«تۇرعىن ءۇي قۇرىلىس جيناق بانكى» جانىنداعى قوعامدىق كەڭەس كەزەكتى وتىرىسىن اقمولا وبلىسىندا وتكىزبەكشى. كەڭەس مۇشەلەرى ايماقتا «قول جەتىمدى باسپانا - 2020» باعدارلاماسى اياسىندا سالىنىپ جاتقان تۇرعىن ءۇي قۇرىلىستارىنىڭ بارىسىمەن تانىسپاق.

قوعامدىق كەڭەستىڭ نازارى كوكشەتاۋ قالاسىنا كەزدەيسوق ءتۇسىپ وتىرعان جوق. سوڭعى كەزدەرى كەڭەسكە وبلىس ورتالىعى تۇرعىندارى تاراپىنان ايتىلعان ارىز-شاعىمدار جولدانعان بولاتىن. سالىمشىلار كوكشەتاۋ قالاسىنىڭ «ۆاسيلكوۆ» ىقشام اۋدانىندا سالىنىپ جاتقان 150 پاتەرلىك تۇرعىن ءۇي قۇرىلىسىنىڭ جۇمىستارىنا الاڭداۋشىلىق بىلدىرۋدە. اقمولا وبلىستىق اكىمشىلىگىمەن اراداعى كەلىسىمگە ساي اۋماعى 9,9 شارشى مەتر بولاتىن قۇرىلىس نىسانى بيىلعى جىلدىڭ قىركۇيەك ايىندا اياقتالۋى ءتيىس بولاتىن.

بۇل ماسەلە «تۇرعىن ءۇي قۇرىلىس جيناق بانكى» جانىنداعى قوعامدىق كەڭەستىڭ ەكىنشى وتىرىسىندا، ۇستىمىزدەگى جىلدىڭ 22 قىركۇيەگىندە قارالعان بولاتىن. وسى وتىرسقا قاتىسقان بانك وكىلدەرى، قوعامدىق كەڭەس مۇشەلەرى جانە جەرگىلىكتى باسقارۋ ورگاندارىنىڭ وكىلدەرى مەن باسپانا قۇرىلىسىنا قاتىسۋشى سالىمشىلاردىڭ وكىلدەرى «قول جەتىمدى باسپانا-2020» باعدارلاماسىنىڭ تالابىنا ساي كوكشەتاۋداعى تۇرعىن ءۇي قۇرىلىسىن اياقتاۋدا ورىن العان كەمشىلىكتەردى تالقىلاپ، ونى شەشۋدىڭ جولدارى قاراستىرىلعان ەدى.

سونداي-اق، وسى وتىرىستا قۇرىلىس جۇمىستارى باياۋ جۇرگىزىلىپ جاتقان، جالپى اۋماعى 109 مىڭ شارشى مەتردى قۇرايتىن 31 تۇرعىن ءۇيدىڭ ۋاقتىلى اياقتالۋى سىن تەزىنە سالىنعان ەدى. بۇل تىزىمدەگى نىسانداردىڭ توعىزى اقتاۋ مەن الماتى قالالارىنا تيەسلى بولعان.  5 نىسان كوكشەتاۋ قالاسىندا، اتىراۋ مەن شىمكەنتتە ءۇش ءۇي قۇرىلىسى اياقتالماعانى انىقتالعان. سونداي-اق، پاۆلودار مەن پەتروپاۆل قالالارىندا دا ءبىر-ءبىر تۇرعىن ءۇيدىڭ قۇرىلىسىنا قاتىستى سۇراق تۋعان.

– قوعامدىق كەڭەستىڭ ەكىنشى وتىرىسىنان بەرى ەداۋىر ۋاقىت وتسە دە، تۇرعىن ءۇي قۇرىلىسىنا قاتىستى الاڭداۋشىلىق ازايماي وتىر. ونى بانك تاراپىنان دا، قوعامدىق كەڭەسكە  شاعىم ايتۋشىلاردان دا بايقاۋعا بولادى. دوڭگەلەك ۇستەل بارىسىندا اتقارۋشى بيلىك ءبىزدى بارلىق نىسانداردىڭ قۇىرلىسى جىل سوڭىنا دەيىن اياقتالادى دەپ سەندىرگەن ەدى. وسى جولى كوكشەتاۋداعى جۇمىستاردى ءوزىمىز كورىپ، ءىستىڭ ناتيجەلى اياقتالارىنا كوز جەتكىزگىمىز كەلەدى، - دەيدى تقجب جانىنداعى قوعامدىق كەڭەس توراعاسى سەيىتقازى ماتاەۆ.

ال، قوعامدىق كەڭەس مۇشەسى، تەلەجۋرناليست سەرگەي پونومارەۆ  بىلاي دەيدى:

– اتقارۋشى بيلىكتىڭ ايتىلعان مەرزىمگە دەيىن بەرگەن ۋادەلەرىن ورىنداي الاتىندىعىنا كوز جەتكىزۋ – بانك سالىمشىلارىنىڭ عانا ەمەس، تۇتاس تۇرىعىن ءۇي سالاسىنا دەگەن الەۋمەتتىڭ سەنىمىن اقتاۋ بولماق. «قول جەتىمدى تۇرعىن ءۇي - 2020» باعدارلاماسى جۇزەگە اسىرىلا باستاعالى بەرى اقمولا وبلىسىندا ءۇش رەت اكىم اۋىستى. بىراق، بۇل بولىنگەن قارجى مەن جۇكتەلگەن مىندەتتىڭ ماقساتتى ءارى ۋاقتىلى جۇزەگە اسىرىلۋىنا كەدەرگى بولماۋى ءتيىس. قوعامدىق كەڭەس مۇشەلەرى كوكشەتاۋداعى قۇرىلىس نىساندارىنىڭ بارىسىن كوزبەن كورۋ ارقىلى، بانك سالىمشىلارىنىڭ كوپتەگەن ساۋالدارىنا جاۋاپ تابادى...

ەسكە سالا كەتەيىك، «تۇرعىن ءۇي قۇرىلىس جيناق بانكى» جانىنداعى قوعامدىق كەڭەستىڭ كوشپەلى وتىرىسى 2014 جىلدىڭ 18 قاراشاسىندا كوكشەتاۋ قالاسىندا وتەدى.

اباي-اقپارات