ءبىزدىڭ  قوستاناي وبلىسىنىڭ اكىمى نۇرالى سادۋاقاسوۆتىڭ ونەرگە دەگەن سۇيىسپەنشىلىگى ەرەكشە ەكەندىگىنە،  ونەر دەگەندە ىشكەن اسىن جەرگە قويا سالاتىن ايرىقشا قاسيەتىنە مۇنداعى قاراپايىم حالىق قاشاندا ءتانتى. تەك ول كىسىنىڭ مۇنداي ىستىق ىقىلاسى مەن ۇلكەن قۇرمەتى كورشىمىز – رەسەي ەلىنەن كەلگەن ونەر يەلەرىنە عانا باعىتتالاتىنىنا اۋەلگى كەزدە تاڭ قالعانىمىزبەن، كەيىن ەتىمىز ۇيرەنىپ كەتتى. ويتپەگەندە قايتەيىك، وبلىسىمىزدىڭ قوجايىنى، «اق» دەگەنى – العىس، «قارا» دەگەنى – قارعىس، ەشكىم بەتىنە كەلمەيتىن ماڭدايىمىزعا بىتكەن جالعىز اكىمىمىز ءبىزدىڭ، قاراپايىم حالىقتىڭ، پىكىرىن قۇلاعىنا قىستىرماسى بەلگىلى. كەزىندە رەسەيدىڭ باردى، ياعني، گيتارشىسى ميحەەۆ دەگەنمەن ەكى كۇن بويى قوسىلا شىرقاپ، قۇلاعىمىزدىڭ «قۇرىشىن» قاندىرعانىن جازعان دا ەدىك. وعان ء«ماۋ» دەگەن باسشىمىز بولمادى. «دانىككەن قارساق قۇلاعىمەن ءىن قازادى» دەگەندەي، سول انشىسىماعىمىز جىل سايىن قوستانايعا ات باسىن بۇرۋدان شارشاعان ەمەس.

جارايدى، بولار ءىس بولدى، ءىس ءبىتتى، كۋ كەتتى دەلىك. الايدا، وسى اكىمىمىزدىڭ جاقىندا ىستەگەن ءبىر ىسىنە جاعامىزدى ۇستادىق. رەسەيدىڭ نيكاس سافرونوۆ دەگەن سۋرەتشىسىنىڭ بار ەكەندىگىنەن حاباردار شىعارسىزدار. جالپى، رەسەي جۇرشىلىعىنىڭ بۇل ادام جايلى پىكىرى ونشا ەمەس. ءوز سۋرەتتەرىن ساتۋدا كەيبىر قۋلىقتارعا بارىپ، ءتىپتى، الاياقتىق جاسايدى دەگەن قاڭقۋ سوزدەر باسپاسوزدە ارەدىك جاريالانىپ تۇرادى. جارايدى، ونى ول كىسىنىڭ ار-ۇياتىنا قالدىرايىق. ايتايىن دەگەنىمىز ول ەمەس. ءبىزدىڭ كوڭىلىمزىگە كىربىڭ ۇيالاتقان جاي – الگى اكىمىمىزدىڭ سافونوۆتىڭ وسىندا اشىلعان كورمەسىنە جۇرتتان بۇرىن جەتىپ بارىپ، گازەت پەن تەلەۆيدەنيەگە سۇحبات بەرىپ، ونى جەر-كوككە سىيعىزباي ماقتاعانى بولدى. ءتىپتى، «كۇزدە اماندىق بولسا، ونىڭ شىعارماشىلىق كەشىن وتكىزەمىز» دەپ ايدى اسپانعا ءبىر-اق شىعاردى. نە دەگەن جاناشىرلىق، نە دەگەن قامقورلىق دەسەڭىزشى؟ شىركىن، وسى اكىمىمىز الگىندەي «اكەلىك» قامقورلىق قولىن وسىنداعى  ونەر ادامدارىنا سوزسا عوي، ء«اپ، بارەكەلدى!» دەر ەدىك. ويتكەنى، وبلىسىمىزدىڭ ماقتان تۇتار ونەر ادامدارىنىڭ جاعدايىن ەستىسەڭىز، جەرگە كىرىپ كەتە جازدايسىز. بۇل ەندى ءوز الدىنا جەكە اڭگىمە. وبلىس اكىمى ءوزى قۇرىلتايشى بولىپ تابىلاتىن وبلىستىق قازاق گازەتىنىڭ  ەسىگىن ءبىر رەت تە اشقان ەمەس. سويتە تۇرا وسىنداعى ورىس ءتىلدى «الاۋ» تەلەكومپانياسى، «كوستانايسكيە نوۆوستي» گازەتى سەكىلدى ۇجىمداردىڭ مەرەيتويلارىنان قالمايدى. مىنەكەي، ءبىزدىڭ اكىم وسىنداي.

P.S. ايتپاقشى، «ونەر سۇيگىش» اكىمىمىز ەكى وكپەسىن قولىنا الا، سالىپ ۇرىپ  جەتىپ بارعان كورمەگە ونىڭ يەسى – نيكاس سافرونوۆ، ءتىپتى، كەلگەن دە جوق. ءسىرا، ول كىسى ءبىزدىڭ اكىمنىڭ ءوز ونەرىنە تابىنۋشى ەكەندىگىن بىلمەي قالسا كەرەك. ال، ءبىز بىلدەي ءبىر اكىمىمىزدىڭ سول نيكاس دەگەننىڭ وكىلى – قايداعى ءبىر بەيتانىس ايەلگە جاعىنىپ تۇرعاندىعىن كورگەندە، ۇيالعاننان جەرگە كىرىپ كەتە جازدادىق.

مۇراتبەك داۋرەنۇلى

قوستاناي وبلىسى

Abai.kz