بۇگىن تاڭەرتەڭ «31-ارنانىڭ» ءتىلشىسى گۇلبانۋ انياتقىزى (سۋرەتتە) اقمولا وبلىسىنىڭ تسەلينوگراد اۋدانىندا قوياندى ماسەلەسىنە بايلانىستى ءباسپاسوز ءماسليحاتى وتەدى دەگەندى ەستىپ اسىعىپ بارادى. بارسا، ەشكىم جوق. دۇرىسى: اكىمدىكتىڭ قىزمەتكەرلەرى مەن اۋداندىق اكىمشىلىككە جۇمىس-شارۋاسىمەن كىرىپ-شىعىپ جۇرگەن اداماداردان وزگە بوتەن-بوگدە جان كوزگە شالىنا بەرمەيدى. ال، اساي-مۇسەيىن اسىنىپ، ارتىنىپ-تارتىنىپ، سونادايدان كوزگە شالىناتىن ارىپتەستەردىڭ ءبىرى دە بايقالمايدى. وپەراتورمەن ەكەۋى «بۇ قالاي بولعانى؟» - دەپ تۇرعاندا گۇلبانۋدىڭ قاسىنا قوياندى «جىرىنىڭ» باستى كەيىپكەرلەرىنىڭ ءبىرى كەلىپ مىنا جايتتى بايان ەتەدى (قوياندى ماسەلەسى ءالى تولىق شەشىمىن تاپپاعاندىقتان كەيىپكەردىڭ اتى-ءجونىن جاريا ەتپەۋدى ءجون كوردىك):

الگى «كەيىپكەردىڭ» ايتۋىنا قاراعاندا، وعان ءبىر اشاڭ ءجۇزدى، ارىقشا جىگىت كەلىپ جولىعادى دا: «31-ارنا» ءتىلشىسى گۇلبانۋدىڭ ۇستىنەن ارىز جازىڭىز»، - دەيدى؟

-          نەگە جازۋىم كەرەك؟ – دەيدى ارىپتەسىمىزگە سىرىن اقتارعان ادام.

-          ويتكەنى ول جالعان اقپارات تاراتىپ، ەلدى شۋلاتىپ، رەيتينگ جيناپ ءجۇر. «31-ارناعا» دا ءسويتىپ رەيتينگ اپەرمەكشى. ءسىز بىلەسىز بە، بۇل ارنانىڭ ارمانى – ەل ءىشىن ءبۇلدىرۋ. ارنا سىرتقى كۇشتەرگە جۇمىس ىستەيدى.

-          وندايىن بىلمەيدى ەكەنمىن، بىراق وسى ارنا ايتەۋىر ەلگە جاقىن ارنا عوي.

-          جوق، تۇكتە ولاي ەمەس. ونىڭ ۇستىنە گۇلبانۋ تۇرمىس قۇرا قويماعان قىز. جىگىتتەردىڭ نازارىن وزىنە وسىلاي اۋدارتقىسى كەلەدى. قىسقاسى، گۇلبانۋدىڭ ۇستىنەن شاعىم ءتۇسىرىڭىز، سوندا ول باسىن الىپ قاشادى. ءسىز بولساڭىز پالەدەن قۇتىلاسىز.

-          ولاي ەتە المايمىن. ءبىزدىڭ جاعدايىمىزدى ءتۇسىنىپ جانۇشىرعان ءتىلشىنى عايباتتاي المايمىن. قوياندى اۋىلىنىڭ احۋالىن جۇرتقا جاريا ەتىپ، ۇكىمەتتىڭ نازارىن اۋدارتقان ءتىلشى مەن «31-ارنانى» سىرتىنان ساتۋعا ارىم جىبەرمەيدى.

قىسقاسى اڭگىمەنىڭ ۇزىن-ىرعاعى – وسى.

«بۇدان ارى قاراي كۇتىپ تۇرا المادىق تا اكىمدىككە كىرىپ باردىق،  تاپ سول كەزدە كامەرالارىن جارقىلداتقان ارىپتەستەرىمىز بە، باسقا بىرەۋلەر مە، تاپ بولا كەتتى. الدىمىزدان قوياندى اۋىلىنىڭ اكىمى التىناي مەيىرمانقۇلوۆا دا شىعا كەلدى»، - دەيدى بىزبەن اڭگىمەسىندە گۇلبانۋ انياتقىزى.   

ءسويتىپ باق «وكىلدەرىنىڭ» ورتاسىنان تابىلا كەتكەن التىناي مەرحانقىزى: «قوياندى اۋىلىندا ەشقانداي ءۇي بۇزىلىپ-قيراتىلمايدى». «31-ارنانىڭ ءتىلشىسى» ناقتى اقپارات بەرمەي ەلدى دۇرلىكتىرىپ ءجۇر»، -  دەپ سالادى.

-          اكىمنىڭ اۋزىنان الگىندەي ءسوز شىققان بەتتە ادەتتەگى تەلەجۋرنالسيتەردەن ءتۇر-تۇستەرى مۇلدە بوتەن، ساقال-مۇرتتارىن قاۋلاتىپ ءوسىرىپ جىبەرگەن، بەيتانىس ارىپتەستەر مەنى سۇراقتىڭ استىنا الىپ، بەينەكامەراعا تارتىپ، شارتىلداتىپ سۋرەتكە تۇسىرە باستادى، - دەيدى گۇلبانۋ.

-          ولاردى مۇلدە تانىمادىڭ با؟ قاي ارنانىڭ جىگىتتەرى ەكەن؟

-          ناقتى قاي ارنادان ەكەندەرىن ايتپادى، بىراق اكىمنىڭ مالىمدەمەسى مەن مەن ولاردىڭ بەرگەن سۇراقتارىنا قايىرعان جاۋاپتارىمدى YouTube-كە سالىپ جىبەرەمىز، - دەدى.

-          قىزىق ەكەن، ەگەر باسپانالارى سۇرىلىمەيتىن بولسا، قوياندىداعى جۇرت نەگە سۇرگىنگە ءتۇسىپ ايقاي سالادى؟

-          قوياندىدا ءسۇرىلىپ كەتۋى ىقتيمال 167 ءۇيدىڭ تاعدىرى تۋرالى اۋىل اكىمى عانا ەمەس، ۇكىمەت وكىلى دە ايتتى ەمەس پە؟

-          ءيا، ول ەسىمىزدە. ۇلتتىق ەكونوميكا مينيسترلىگىنىڭ جەردى قورعاۋ جانە پايدالانۋ باسقارماسىنىڭ باستىعى سارسەنوۆ سامات شىمىربەكۇلىنىڭ ءوزى سولاي دەگەن-ءدى (مىنا سىلتەمەدەن قاراڭىز: http://www.31.kz/video/show/id/4793/ «بۇلار باسىپ الۋدى 2007 جىلى باستاسا، باس جوسپارى ەلدىمەكەننىڭ وتكەن جىلى عانا ءبىتتى. مىنانداي باسىپ العان قۇقىعى جوق جەرلەرگە لەگاليزاتسيا بولۋى قازىرگى سايكەس مۇمكىن ەمەس») .

گۇلبانۋ انياتقىزىمەن اڭگىمەمىز وسىلاي اياقتالدى.  ارينە، قانداي دا ءبىر ماسەلەگە بايلانىستى سان قيلى كوزقاراس، پىكىر ءوربىپ جاتۋى مۇمكىن. جۋرناليستەر ءبىرى جازباعاندى ءبىرى بايقاپ قالىپ جاريا ەتەتىنى دە بۇرىننان بار ءۇردىس. بىراق جاۋداي وشىگىپ، «سەنىڭ  اقپاراتىڭنىڭ جالعان ەكەندىگىن جالپاق جۇرتقا جاريا ەتەمىز» دەيتىن ەڭكىش ءتاسىل بۇرىنعى-سوڭعى جۋرناليستەردىڭ ەشقايسىسىندا بولماعان ەدى. ءيا، ايتپاقشى، گۇلبانۋ انياتقىزى مەن «31-ارنا» وتىرىك ايتتى ما؟ جوق جەردەن سەنساتسيا تۋدىرىپ، ەل ءىشىن الا تايداي ءبۇلدىردى مە؟ ءتىلشى مەن تەلەارنا بار بولعانى قوياندىداعى ماسەلەنى جاريا ەتتى، ءسويتىپ وزدەرىنىڭ كاسىبي قىزمەتتەرىن عانا اتقاردى عوي. ال، مىنە، اقىرىندا ءسۇيىنشى حابار الىپ وتىرمىز: قوياندىدا ەشقانداي ءۇي بۇزىلىپ-قيرامايدى. قۇجاتتالماعان باسپانالار جەكەشەلەندىرۋدىڭ ءۇشىنشى ساتىسى ارقىلى راسىمدەلىپ، ماسەلە شەشىمىن تاپپاق.

P.S. الەۋمەتتىك جەلىلەردى اقتارىپ وتىرىپ ازامات بيتاننىڭ مىنانداي جازباسىنا جولىقتىق. جولىقتىقتا ونى قوياندىعا قاتىستى جايتتىڭ تاعى ءبىر قىرىن كورسەتۋگە ۇمتىلعان شاعىن حابارلاما عوي دەپ قابىلدادىق.

«بۇلار وزدەرى بەينەكامەراعا باسقانى تۇسىرگەندى ۇناتسا دا وزدەرىن تۇسىرگەندى ونشا ۇناتا قويمايدى ەكەن، رەنجيدى ەكەن، قۇقىقشىل ەكەن قوياندىدا قازاقتاردى شىرىلداتىپ جاتقان سياقتى كورسەتۋىمەن بۇكىل ەلدىڭ زارەسىن ۇشىرعان 31-ارنانىڭ ءجۋرناليستى گۇلبانۋ انياتقىزى نەگە جالعان اقپار بەرەسىز دەگەن ساۋالىما بىلاي دەدى: "11 ءۇي سۇرىلگەنىن قوياندى اۋلىنىڭ تۇرعىندارى ايتتى. 11 ىرگەتاس ەكەنىن كەيىن ءبىلدىم".

ال، وسىنداي سىلتاۋعا نە دەيمىز؟! ءوزى سوندا بارىپ كورگەن ادام. سويتە تۇرا بۇزىلعان 1 ءۇيدى دە كورسەتكەن جوق.

ر.S. بۇل ارنادان بۇگىن كەشكە قۋانىشتى حابار ەستيتىن بولدىڭىزدار، تاعى دا بۇرمالاپ جىبەرمەسە»  

(ازامات بيتاننىڭ فەيسبۋكتەگى جازباسى).

Abai.kz