31 قازان مەن 3 قاراشا ارالىعىندا فرانتسيا استاناسى پاريج قالاسىندا استانا كۇندەرى وتەدى. ەلوردالىق دەلەگاتسيا جۇمىس ساپارى اياسىندا فرانتسۋز ارىپتەستەرىنىڭ ءبىلىم، مادەنيەت، قالا قۇرىلىسى جانە ت.ب. سالالارداعى تاجىريبەسىن زەرتتەيدى.

استانا قالاسى اكىمى اپپاراتى ءباسپاسوز قىزمەتىنىڭ حابارلاۋىنشا، استانا كۇنى اياسىندا دوڭگەلەك ۇستەلدەر وتكىزۋ، مادەنيەت پەن ءبىلىم بەرۋ نىساندارىن ارالاۋ، جەرگىلىكتى زاڭ شىعارۋ كەڭەسىنىڭ دەپۋتارتتارىمەن كەزدەسۋ كوزدەلگەن، سونىمەن قاتار، كوشپەلىلەردىڭ مادەنيەتىمەن جانە تۇرمىسىمەن تانىستىرۋ ماقساتىندا «قازاق اۋىلى» ەكسپوزيتسياسى ۇيىمداستىرىلادى.

پاريجدەگى استانا كۇنى 2 قاراشادا «وپەرا باستيليا» تەاترىندا ونەر شەبەرلەرىنىڭ «ازيا داۋىسى» اتتى گالا-كونتسەرتىمەن اياقتالادى.

كونتسەرتتىك باعدارلاما ەكى بولىمنەن تۇرادى. «استانا وپەرا» تەاترىنىڭ جەتەكشى ءسوليستى جۇپار عابدۋللينا كەش كوركىن كەلتىرەدى، سونداي-اق، دەنيس ماتسۋەۆ، يلدار ابدىرازاقوۆ، الان بورىباەۆ، ەرجان قۇلىباەۆ، البەرتو گازالە جانە «استانا وپەرا» سيمفونيالىق وركەسترى مەن حور شاقىرىلدى.

ءبىرىنشى بولىمدە كورەرمەندەرگە دەنيس ماتسۋەۆتىڭ قاتىسۋىمەن فورتەپيانوعا ارنالعان كونتسەرت ۇسىنىلادى. سونىمەن قاتار، ە. راحماديەۆتىڭ «قۇداشا دۋمان»، ن. مەڭدىعاليەۆتىڭ «دومبىرا تۋرالى اڭىز» سيمفونيالىق كۇيلەرى ورىندالادى. ديريجەرى -«استانا وپەرا» تەاترىنىڭ مۋزىكالىق جەتەكشىسى ابزال مۋحيتدينوۆ.

ەكىنشى بولىمدە كورەرمەندەر دج. ۆەرديدىڭ «اتتيلا» وپەراسىنىڭ كونتسەرتتىك نۇسقاسىن تاماشالايدى. الەمدەگى ەڭ ۇزدىك باس يەسى يلدار ابدىرازاقوۆ باستى پارتيانى، ودابەللانى جۇپار عابدۋللينا ورىندايدى. ديريجەرى - الەمگە ايگىلى الان بورىباەۆ.

ايتا كەتەيىك، پاريج تەاترىندا تەك «وپەرى باستيليا» ۇجىمى عانا ونەر كورسەتەدى، مۇندا باسقا تەاترلارمەن بىرلەسكەن قويىلىمدار وتە سيرەك قويىلادى. تەاتر ديرەكتسياسىنىڭ اتاپ وتۋىنشە، تاريحتا العاش رەت شەتەلدىك ترۋپپا «وپەرى باستيليا» ساحناسىندا پاريج ترۋپپاسىنان بولەك ونەر كورسەتپەك. استانا ارتىستەرى ءۇشىن بۇل ۇلكەن قۇرمەت پەن جاۋاپكەرشىلىك، سونداي-اق، قازاقستان مەن استانا تۋرالى الەمنىڭ ەڭ ۇزدىك ساحنالارىنىڭ بىرىنەن ءمالىم ەتۋ مۇمكىندىگى.

اباي-اقپارات