قر ۇكىمەتىنىڭ جانە مينيستر ارىستانبەك مۇحامەديۇلىنىڭ قاپەرىنە!

  وسىدان بىرەر كۇن بۇرىن (5.11.2014) گازەتتەر ۇكىمەت وتىرىسىندا الداعى جىلى بولاتىن مەرەكەلەر جايلى قاۋلى-قارار قابىلدانعانىن سۇيىنشىلەگەن ەدى.  قازاق حاندىعىنىڭ 550 جىلدىعىن مەملەكەتتىك دەڭگەيدە اتاپ وتىلمەك، سونىمەن قاتار، قازاقستان حالقى اسسامبلەياسىنىڭ 20 جىلدىعى، قازاقستان كونستيتۋتتسياسىنىڭ 20 جىلدىعى جانە ۇلى جەڭىستىڭ 70 جىلدىعى قامتىلماق. بارەكەلدى! لاكىن، بىزگە ء«اي، قاپ!» دەگىزىپ وتىرعان ءجايت - ۇلى ابايدىڭ 170 جىلدىعى مۇلدە ۇمىت قالعاندىعى. اۋ-ۋ، اباي قايدا؟! «اباي - دارا، اباي - دانا» دەپ جار سالامىز، ءىس ىستەرگە كەلگەندە تارتىنىپ، تارىلا قالاتىنىمىز قالاي؟!  

ەستۋىمشە، جەكە تۇلعالار داتاسى مەملەكەتتىك دەڭگەيدە - 170 ەمەس، 175 جىل تولسا عانا اتالادى-مىس. سولاي-اق بولسىن، بىراق ابايدىڭ اتى اباي ەمەس پە! رەنەسسانستىق دارا تۇلعامىز قاي قالىپقا، قاي قاعيداعا سىيادى؟! كەزىندە م.اۋەزوۆ: «قازاق دەگەن حالىق ابايعا بەلشەدەن قارىزدار» دەپ تالاي ەسكەرتكەنتۇعىن. 1995 جىلى ۇلى اقىننىڭ 150 جىلدىق تويىن تويلاۋ كەزىندە ەلىمىزدىڭ تۇڭعىش پرەزيدەنتى ن.نازارباەۆ: «اباي - قازاق حالقىنىڭ رۋحاني كوسەمى» دەپ اتاپ ايتقان بولاتىن. مۇنى جۇرتشىلىق قايتىپ ۇمىتسىن. 

ارينە، اڭگىمە كوپ شىعىندانىپ، ۇلان-اسىر توي ۇيىمداستىرۋ جايلى ەمەس. ماسەلە باسقادا. ەگەر اباي تويى قاتار تويلانار بولسا، جوعارىدا اتالعان تازا ساياسي مەرەكەلەر  ءمان-ماعىناسى جاعىنان تولىسىپ، رۋحاني استار تەرەڭدەمەي مە؟ «ۇلىتاۋ ۇلاعاتى» دەلىنگەن ەلباسىمىزدىڭ ورەلى ويلارى ابايدىڭ اسىل سوزدەرىمەن قامشىنىڭ ورىمىندەي قابىسا تابىسپاي ما؟ سول سياقتى ۇلى اقىنىن ارداقتاۋ، ەڭبەگىن تانىتۋ بارىسىندا بۇگىنگى قاۋىم ءوزىن تولعانتقان تالاي ماسەلەلەردىڭ جاۋابىن تابار ەدى-اۋ (ابايدى وقىماۋدىڭ، وقىسا توقىماۋدى سالدارى ايتپاساق تا بەلگىلى).  بۇدان بولەك، ابايدى تويلاۋ باسەڭدەپ قالعان ابايتانۋ عىلىمىنا سەرپىن بەرەدى. مەكتەپ قابىرعاسىندا وقىتىلا باستاعان «ابايتانۋ» ءپانى تۋرالى دا وسىنى ايتامىز.

الاش ارىسى مىرجاقىپ دۋلاتوۆ وسىدان تۋرا 100 جىل بۇرىن: «زارەدەي ءشۇبا ەتپەيمىز، ابايدىڭ ولگەن كۇنىنەن قانشا الىستاساق، رۋحىنا سونشا جاقىندارمىز. ... ء«بىرىنشى اقىنىمىز» دەپ قابىرىن حالقى ءجيى زيارات ەتەر، حالىق پەن اباي اراسى كۇشتى ماحابباتپەن جالعاسار»، - دەپ كەلەشەككە زور ۇمىتپەن قاراعانتۇعىن. اباي رۋحى حالقىنا ءوز وزىنەن جاقىندامايدى. كەمىندە بەس جىلدا ءبىر سەرپىلىس، ياكي بۇكىل حالىق بولىپ زيارات ەتۋ شارت. ايتپەسە جوق.   مىنە، 170 جىلدىقتى كەڭىنەن اتاۋ، تويلاۋ، ەڭ الدىمەن، سول ءۇشىن قاجەت. 

قورىتىپ ايتقاندا، ۇلى ابايدىڭ 170 جىلدىعىن الداعى جىلى مەملەكەتتىك دەڭگەيدە مەرەكەلەنەتىن ءىسشارالار قاتارىنا ەنگىزگەن ابزال. ۇكىمەت پەن مادەنيەت جانە سپورت مينيسترلىگىنە ءيسى الاشتىڭ، قالا بەردى، ابايسۇيەر قالىڭ قاۋىمنىڭ اتىنان وسىناۋ ءوتىنىش-تىلەكتى جەتكىزگىم كەلەدى.

اسان وماروۆ،

زەرتتەۋشى.

Abai.kz