سەنبى, 20 شىلدە 2024
اكىم مەن حالىق 10812 0 پىكىر 22 قازان, 2014 ساعات 10:28

بالا ولتىرگىش اكىمنەن اراشالاڭىز!

 

قازاقستان رەسپۋبليكاسى پارلامەنتى

ءماجىلىسىنىڭ دەپۋتاتى داريعا نۇرسۇلتانقىزىنا

 

اشىق حات

 

قۇرمەتتى داريعا نۇرسۇلتانقىزى!

          مەن بوسىنوۆا ايدا بولاتقىزى جامبىل وبلىسى، شۋ اۋدانى، اقتوبە اۋىلىنىڭ تۇرعىنىمىن. كوپ بالانىڭ اناسىمىن. ءۇش ۇل، ەكى قىزىم بار. جولداسىم ەشماحانبەتوۆ نۇرحات جۇمىسسىز، مەن دە ءۇي شارۋاسىنداعى ايەلمىن.  بىراق ءوز اۋىلىمىزدا ءوز تىرشىلىگىمىزدى كەشۋدەمىز.

         مەنىڭ سىزگە وسى اشىق حاتتى جازۋ سەبەبىم، اۋىلىمىزدىڭ اكىمى بايداۋلەتوۆ باعلان مەنىڭ جولداسىممەن وشتەسكەندىگىنە ءبىراز ۋاقىت ءوتتى. سول مەنىڭ جولداسىما دەگەن وشپەندىگىنىڭ، ارازداسۋىنىڭ سالدارىنان بىزگە دە كەسىرى ءتيىپ جاتىر. اتاپ ايتقاندا اكىم ب.بايداۋلەتوۆ ۇيگە كەلىپ: "كۇيەۋىڭدى تۇرمەدە شىرىتەمىن" دەپ، بالاعاتتاپ، ار-نامىسىمدى قورلايتىن سوزدەر ايتىپ، مەنى دە قورقىتتى. التىنشى بالاما جۇكتى ەدىم، التى اپتادا ءتىرى بولعان بالام سونىڭ كەسىرىنەن سەگىز اپتادا ءولىپ قالدى.

       وسى ىشتەگى التىنشى بالامدى امان-ەسەن بوسانىپ،  ەلباسى ن.ءا.نازارباەۆتىڭ جارلىعىمەن "كۇمىس القا" الامىن با دەپ ۇمىتتەنىپ وتىرعاندا، وسىنداي جاعدايعا ۇشىرادىق. وسى جاعدايدى شۋ اۋدانى اكىمى ب.نۇركەنوۆكە دە كىرىپ ايتىپ ەدىم، بىراق اۋىل اكىمى ب.بايداۋلەتوۆتىڭ ءسوزىن سويلەپ ماعان تۇششىمدى جاۋاپ تا بەرمەدى. اۋدان اكىمى وسى ءىس بويىنشا كوميسسيا قۇرىپ قاراعانداي بولدى، بىراق، سول كوميسسيا مۇشەلەرىنىڭ بارلىعى دا اكىم ب.بايداۋلەتوۆتىڭ ءسوزىن سويلەپ، مەنىڭ ارىزىمدى تەك ءبىر جاقتى قارادى. سويتسەم شۋ اۋدانى اكىمى جانىنان قۇرىلعان كوميسسياعا مەنىڭ جەكە ءومىرىم، بولاشاق ومىرگە كەلەتىن بالانىڭ تاعدىرى، جالپى ادام تاعدىرى قاجەت ەمەس ەكەن. ولارعا تەك وزدەرىنىڭ سىبايلاسى بولعان، ناعىز زۇلىم ب.بايداۋلەتوۆتىڭ قىلمىستارىن جاۋىپ، ادام ولتىرگىش اكىمدى اقتاۋ عانا ەكەن. تىپتەن وسى جاعدايمەن مەن شۋ اۋدانارالىق پروكۋراتۋراعا دا ارىزداندىم، بىراق ولار دا اكىمنىڭ ءسوزىن سويلەدى. سوندا ءبىز سەكىلدى قورعانسىز قارا حالىقتىڭ ءسوزىن كىم سويلەيدى، مۇڭىن كىم مۇڭدايدى؟! اتا زاڭىمىزدا اتالعان ەڭ باستى بايلىعىمىز – ادام ءومىرىنىڭ قۇنى بولماعانى ما سوندا؟

       تىپتەن مەنىڭ ب.بايداۋلەتوۆتىڭ ۇستىنەن اۋدان اكىمدىگىنە جازعان ارىزىمنان كەيىن ،  ب.بايداۋلەتوۆ ءبىزدىڭ ۇيگە تاعى دا كەلىپ: «بالاڭمەن بىرگە ەندى ءوزىڭدى دە ولتىرەمىن، مەنىڭ كىم ەكەنىمدى بىلمەيدى ەكەنسىڭدەر، مەنىڭ ءسوزىمدى اۋدان، وبلىس، تىپتەن رەسپۋبليكاعا دەيىن سويلەيدى، ماعان ەشكىم ەشتەڭە ىستەي المايدى. ءبارىن اقشامەن ساتىپ العانمىن» دەپ، كۇندە اڭديتىنى ءبىز بولدى. ءبىزدىڭ كۇن كورۋىمىزدىڭ ءوزى مۇڭ بولدى، تىپتەن اۋىلدا تۇرادى دەگەن انىقتامانىڭ ءوزىن بەرمەي وتىر اكىم. ءتىپتى ەلباسىنىڭ سوزدەرىن ايتساق تا ەشتەڭەدەن تايسالار ەمەس، ەلباسى تاپسىرمالارىن قۇلاعىنا دا ىلەر ەمەس.

       ەلباسىمىزدىڭ ساياساتى اۋىلدى گۇلدەندىرۋ، كوركەيتۋ، اۋىل حالقىنىڭ جاعدايىن بارىنشا جاساۋ، ال اۋىل اكىمى ب.بايداۋلەتوۆتىڭ كوزدەگەنى ەلباسىمىزدىڭ وسى ساياساتىنا قارسى كەلىپ، تەك كوزدەگەنى ءوز پايداسى، جەكە قامى. اۋىل اكىمى ب.بايداۋلەتوۆ مەن سەكىلدى قانشاما اۋىل حالقىنىڭ كوز جاسىنا قالىپ وتىر، قولاستىندا جۇمىس ىستەيتىن جەتىم-جەسىرلەردىڭ وزىنەن اقشا تالاپ ەتىپ جۇمىستان قۋعاندىعىنا قانشا اۋىل حالقى كۋا. ب.بايداۋلەتوۆتىڭ سۇراعان اقشاسىن دەر كەزىندە تاۋىپ بەرە الماعان قاراماعىنداعىلاردىڭ  قالاي جۇمىستان قۋعىندالىپ، اقىرى جۇمىستان كەتكەنىنە اۋىل كۋا. ونداي مىسالدار كوپ، بىراق مەن ءوز باسىمداعى جاعدايدى عانا بايانداپ وتىرمىن.

            قۇرمەتتى داريعا نۇرسۇلتانقىزى! قازاق حالقىنىڭ دەنى اۋىلدا تۇرادى، قازاقىلىعىمىزدىڭ قايماعى دا اۋىلدا ساقتالعان.  ال، ءوز ءىسىن پارا ارقىلى ءبىتىرىپ، جەمقورلىق جولمەن عانا قىلمىسىن جاباتىن، مەملەكەتتىك ساياساتتى ءتىپتى تۇسىنبەيتىن، ءتىپتى ءوز اتى-ءجونىن جازا بىلمەيتىن، اسقان ساۋاتسىز، ءوزى زالىم ب.بايداۋلەتوۆ سەكىلدىلەردىڭ اۋىل حالقىن باسقارۋى ەلباسىمىزدىڭ ساياساتىنا  قارامى-قايشى بولىپ تۇرعاندىعىن بۇكىل ەل ءتۇسىنىپ وتىر. بىراق اكىم ب.بايداۋلەتوۆ ايتقانداي: ء«بارىن ساتىپ العاننان سوڭ» ەشتەڭەنى دە دالەلدەي المايدى ەكەنسىڭ.

        وتكەن جىلى ب.بايداۋلەتوۆتىڭ قالاي زاڭسىز جولمەن سايلانعاندىعىن، ونى شۋ اۋدانى باسشىلىعىنىڭ قانداي جولمەن «سايلاعاندىعىنا» كۋا بولىپ ەدىك. ەندى مىنە...

         مەن سىزدەن جۇمىس سۇرامايمىن، باسقا دا الەۋمەتتىك كومەك تە سۇرامايمىن، تەك سۇرارىم ابدەن جۇگەنسىز كەتكەن، ءسوزىن اۋدان، وبلىس سويلەپ وتىرعان اۋىل اكىمى ب.بايداۋلەتوۆتەن اراشا بولۋىڭىزدى سۇرايمىن.

      وسى اشىق حاتقا قوسىمشا جوعارىدا ارىزدا ايتىپ وتكەن ىشتەگى بالامنىڭ التى اپتادا ءتىرى بولعاندىعى، جانە اۋىل اكىمىنىڭ مەنى ادەيى كەلىپ قورقىتقاننان كەيىن ولگەندىگى تۋرالى مەديتسينالىق انىقتامالارىمدى تىركەدىم.

        قۇرمەتتى داريعا نۇرسۇلتانقىزى!

       مەنىڭ جانايقايىمدى ءوزىڭىز سەكىلدى ەلگە جاناشىر باسشىلار عانا ءتۇسىنىپ، ءتيىستى ناتيجە شىعاتىندىعىنا، جۇگەنسىز كەتكەن باسشىلاردىڭ قىلمىستارىنا توسقاۋىل بولاتىندىعىڭىزعا سەنىمىم كامىل.

Abai.kz

0 پىكىر

ۇزدىك ماتەريالدار

اباي مۇراسى

اباي ىلىمىندەگى ءومىر ماقساتى نە؟

دوسىم وماروۆ 1305
وي تۇرتكى

المەرەك ابىزدىڭ ورالۋى - ەلگە ءدىننىڭ ورالۋى

باقتىباي اينابەكوۆ 2047
كورشىنىڭ كولەڭكەسى

رەسەي تىلدىك ءھام ساياسي ەكسپانسيانى قالاي جۇرگىزدى؟

بەيسەنعازى ۇلىقبەك 2090