قىزىلوردا جۇرتشىلىعى بۇل كۇندەرى ۇلت ازاتتىق قوزعالىسىنىڭ قولباسشىسى، حالىق باتىرى جانقوجا نۇرمۇحامەدۇلىنىڭ 240 جىلدىعىن كەڭ كولەمدە اتاپ وتۋدە.

بۇگىن قىزىلوردا تەمىرجول ۆوكزالى الاڭىندا ۇلت ازاتتىق جولىنداعى كۇرەستiڭ قاس باتىرى جانقوجا نۇرمۇحامەدۇلىنىڭ ەسكەرتكىشى اشىلدى. سالتاناتتى شارادا ءسوز العان وبلىس اكىمى قىرىمبەك كوشەرباەۆ، جينالعان قالىڭ كوپشىلىكتى قۋانىشتارىمەن قۇتتىقتادى. - ەلباسىمىز نۇرسۇلتان نازارباەۆ، وتانىمىزدىڭ قاسيەتتى بايتاق دالاسىن دۇشپاننان قورعاعان باتىر بابالارىمىزدى ۇلىقتاپ، لايىقتى قۇرمەت كورسەتۋ ءبىزدىڭ پەرزەنتتىك پارىزىمىز دەگەن بولاتىن. بۇگىن مىنە، حالقىمىزدىڭ تۇتاستىعى مەن ەلىمىزدىڭ بىرلىگىن ويلاعان ۇلت ازاتتىق كوتەرىلىستىڭ باس قولباسشىلارىنىڭ ءبىرى، سىر بويىنان شىققان قاس باتىر جانقوجا نۇرمۇحامەدۇلىنا ارناپ وبلىس ورتالىعىندا باتىردىڭ ءزاۋلىم ەسكەرتكىشىن ورناتىپ وتىرمىز. بۇل ەسكەرتكىشتىڭ قىزىلوردانىڭ كوركىنە كورىك قوسىپ، جاستارىمىزدىڭ بويىنا پاتريوتتىق سەزىم بەرەتىن رۋحاني ورىنعا اينالاتىنىنا سەنەمىز. كەلەشەكتە ساربازدار وسى جەردە وتان الدىندا انت بەرەتىن، اسكەري لاۋازىم العاندار مەن وقۋ بىتىرۋشىلەرگە كۋالىك تاپسىراتىن، اسكەري بورىشىن وتەۋگە اتتاناتىن جاس ورەندەرگە اق جول تىلەيتىن، جاس جۇبايلاردىڭ گۇل شوعىن قوياتىن كيەلى جەر بولعانىن قالايمىز، - دەدى وبلىس اكىمى قۇتتىقتاۋ سوزىندە.

سالتاناتتى شارادا مەملەكەت جانە قوعام قايراتكەرى ۇزاقباي قارامانۇلى، رەسپۋبليكالىق ارداگەرلەر كەڭەسىنىڭ توراعاسى ومىرزاق وزعانباەۆ ەسكەرتكىشتىڭ اشىلۋىمەن قۇتتىقتاپ، جانقوجا باتىردىڭ ەرلىگى مەن ءور رۋحى جايىندا بەينەفيلم ءتۇسىرۋدى ۇسىندى.

ەسكەرتكىشتىڭ اشىلۋ ءراسىمى ستۋدەنتتەر سارايىندا «ۇلت ازاتتىعى قوزعالىسى جانە جانقوجا باتىر» اتتى عىلىمي-تاجىريبەلىك كونفەرەنتسيامەن جالعاستى. بەلگىلى عالىمدار، ادەبيەتشىلەر مەن تاريحشىلار قاتىسقان جيىندا باتىر بەينەسى جان-جاقتى ءسوز بولىپ، تىڭ دەرەكتەر ايتىلدى.
كونفەرەنتسيا قاتىسۋشىلارى جانقوجا نۇرمۇحامەدۇلىنداي دارا تۇلعالاردىڭ ۇلت تاريحىنان لايىقتى ورىن الۋى، ولاردىڭ قاسيەتتى ەسىمدەرىنىڭ قايتا جاڭعىرۋى ەلباسىمىز – ۇلت كوشباسشىسى ن.ءا.نازارباەۆتىڭ «ماڭگىلىك ەل» ۇلتتىق يدەياسىنىڭ مازمۇنىمەن ۇيلەسەتىنى تۋرالى وي قورىتتى.

ايتا كەتەيىك، بۇل مەرەيتوي قازالى اۋدانىندا ءوز جالعاسىن تابادى. اتاۋلى كۇنى اۋىل تۇرعىندارى ءۇشىن باسقا دا مەرەكەلىك شارالار، ايماقتىق جاس اقىندار ءمۇشايراسى، كونتسەرتتىك باعدارلاما، تەاترلاندىرىلعان كورىنىس، جىراۋلار فەستيۆالى، رەسپۋبليكالىق اقىندار ايتىسى، پالۋاندار كۇرەسى، بايگە وتكىزىلەدى.

اباي-اقپارات