قازاقستاننىڭ مادەنيەت جانە سپورت ءمينيسترى ارىستانبەك مۇحامەديۇلى ينتەرنەت جەلىسىندە دۇربەلەڭ تۋعىزعان داۋلى اۋديوجازباعا قاتىستى تۇسىنىك بەردى، - دەپ حابارلايدى Tengrinews.kz ءتىلشىسى.

وسىدان بىرنەشە كۇن بۇرىن YouTube جەلىسىندە "مادەنيەت ءمينيسترى ارىستانبەك مۇحامەديۇلى" دەگەن اتاۋمەن اتىشۋلى اۋديوجازبا جاريالانىپ (http://abai.kz/post/view?id=4486), قىزۋ تالقىعا تۇسكەن ەدى.

اۋديجازبادا داۋىسى ساياساتكەردەن اۋمايتىن بىرەۋ «كينو قىزمەتكەرلەرىنە» جۇمسالىپ قويعان ميلليوندارعا قالاي سمەتانى شاقتاۋعا بولاتىنىن جانە قالعان قاراجاتقا قالاي فيلم ءتۇسىرۋ كەرەكتىگىن ۇيرەتىپ، نۇسقاۋ بەرەدى.

سونداي-اق، «قازاق ەلى» جوباسىنىڭ قارجىلىق ماسەلەلەرى قاراستىرىلىپ، شامامەن مۇحامەديۇلى بولۋى مۇمكىن ەر كىسى ولارعا قىلمىستىق ءىس قوزعالۋى مۇمكىن ەكەنىن، الايدا ول پروكۋرورلار كەلىپ، كينوستۋديا جۇمىسى توقتاپ قالماس ءۇشىن سانالى تۇردە «قۇرباندىققا بارىپ وتىرعانىن» ايتادى.

ەندى سول اۋديو-جازباعا قاتىستى قازاقستاننىڭ مادەنيەت جانە سپورت ءمينيسترى ارىستانبەك مۇحامەديۇلى استانادا وتكەن پارلامەنت پالاتالارىنىڭ بىرلەسكەن وتىرىسىنىڭ كۋلۋارىندا: "ول جەردە اشىق اڭگىمە بولدى: پروتسەسس قايدا، قاي جەردە. بىزگە ەڭ باستىسى - ۇدەرىستى العا جۇرگىزۋ كەرەك بولدى. وزدەرىڭىز بىلەسىزدەر، اقپارات قۇرالدارىندا بولىنگەن اقشانىڭ جۇمسالىپ كەتكەنى، ال ءفيلمنىڭ توقتاپ قالعانى ايتىلدى. بىراق شىن مانىندە، وزدەرىڭىز سول اڭگىمەدەن كۋاگەر بولعانداي، ول اقشا كەشىكتىرىلگەن. مەن كەرىسىنشە، تەحنيكالىق كەشىگۋلەر بولماسىن دەپ، ونىڭ سەبەبىن انىقتادىم. ءبىز ول ماسەلەنى شەشتىك. قازىر ول فيلم پروتسەسىن جالعاستىرىپ جاتىر. (...) سوندىقتان بۇل ءبارىمىز تاعاتسىزدانا كۇتىپ جۇرگەن قىزىقتى جوبا بولادى دەپ ۇمىتتەنەمىن", - دەپ مالىمدەدى.  

سونىمەن قاتار، ۆەدومستۆو باسشىسى جۋرناليستەرمەن اڭگىمەلەسۋ بارىسىندا رەجيسسەرلەردىڭ تۇسىرىلىمگە ءوز تۋىستارىن تارتۋىن قۇپتامايتىنىن ايتقان. "سوندىقتان تەاتر قىزمەتى بويىنشا زاڭدى قورعاعان كەزدە مەن ءسوز سويلەدىم، ء"بىرىنشى باسشى بولساڭ (اڭگىمە ءفيلمنىڭ باس رەجيسسەرى جونىندە - اۆت.) ارينە، باستى رولدە سۇيىكتى جارىڭ، سۇيىكتى بالالارىڭ وينايدى. سوندىقتان مەن اشىق ايتتىم، بۇل ءۇردىستى توقتاتۋ كەرەك. ەگەر ادام راسىندا دا تالانتتى بولسا، مارحاببات. ال تىرەۋىشىم بار ەكەن دەپ، ءوز جاقىندارىن تۇسىرەتىندەردى مەن مۇلدە قولدامايمىن", - دەدى مۇحامەديۇلى.

Abai.kz