جۇما, 7 قازان 2022
بيلىك 3068 0 پىكىر 17 قىركۇيەك, 2015 ساعات 02:00

وقو: فۋتبولشىلاردىڭ جالاقىسى تولەندى

سوڭعى كەزدەرى «ورداباسى» كومانداسىنىڭ ويىنى جانكۇيەرلەرگە ۇناماي ءجۇر. فۋتبولشىلاردىڭ قيمىلىنان سىلبىرلىق، سۇلەسوقتىق بايقالادى. بۇعان كلۋب ساپىنداعى اۋىس-تۇيىستەر عانا ەمەس، فۋتبولشىلاردىڭ ەكى ايدام استام ۋاقىت بويى جالاقى الماۋى دا ءبىر سەبەپ. ارينە، ۋاقتىلى اقشاسىن الماعان فۋتبولشى جاسىل الاڭدا بارىنشا جىگەرلەنىپ وينايدى دەگەنگە سەنۋ قيىن. دەگەنمەن، تاياۋ كۇندەرى بۇل ماسەلە شەشىمىن تاباتىن بولدى. ماسەلەگە وبلىس اكىمى بەيبىت اتامقۇلوۆتىڭ ءوزى نۇكتە قويدى. ءوڭىر باسشىسى وسى سالاعا جاۋاپتى تۇلعالارعا فۋتبولشىلاردىڭ جالاقىسىن تەز ارادا تولەۋ تۋرالى تاپسىرما بەردى. ءبىز وسىعان وراي «ورداباسى» كومانداسىنىڭ باس باپكەرى باقتيار بايسەيىتوۆتى اڭگىمەگە تارتتىق.

– وبلىس اكىمىمەن جۇزدەستىك. ول كىسى بۇل ماسەلەنىڭ شەشىلەتىنىن ايتتى. فۋتبولشىلارعا ءمان-جايدى ءتۇسىندىرىپ، جالاقى قارىزدارى تولىق وتەلەتىنىن جەتكىزدىم. جوعارى دەڭگەيدە ويناۋى ءۇشىن فۋتبولشىلارعا ءجيى نازار اۋدارىپ، جاعدايلارىن جاساۋ كەرەك. شاكىرتتەرىم قازىر «ەرتىسكە» قارسى كەزدەسۋگە قىزۋ دايىندالۋدا. كوڭىل-كۇيلەرى جاقسى. العاشقى التىلىقتا باسەكەلەستىك وتە جوعارى. ءبىز ەڭ كەمى دەگەندە ءتورتىنشى ورىن الۋعا كۇش سالامىز. ارينە، «ەرتىس» تە، «اتىراۋ» دا مىقتى. دەگەنمەن، ەۋروپا ليگاسىنا جولداما الامىز دەگەن ويدامىن. جانكۇيەرلەردەن ۇلكەن قولداۋ كۇتەمىن. شىن جاناشىر كومانداسى قيىن جاعدايدا قالعان كەزدە دە قولداۋىن ايامايدى. ال، سپورتشىلارعا دورەكى سويلەپ، جەڭسە ماقتاپ، جەڭىلسە اۋىر سوزدەرمەن داتتايتىنداردى ناعىز جانكۇيەر دەي المايمىن. سوندىقتان، وبلىسىمىزداعى «ورداباسىنىڭ» جانكۇيەرلەرىن «ەرتىسپەن» بولاتىن كەزدەسۋگە قولداۋ كورسەتۋگە شاقىرامىن، – دەيدى ول.

باس باپكەر جەرگىلىكتى قازاق جاستارىن نەگىزگى قۇرامعا كوبىرەك شاقىرۋ ماسەلەسى نازارىندا بولاتىنىن دا ايتتى.

– «ورداباسىنىڭ» قوسالقى قۇرامىنداعى 7-8 جاس جىگىتتىڭ اياق الىسىن قاداعالاپ ءجۇرمىن. ماعان داۋرەن قايقىباسوۆتىڭ ويىنى ۇنادى. ول قوسالقى قۇرامدا ءجيى گول سوعىپ ءجۇر. وسى جىگىتتى الداعى كەزدەسۋلەردىڭ بىرىندە نەگىزگى قۇرامعا شىعارۋىم مۇمكىن. مەن فۋتبولشىلاردى ەندى تولىق تانىپ-ءبىلىپ جاتىرمىن. مىقتى شابۋىلشىلار جوق. تاجىمبەتوۆ تە، گەينريح تە، تولەبەك تە دەنساۋلىق جاعدايلارىنا بايلانىستى كومەكتەسە المادى. وتكەندە، قوس قاقپاشى سيدەلنيكوۆ پەن بويچەنكونىڭ قابىلەتىن انىق بىلمەگەندىكتەن قاتەلىككە ۇرىندىق. بۇل ەكى فۋتبولشىنى دا ۇلتتىق قۇراما ساپىندا الىپ كەتىپتى. بىراق، كومانداعا كەيىن كەلدىم دەپ قول قۋسىرىپ وتىرۋعا بولمايدى. ويىن جۇيەسىنە وزگەرىس ەنگىزىپ، جىلدام پاستارعا نەگىزدەلگەن شابۋىلداۋشى فۋتبولدى ۇسىنعىم كەلەدى. ماۋسىم سوڭىنا دەيىن قولدا بار فۋتبولشىلاردى پايدالانامىز. مىقتىلارىمەن عانا كەلىسىمشارتتى ۇزارتامىز. مەن بۇرىن «مەليوراتور» كومانداسىن جوعارى ليگاعا شىعارا الماي كەتتىم. مۇمكىندىگىمىز بار ەدى. ءتۇرلى كەدەرگىلەردىڭ سالدارىنان ول تىلەك ورىندالمادى. شىمكەنتكە، تۋعان جەرگە ورالۋىمداعى باستى ماقساتىم – «ورداباسىنى» جۇلدەگە ىلىكتىرۋ. مىقتى كوماندا جاساقتاپ، ۋەفا-نىڭ توپتىق تۋرنيرلەرىنە جولداما الۋ، – دەيدى باقتيار بايسەيىتوۆ.

11 قىركۇيەكتە «ورداباسى» كومانداسى ءوز الاڭىندا ەلوردالىق «استانا» كومانداسىنان 2:3 ەسەبىمەن جەڭىلدى. شىندىعىن ايتۋ كەرەك، الاڭ يەلەرى ءتاپ-ءتاۋىر وينادى. ءتىپتى، جەڭىسكە جاقىنداۋ بولعان. بىراق، سوڭعى سەكۋندتا گول جىبەرىپ، ۇپايدان ايىرىلىپ قالدى. دەگەنمەن، فۋتبولشىلاردا جەڭىسكە، گول سالۋعا دەگەن قۇلشىنىس بار. ەڭ باستىسى، وبلىس باسشىلىعى مەن جانكۇيەرلەرى كوماندانىڭ جەڭىسكە جەتۋىنە مۇددەلى. «ورداباسى» 20-قىركۇيەكتە ءوز الاڭىندا پاۆلوداردىڭ «ەرتىس» كومانداسىن قابىلدايدى.

Abai.kz

0 پىكىر