300 جىل تۋرالى بىلەتىنىمىز از، بىراق وسىدان 100 جىل بۇرىنعى الاش ارداقتىلارىنىڭ، كۇللى الاش جۇرتىنىڭ ساياسي مادەنيەتى قازىرگىدەن ءبىر سۇيەم جوعارى ەدى. باسقاسىن ايتپاعاندا، ءبىر عانا وقيعانى مىسالعا الۋعا بولادى. ول 1917 جىلدىڭ جەلتوقسان ايىندا وتكەن مۇقىم قازاقتىڭ ءىى سەزى. 

بۇل سەزد وتكەلەكتەن ءوتىپ، قاعازعا جازىلعان ستسەناريدەن اۋىتقىماي سويلەيتىن كۇن ساۋلەلى سەزد ەمەس. ول 1917 جىلدىڭ ساۋىرىنەن باستاپ اۋىلدىق، ودان سوڭ بولىستىق، ودان كەيىن ۋەزدىك ءھام وبلىستىق سەزدەردە تالقىلانعان، ابدەن تولعاعى جەتكەن جالپىۇلتتىق ماسەلەلەردى ورتاعا سالعان شىن جيىن. ەشقانداي «پوكازۋحاسىز» كەڭەس.
سەزگە ءار ۋەز، ءار وبلىستان تەڭدەي جيىلعان وكىل كەلگەن، پروپورتسيونالدى بالانس تولىق ساقتالعان. وبلىستان تىسقارى شاقىرىلعاندار جانە بار. بۇل ساياسي مادەنيەت ەمەس پە؟ 
حان تۇقىمى تورە، باتىردىڭ ۇرپاعى، رۋلى ەلدىڭ بەتكە ۇستار اقساقالى دەمەي، ءبارى ءبىر ازاماتتىق داۋىسقا يە. بۇل دەموكراتيانىڭ كورىنىسى ەمەس پە؟
تالقىلاناتىن ماسەلەلەر داۋىسقا ءتۇسىپ، سەكتسيالارعا ءبولىنىپ جاتسا، بايانداماشىلار سوزىنەن سوڭ دۋ قول شاپالاق ەمەس، قىپ-قىزىل پرەنيا ءجۇرىپ جاتسا، ول ءسوز بوستاندىعى، پىكىر ەركىندىگى ەمەس پە؟
الاشوردا توراعالىعىنا ءا.بوكەيحان، ب.قۇلمانوۆ، ا.تۇرلىباەۆ داۋىسقا ءتۇسىپ، 90-نان اسىپ جىعىلماي، ءاليحاننان ۇتىلعان ەكى كانديدات ونىمەن اۋىزدىق شايناسىپ كەلسە، بۇل بالامالى، ءادىل سايلاۋ ەمەي نەمەنە؟
اۆتونوميانى جاريالاۋدى كەيىنگە قالدىرايىق دەگەن ءاليحان توبىنا «بۇگىن جاريالايىق» دەگەن جاھانشا توبى قارسى شىعىپ، جاھانشا قۋعىندالىپ كەتپەي ەكى وپپونەنتتىك توپ كونسەنسۋسقا كەلىپ جاتسا، بۇل دەموكراتيالىق مادەنيەت بولماعاندا نە؟
الاشورداعا ءاليحاننىڭ ارقانىڭ جىگىتتەرىن عانا جيناماي، 7 وبلىس قازاقتىڭ ءار وبلىسىنان ءبىر ازاماتتان ەنگىزگەنى شە؟ 
ياپىر-اي، سول الاشورداعا الەكەڭنىڭ شىعاردا جانى عانا بولەك احمەت پەن مىرجاقىپتى كىرگىزبەي قويعانىن شىققىر كوزدەر تاريح كىتاپتارىنان كورىپ وتىر ەمەس پە؟ 
باسقا نە ايتۋعا بولادى؟

بولات ءمۇرسالىم

Abai.kz