يسلام ءدىنىن قابىلداۋ وقيعاسى

كۇندەردىڭ كۇنى ول قۇراندى تولىقتاي وقىپ شىعۋعا بەل بۋادى. ماقسات –بىرەۋ. مۇسىلمانداردى حريستيان دىنىنە ناسيحاتتاۋ بارىسىندا، قۇراننىڭ قاتەلىكتەرىن ولاردىڭ بەتىنە باسۋ. ول 15 عاسىر بۇرىن جازىلعان كونە كىتاپ ىشىنەن ءشول دالا جانە سول سارىنداعى وقيعالاردى وقيمىن دەگەن ويدا بولدى. بىراق، قۇراننان الەمدەگى ەشبىر كىتاپتا جازىلماعان دۇنيەلەردى وقىعان كەزدە ابدىراپ قالدى.

سوندا دا ول ءۇمىتىن ۇزبەي، مۇحاممەد پايعامبار (س.ع.س.) جۇبايى حاديشا جانە ۇل-قىزدارىنان ايىرىلعان كەزدەگى جۇيكەسى جۇقارىپ، كۇيزەلىسكە ۇشىراعانى جايلى ءبىر جازبالار وقيمىن دەپ ويلاعان-تىن. كەرىسىنشە، تولىقتاي ء«ماريام» اتتى سۇرەنى كورگەندە قاتتى تاڭ قالدى. ءماريام اناعا دەگەن قۇرانداعى قۇرمەت باسقا كيەلى كىتاپتاردىڭ ەشقايسىسىندا جوق ەدى. ءتىپتى، ءىنجىلدىڭ وزىندە دە. ال، ايشا نەمەسە فاتيما دەگەن سۇرەلەر اتىمەن جوق. سونىمەن بىرگە، يسا (ع.س.) ەسىمى قۇراندا 25 رەت اتالىپ وتكەن. ال، مۇحاممەد (س.ع.س.) ەسىمىن قانشا ءۇڭىلىپ ىزدەگەنىمەن، بار-جوعى بەس-اق جەردەن كەزدەستىرگەن گاريدىڭ تاڭدانىسى ۇلعايا ءتۇستى.

بىراق، الدە دە بولسا، ءبىر قاتە تاۋىپ الارمىن دەگەن ويمەن قۇراندى وقۋىن توقتاتپايدى. سوندا: «ولار قۇرانعا زەر سالىپ قاراماي ما؟ ەگەر ول (قۇران) اللادان باسقا بىرەۋدىڭ تاراپىنان بولعاندا، ولار وندا كوپتەگەن قايشىلىقتار تابار ەدى[1]»،– دەگەن اياتتى وقىعاندا شالقاسىنان ءتۇستى.

دوكتور گ.ميللەر بۇل ايات جونىندە: «قازىرگى تاڭداعى عىلىم نەگىزى – تەورياسى دۇرىس بولۋ ءۇشىن ونىڭ، قاتەلەرىن انىقتاپ، ولاردى تۇزەتۋ. ال، قۇراننىڭ مۇسىلمان جانە مۇسىلمان ەمەستەرگە قۇران ىشىنەن قاتە تابۋعا شاقىرۋى – عاجايىپ قۇبىلىس. بىراق، ول قاتەنى تابۋ قايدا!»، – دەگەن ەكەن. وسىنداي ويعا توقتاعان ول: «الەمدە ەشبىر كىتاپ اۆتورى شىعارماسىن جازىپ بولعان سوڭ، ەڭبەگىمدە ەشبىر قاتە-كەمشىلىك جوق، قالاساڭدار وزدەرىڭ ىزدەپ كورىڭدەر دەپ ايتۋعا باتىلى بارماس ەدى»، – دەگەن ەكەن.

دوكتور گ.ميللەردى ەرەكشە تاڭ قالدىرعان اياتتاردىڭ ءبىرى: «اسپان مەن جەر ءبىرتۇتاس بولىپ، ءبىز ولاردى اجىراتقانىمىزدى جانە ءاربىر ءتىرى نارسەنى سۋدان جاساعانىمىزدى كۇپىرلىك ەتۋشىلەر كورمەي مە؟ ولار سوندا دا سەنبەي مە؟[2]». دوكتور: «شىن مانىندە، بۇل ايات – 1973 جىلى نوبەل سىيلىعى بەرىلگەن عىلىمي جاڭالىق – ۇلكەن جارىلىس تەورياسىنىڭ ءدال ءوزى. اياتتا قازىرگى عالام ۇلكەن جارىلىس ناتيجەسىندە پايدا بولعانىن بايانداۋدا»، – دەيدى.

اياتتىڭ سوڭعى بولىگىندە سۋ تىرشىلىك كوزى ەكەنى ايتىلادى. دوكتور گاري ميللەر: «بۇل – ەرەكشە تاڭ قالاتىن جايت. عىلىم سوڭعى جىلدارى اشقان جاڭالىقتىڭ ءبىرى، جاسۋشا 80 پايىز تسيتاپلازمادان قۇرالادى. تسيتاپلازما – سۋدىڭ نەگىزگى قۇرامى. 1400 جىل بۇرىن جازۋ-سىزۋدى بىلمەيتىن كىسى اسپاننان ءيلاھي ۋاحي كەلمەسە، قالايشا مۇنىڭ بارلىعىن ءبىلۋى مۇمكىن»، – دەگەن ەكەن.

وسىلايشا، ميللەر 1977 جىلى يسلام ءدىنىن قابىلدايدى. يسلام ءدىنى ناسيحاتشىلارىنىڭ بىرىنە اينالعان گ.ميللەر سەبەبىمەن كوپتەگەن ادامدار مۇسىلمان بولدى.