ەلىمىزدەگى بىردە-ءبىر مۇراجاي، بىردە-ءبىر گالەرەيا، بىردە-ءبىر تەاتر جەكەشەلەندىرىلەتىن نىسانداردىڭ تىزىمىنە ەنگىزىلگەن جوق،- دەپ مالىمدەدى جۋىردا ورتالىق كوممۋنيكاتسيالار قىزمەتىندە وتكەن بريفينگتە قارجى مينيسترلىگىنىڭ مەملەكەتتىك مۇلىك جانە جەكەشەلەندىرۋ كوميتەتىنىڭ توراعاسى ەدۋارد وتەپوۆ. ونىڭ ايتۋىنشا، تابيعي مونوپوليالاردى رەتتەۋ جانە باسەكەلەستىكتى قورعاۋ كوميتەتىنىڭ جانىنان قۇرىلعان كوميسسيانىڭ شەشىمىمەن 25 مادەني مەكەمە جەكەشەلەندىرىلەتىن نىساندار تىزىمىنەن الىنىپ تاستالعان. «بۇل ماسەلەنى قۇزىرلى كوميتەتتىڭ جانىنان قۇرىلعان كوميسسيا اسا ىجداھاتتىلىقپەن قارادى. ويتكەن سەبەبى، بۇرىنعى تىزىمگە شىعارماشىلىق جانە مادەنيەت ۇيلەرى ەنگىزىلگەن بولاتىن. 31-ءشى قازانداعى وتىرىسىندا اتالعان كوميسسيا وسى ماسەلەنى ەگجەي-تەگجەيلى قاراستىرىپ، 25 نىساندى جەكەشەلەندىرۋ تىزىمىنەن سىزىپ تاستادى. دەمەك، ولار ساتۋعا شىعارىلمايدى دەگەن ءسوز. ولارعا مەملەكەتتىك-جەكەمەنشىك ارىپتەستىك اياسىندا قانداي دا كومەك بەرىلۋى مۇمكىن. بىراق بۇل ماسەلە كەيىنگە قالدىرىلدى»،- دەپ مالىمدەدى ەدۋارد وتەپوۆ.

توراعانىڭ ايتۋىنشا، قارجى مينيسترلىگى مادەنيەت جانە سپورت مينيسترلىگىمەن بىرلەسە وتىرىپ، مادەني نىسانداردى ءتيىمدى باسقارۋ سالاسىنداعى مەملەكەتتىك-جەكەمەنشىك ارىپتەستىكتىڭ حالىقارالىق تاجىريبەسىن زەرتتەۋگە كىرىسىپتى. الايدا، الەمدىك تاجىريبەدە دە بۇل باعىتتا بىرىڭعاي ساياسات جۇرگىزىلمەيتىن كورىنەدى. ء«بىز مەملەكەتتىك-جەكەمەنشىك ارىپتەستىك اياسىندا مادەني مەكەمەلەر قالاي جۇمىس ىستەيتىنىن بىلمەك بولىپ، كوپتەگەن شەتەلدىك ادەبيەتتەردى، ستاتيستيكالىق سانداردى، اقپاراتتاردى شولىپ شىقتىق. بىراق اتالعان نىسانداردى باسقارۋعا قاتىستى بىرىڭعاي ساياسات، كەڭەس دەگەن جوق ەكەن. بارلىق ەلدەردەگى ماسەلە بىرەۋ عانا: قارجىلاندىرۋدىڭ جەتكىلىكسىزدىگى. ەگەر بيۋدجەتتەن مۇنداي نىساندارعا جەتكىلىكتى دەڭگەيدە قاراجات بولىنبەسە، ارينە ولار جۇرت ويلاعانداي جوعارى دەڭگەيدە جۇمىس ىستەي المايدى. ماسەلەن، ۇندىستانداعى ءتاج-ماحال ماۆزولەيى، بەرليندەگى جەڭىس باعاناسى، كاناداداعى ۇلتتىق مۇراجايدى الايىق. بۇلاردىڭ بارلىعى مەملەكەتتىك-جەكەمەنشىك ارىپتەستىك شەڭبەرىندە جۇمىس ىستەيدى. سوندىقتان، مادەنيەت جانە سپورت مينيسترلىگى قازىر وسى ماسەلەنىڭ ۇڭعىل-شۇڭعىلىنا دەيىن ءۇڭىلىپ جاتىر. ويتكەنى، مادەني مەكەمەلەر تولىققاندى جۇمىس ىستەپ، حالىققا پايداسىن تيگىزۋى ءۇشىن مەملەكەت پەن جەكە مەنشىك سەكتوردىڭ بىرلەسكەن ءىس-ارەكەتتەرى قاجەت ەكەنى ءسوزسىز»،- دەپ قوستى ە. وتەپوۆ.

ايتپاقشى، بۇعان دەيىن الماتىداعى «قازاقفيلم» اق-ى، مەملەكەتتىك تسيرك، رەسپۋبليكا سارايى سياقتى ءىرى-ءىرى مادەني نىسانداردىڭ جەكەشەلەندىرۋگە شىعارىلۋى تۋرالى الىپ-قاشپا اڭگىمەلەردىڭ بولعانى راس. الايدا، «حابار» تەلەارناسىنان بەرىلگەن تىكەلەي كورسەتىلىم بارىسىندا قارجى ءمينيسترى باقىت سۇلتانوۆتىڭ ءوزى رەسپۋبليكا سارايىنىڭ الماتى اكىمشىلىگىنىڭ كوممۋنالدىق مەنشىگىندە ەكەنىن جانە ول جەكەشەلەندىرىلەتىن نىساندار تىزىمىنە ەنبەيتىنىن حابارلادى. «بۇل جەردە «رەسپۋبليكا سارايى» جشس-ءىنىڭ 100 پايىزدىق اكتسياسى باسەكەلەستىك ورتاعا شىعارىلادى. بۇل كاسىپورىن رەسپۋبليكا سارايىنا قىزمەت كورسەتەدى»،- دەدى مينيستر.

سونىمەن قاتار، اعىمداعى جىلدىڭ 24 قىركۇيەگىندە ورتالىق كوممۋنيكاتسيالار قىزمەتىندەگى باسقوسۋدا مادەنيەت جانە سپورت ءمينيسترى ارىستانبەك مۇحامەديۇلى «قازاقفيلم» اق-نىڭ 49 پايىز اكتسياسى جەكەشەلەندىرۋگە شىعارىلعانىن، بىراق جۇرتتىڭ كوبى جەكەشەلەندىرۋ مەن سەنىمدى باسقارۋعا بەرۋ دەگەندى شاتاستىرىپ الاتىنىن ءمالىم ەتتى. «قازاقستان ۇكىمەتى بەكىتكەن 2014-2016 جىلدارعا ارنالعان جەكەشەلەندىرۋدىڭ كەشەندى جوسپارىنا سايكەس، «قازاقفيلمنىڭ» 49 پايىز اكتسياسى جەكەشەلەندىرۋگە شىعارىلعان بولاتىن. بىراق بۇل ماسەلەنىڭ ناقتى شەشىمى 2016 جىلعا قالدىرىلدى. ويتكەنى، بۇل شاراعا مۇقيات دايىندالۋىمىز كەرەك. سونىمەن قاتار، «قازاقفيلم» ءتارىزدى مەملەكەت ءۇشىن ماڭىزى اسا زور نىسان جەكەشەلەندىرىلمەيدى، تەك سەنىمدى باسقارۋعا بەرىلەدى. قارجى مينيسترلىگىنىڭ مەملەكەتتىك مۇلىك جانە جەكەشەلەندىرۋ كوميتەتىنىڭ توراعاسى ەدۋارد وتەپوۆتىڭ ءوزى ءبىزدىڭ جولداعان حاتىمىزعا وسىنداي جاۋاپ جازدى»،- دەدى مينيستر جۋرناليستەردىڭ ساۋالىنا جاۋاپ قايىرىپ.

ءامىرلان ءالىمجان

Abai.kz