دۇيسەنبى, 18 قازان 2021
قوعام 5880 0 پىكىر 24 قىركۇيەك, 2014 ساعات 20:10

ەلباسى كەڭەسشىسى كەمەلدى زاڭعا ءۇن قوسپاق

Mukhtar Kul-Mukhammed

اۋىت مۇقيبەك ورالمانداردىڭ داتىن اقورداعا تاعى جەتكىزدى. ول  18 تامىز كۇنى شەتەلدەگى قانداستارىمىزدىڭ ماسەلەسىنە بايلانىستى پرەزيدەنت كەڭسەسىنىڭ باستىعى ماحمۇت قاسىمبەكوۆتىڭ قابىلداۋىندا بولىپ، وزگەرتۋلەر مەن تولىقتىرۋلار ەنگىزىلگەلى جاتقان كوشى-قون زاڭىنا قاتىستى ۇسىنىستارىن جەتكىزسە، 19 تامىزدا اقورداداعى پرەزيدەنت كەڭسەسىنە  قر پرەزيدەنتى اكىمشىلىگىنىڭ باسشىسى نۇرلان نىعماتۋلليننىڭ اتىنا جازىلعان ەكى ۇسىنىس حات دايىنداپ اپارىپ تاپسىرعان بولاتىن. ورالماندار ماسەلەسىن ءجيى كوتەرىپ، قانداستار ماسەلەسىن بيلىكتىڭ ەسىنە ۇمىتتىرماي سالىپ جۇرگەن اۋىت مۇقيبەك پارلامەنت ءماجىلىسىنىڭ دەپۋتاتى نۇرتاي سابيليانوۆ مىرزانىڭ دا كەشە قابىلداۋىندا بولعانىن  جازعان ەدى. اقىننىڭ Facebook-تەگى جازباسىنان دەپۋتات نۇرتاي ساليحۇلىنىڭ «ەلباسىعا ءسوز كەلتىرمەيتىن، كەمەلدى زاڭ جوباسىن قابىلداۋعا قۇلشىنىپ وتىرعانىن» بايقاعان بولاتىنبىز. اۋىت مۇقيبەك بۇگىن پرەزيدەنت كەڭەسشىسى مۇحتار قۇل-مۇحاممەد مىرزاعا دا قانداستارىمىزدىڭ ماسەلەسىن جەتكىزە باردى. بۇل تۋرالى ول Facebook پاراقشاسىندا:

«بۇگىن ساعات 16;00-دە اقوردادا قازاقستان رەسپۋبليكاسى پرەزيدەنتىنىڭ كەڭەسشىسى مۇحتار قۇل-مۇحاممەد مىرزانىڭ قابىلداۋىندا بولدىم. مۇحتار ابرارۇلى مەنى ەلباسى تاپسىرماسى بويىنشا قابىلداعانىن ايتا كەلىپ، الدا قابىلداناتىن كوشى-قون زاڭى جونىندە ءوز ويلارىن، جۇمىس بارىسىن اڭگىمەلەپ بەردى. 
ارعى بەتتە تۋعان، ۇلكەن كىسىلەردەن قازاقتىڭ ارعى-بەرگى تاريحىن قۇلاعىنا قارشادايىنان قۇيىپ وسكەن، بەرتىن كەلە زاڭ عىلىمىنان دوقتورلىق قورعاعان، اسا جاۋاپتى قىزمەتتەردى ابىرويمەن اتقارعان تۇلعاعا شەتتەگى قانداستار، كوشى-قون جانە ونىڭ ماڭىزى تۋرالى ءتۇسىندىرىپ وتىرۋ ماعان ىڭعايسىز، ارينە. دەسەدە، ءسوز ورايى كەلگەندە، ايتۋعا ءتيىستى ماسەلەلەردى ىرىكبەي ايتتىم، ءوز تىلەكتەرىم مەن ۇسىنىستارىمدى جازباشا تۇردە جەتكىزدىم. اتالمىش زاڭ جوباسىنىڭ مۇلتىكسىز قابىلدانۋىنا ىقپال ەتۋىن بارىنشا ءوتىندىم. 
ءسوز سوڭىندا بار ۇسىنىسىڭدى ەلباسىعا جەتكىزەم دەدى مۇحتار ابرارۇلى
»، – دەپ جازدى. جازبا اۆتورى قىتايدىڭ “قىزىل سپراۆكاسىنىڭ” ءبىر دانا كوشىرمەسىن، قىتاي كوشى-قون زاڭى مەن ازاماتتىقتان شىعارۋ ءتارتىبىن دە پرەزيدەنت كەڭەسشىسىنە جەتكىزگەن.  قىتايدىڭ ازاماتتىقتان شىعارۋ ءتارتىبى مەن قازاقستاننىڭ ازاماتتىققا قابىلداۋ ءتارتىبى ءبىر-بىرىنە كەرەعار ەكەنى ۇنەمى جازىلىپ كەلەدى.




 

 بيىل ءساۋىر ايىندا مينيستر تامارا دۇيسەنوۆا شەتەلدەن كەلگەن قانداستارعا جاعداي جاسالاتىنىن، ولارعا ءبىر جىلدىڭ ىشىندە ازاماتتىق بەرۋ ماسەلەسى قولعا الىناتىن مالىمدەگەن ەدى. الايدا اتالعان زاڭ ءالى بەكىتىلگەن جوق. ەلباسى نازارباەۆ تا تامىزدىڭ 6-سىنداعى ۇكىمەتتىڭ كەڭەيتىلگەن وتىرىسىندا «ورالماندارعا جاعداي جاسالۋى كەرەك» دەگەن بولاتىن. اقىن اۋىت مۇقيبەك اقورداعا ءجيى باس سۇقسا، قازاق ءتىلدى سايتتاردا قالىسپاي شەتەلدەگى قانداستارىمىزدىڭ ەلگە تەزىرەك ورالۋ مەن ازاماتتىققا قابىلدانۋ جايىن ۇزبەي قوڭىراۋلاتىپ كەلەدى. قازاق كوبەيمەي قازاقتىڭ ماسەلەسى شەشىلمەيتىنىن بيلىك بارىمىزدەن جاقسى بىلەدى دەپ سەنەمىز.

نۇرعالي نۇرتاي

Abai.kz

0 پىكىر