعىن اۋدانى مەن جالپى اۋدان بويىنشا ايقىندالادى.

تۇرعىن ءۇي قورىنا نە جاتادى؟

تۇرعىن جايدىڭ پايدالى الاڭى – تۇرعىن جايدىڭ تۇرعىن جانە تۇرعىن ەمەس الاڭدارى;

تۇرعىن جايدىڭ تۇرعىن الاڭى – تۇرعىن جايداعى (پاتەردەگى) تۇرعىن بولمەلەردiڭ (جاتىن بولمەنiڭ، قوناق بولمەنىڭ، بالالار بولمەسiنiڭ، ۇيدەگi كابينەتتiڭ جانە سول سياقتىلاردىڭ) شارشى مەترمەن ەسەپتەلەتىن الاڭدارىنىڭ قوسىندىسى;

تۇرعىن ءۇي (تۇرعىن عيمارات) – ورتاق مۇلىك بولىپ تابىلاتىن، نەگىزىنەن تۇرعىن ءۇي-جايلاردان، سونىمەن قاتار تۇرعىن ەمەس ءۇي-جايلاردان، باسقا دا بولىكتەردەن تۇراتىن قۇرىلىس;

تۇرعىن ءۇي-جاي (پاتەر) – تۇراقتى تۇرۋعا ارنالعان جانە پايدالانىلاتىن، جايدىڭ تۇرعىن جانە تۇرعىن ەمەس الاڭدارىن قوساتىن جەكە تۇرعىن ءۇي-جاي;

دارا تۇرعىن ءۇي – ءۇي-جايلىق جەر تەلىمىندە ورنالاسقان جانە شارۋاشىلىق پەن باسقا دا قۇرىلىستارى جانە جاسىل كوشەتتەرىمەن بىرگە ازاماتتىڭ مەنشىگىندەگى جەكە (وتباسىلىق) تۇرۋعا ارنالعان ءۇي;

جەكە تۇرعىن ءۇي قورى – جەكە نەمەسە مەملەكەتتiك ەمەس زاڭدى تۇلعالارعا جانە ولاردىڭ بiرلەستiكتەرiنە مەنشiك قۇقىعىمەن تيەسiلi تۇرعىن جاي;

مەملەكەتتىك تۇرعىن ءۇي قورى – مەملەكەتتىك مەنشىك قۇقىعىنا جاتاتىن جانە جەرگىلىكتى اتقارۋشى ورگان (مەملەكەتتىك كوممۋنالدىق تۇرعىن ءۇي قورى) جۇرگىزۋىندەگى نەمەسە مەملەكەتتىك كاسىپورىن (مەملەكەتتىك كاسىپورىن تۇرعىن ءۇي قورى) جۇرگىزۋىندەگى تۇرعىن جاي;

سىرتقى قابىرعا ماتەريالدارى – ءۇيدىڭ سىرتى (سىرتقى قابىرعاسى) تۇرعىزىلعان قۇرىلىس ماتەريالدارى. ەگەر قابىرعالار بىرنەشە ماتەريالداردان تۇرعىزىلسا، باسىم ماتەريال كورسەتىلەدى;

تۇرعىن ءۇيدىڭ (تۇرعىن عيماراتتىڭ) جالپى الاڭى – تۇرعىن 
ءۇي-جايدىڭ بارلىق پايدالى الاڭدارى جانە تۇرعىن ەمەس ءۇي-جايلاردىڭ بارلىق الاڭدارى، سونىمەن بىرگە ورتاق مۇلىك بولىپ تابىلاتىن تۇرعىن ءۇيدىڭ جەكە بولىكتەرىنىڭ الاڭدارى;

دەرەكتەر بويىنشا بۇگىندە ەلىمىزدىڭ تۇرعىن ءۇي قورى 270 ميلليون شارشى مەتردى قۇرايدى. ونىڭ 260 ميلليون شارشى مەترى نەمەسە 98 پايىزى جەكە مەنشىكتە. ال، كوپ پاتەرلى ۇيلەرلەردىڭ اۋماعى، ياعني، كوندومينيمۋم نىساندارىنىڭ ۇلەسى 157 ميلليون شارشى مەتردى قۇرايدى.

اباي-اقپارات.