ماقسات ۇسەنوۆ (سۋرەتتە) تاعى دا جول-كولىك وقيعاسىن جاسادى دەپ حابارلايدى الماتى ءىىب-ءنىڭ ءباسپاسوز قىزمەتى.

تاڭەرتەڭگى ساعات 8.40-تا گاگارين كوشەسىنىڭ بويىندا كەلە جاتقان ول جولدىڭ قارسى بەتىنە شىعىپ تويوتا راف-4 اۆتكولىگىن قاعىپ كەتكەن. تويوتا راف-4 اۆتكولىگىنىڭ رۋلىندە وتىرعان ايەل باسىنان قاتتى جاراقات الىپ، 7-قالالىق كلينيكالىق اۋرۋحاناعا تۇسكەن.

ەستەرىڭىزگە سالا كەتەيىك، اتىشۋلى ۇسەنوۆ وتكەن اقپان ايىندا الماتى جۇرتىنىڭ جاعاسىن ۇستاتىپ BMW X6 اۆتوكولىگىمەن "تسەليننىي" كينوتەاترىنىڭ ماڭىنداعى جاياۋ جۇرگىنشى جولىنان التى بىردەي ادامدى قاعىپ كەتكەن. ءبىر ادام سول جەردە كوز جۇمعان ەدى. بىراق كەيىننەن تاراپتاردىڭ تاتۋلاسۋىنا بايلانىستى قىلمىستىق ءىس توقتاتىلىپ، ماقسات ۇسەنوۆ قاماۋدان بوساتىلعان بولاتىن.

باسىنا تاياق تيسە دە ءوز ىسىنەن ساباق المايتىن، بەيپىل تىلمەن ايتقاندا، ارتىن قىسىپ جۇرە المايتىن بۇل كىم ءوزى؟ اۋرۋ ما؟ الدە، اكەسىنىڭ جەر-كوككە سىيماي جاتقان بايلىعىن وسىلايشا شاشۋدى ماقسات تۇتقان «بۇلىكشىل» مە؟ ول كىم بولسا دا، بۇل ماسەلەدە قوعام ويلاناتىن حالگە جەتتى. بۇعان قوعام بەلسەندىلەرى عانا ەمەس، الەۋمەتتىك ينسيتۋتتار، پسيحولوگتار، پارلامەنت دەپۋتاتتارى، ۇكىمەت – تەگىس كوڭىل اۋدارۋى كەرەك سياقتى. ويتكەنى مىناۋ شەكتەن شىعۋ عانا ەمەس، اسىقىنىپ، قابىنا باستاعان ماسەلە. قازاقستانداعى جول-كولىك وقيعاسىنىڭ كوپتىگىنە، جولاۋشىلاردىڭ جول اپاتىنا ءجيى ۇشىراپ كوز جۇماتىندىعىنا نازار اۋدارعان پرەزيدەنت نازارباەۆ: «سيريادا عوي، تۇسىنىكتى، سوعىس بولىپ جاتىر. ال، بىزدە شە؟ بىزدەگى جول اپاتىنان كوز جۇمىپ جاتقانداردىڭ سانى قارۋلى قاقتىعىس ءجۇرىپ جاتقان سيريادان كوپ» دەگەن ەدى. كوپ بولاتىن سەبەبى بىزدە ۇسەنوۆتار كوپ. ۇسەنوۆتاردى ارقاعا قاعىپ شىعارىپ سالىپ، «تايراڭدا دا باس بەر» دەيتىن جەمقور سۋديا، جەڭ ۇشىنان جالعاسقان تامىر-تانىستىق كوپ. ۇسەنوۆتىڭ كەزەكتى «ەرلىگىن» ەستىگەن الماتىلىقتار ۇرەيلەنىپ قالدى. ەندى جۇرت باعدارشامعا ەمەس، ۇسەنوۆ قاي جولمەن كەلە جاتىر ەكەن دەپ جۇرەتىن شىعار...

Abai.KZ