ەرتەڭ جوق بۇرسىگۇنى، ياعني جەلتوقاننىڭ ءۇشى كۇنى KEGOC كومپانياسىنىڭ اكتسياسىنا باستالعان «جازىلۋ مارافونى» اياقتالادى. قاراشانىڭ بەسىنەن بەرى سوزىلىپ كەلە جاتقان وسىناۋ «حالىقتىق IPO» حالىققا قانشالىقتى ءتيىمدى؟ جالپى، اتالىپ وتىرعان كومپانيانىڭ  اكتسيالارىن ساتىپ الۋعا بولا ما؟ وسى كۇنگە دەيىن قاراشا حالىقتىڭ قانشاسى كومپانيا اكتسياسىن ساتىپ الدى؟

راس، مۇنى ءبىز بىلمەيمىز، ال بىراق ءبىزدىڭ بىلەتىنىمىز مىنانداي ماسەلە: KEGOC-ءتىڭ ساتۋعا شىعارىلعان جيىرما التى ميلليون اكتسياسىنىڭ ارقايسىسىنىڭ باعاسى – 505 تەڭگە. حوش دەيىك. «سامۇرىق-قازىنانىڭ» باسشىسى ومىرزاق شۇكەەۆتىڭ ايتۋىنا قاراعاندا، ءبىز ايتىپ وتىرعان كومپانيا ءوز كىرىسىنىڭ جوق دەگەندە قىرىق پايىزىن تۇرعىندارعا ديۆيدەند تولەۋگە باعىتتايتىن كورىنەدى. بۇل قالاي سوندا؟ ماسەلەن، وتكەن جىلدىڭ قورىتىندىسى بويىنشا اتالعان كومپانيا 14,5 ميلليارد تەڭگە شىعىنعا باتتى. «ناتيجەسىندە» كومپانيا وتكەن جىلى «كوك تيىن» دا ديۆيدەند تولەگەن جوق. وسى جەردە كومپانيا باسشىلىعىنا (كومپانيانىڭ باسقارما توراعاسى باقىتجان قاجيەۆ دەگەن ازامات) ءبىزدىڭ ءبىر عانا سۇراعىمىز بار، ول مىنانداي سۇراق: ەلباسىمىز ءتيىمسىز دەپ باعالاعان وسىناۋ كومپانيانىڭ اكتسيالارىن قازاقستاندىقتار نەگە ساتىپ الۋعا ءتيىستى؟ ەكى مىڭ ونىنشى جىلدان كەيىن ءبىر دە ءبىر رەت ديۆيدەند تولەمەگەن KEGOC «حالىقتىق IPO» نەگىزىندە اكتسيالارىن ساتىپ العان «پودپيسچيكتەرىنە» ديۆيدەندتى قالاي تولەمەكشى؟

باسە، قالاي تولەمەكشى؟

مارات ماداليموۆ

Abai.kz