جاقىندا عانا 1-جەلتوقسان كۇنى ايدارىن اسقاقتاتىپ، ارقا-جارقا بولىپ «تۇڭعىش ەلباسى كۇنىن» بارشامىز بولىپ اتاپ وتتىك. تيەسىلى ءبىر كۇنىندە دەمالدىق.  پرەزيدەنتىمىزدىڭ ءوزى ەلورداداعى جاڭا جىلدىق باس شىرشانى جاعىپ بەردى. جۇرت ءماز-مەيرام. مادەنيەت ءمينيسترى ارىستانبەك مىرزا ايتپاقشى، «باقىتتى كەزدە ءومىر ءسۇرىپ جاتقان» حالىق ءۇشىن بۇدان اسقان قۋانىش بار ما؟ ەندى نە كەرەك؟  بيلىك دالىزىندە جۇرگەن كەيبىر ساياساتكەرلەردىڭ پىكىرىنشە، قازاق ءوزىنىڭ مىڭجىلدىق تاريحىندا مۇنداي باقىتتى كەزەڭدە ءومىر ءسۇرىپ كورگەن جوق. مۇنىڭ ءبارى ەلباسىمىزدىڭ ارقاسى. داۋىمىز جوق.

جالپى ءبىزدىڭ ءوزىمىز كەز كەلگەن مەرەكەنى پرەزيدەنت نازارباەۆتىڭ ەسىمىمەن بايلانىستىرىپ كورسەتۋدى جاقسى كورەتىنىمىز جاسىرىن ەمەس. سەبەبى، ءبىز ونى سۇيەمىز. ەلىمىز تاۋەلسىزدىك العان شيرەك عاسىردا ايتارلىقتاي جەتىستىكتەرگە جەتتى دەيمىز. ەكونوميكالىق الەۋەتىمىز ارتتى. ۇزدىك ەلۋلىككە كىردىك. ونى قويشى، ەندى العاشقى وتىزدىققا ۇمتىلىپ كەلەمىز. مۇنىڭ ءبارى تۇڭعىشىمىزدىڭ ارقاسى ەكەنىنە كوز جۇما المايمىز. وبەكتيۆتى باعا بەرەر بولساق، ايتارىمىز وسى. ارينە، حالقىمىز كەدەيشىلىكتەن 100 پايىز قۇتىلىپ، ۇلدە مەن بۇلدەگە ورانىپ وتىر دەي المايمىز. مۇندايدا «كۇيەۋىم جوق بولسا دا، كۇيىم جاقسى» دەگەن ءسوز ەسكە تۇسەتىنى راس. ءبىزدىڭ ءدال قازىرگى جاعدايىمىز وسىنداي.

ءجا، مەنىڭ ايتپاعىم مۇلدە باسقا ەدى عوي. راس، جاقىندا شەتەلدىك باسىلىمدارداردىڭ بىرىنەن ءبىز تۋرالى دوعال دەرەكتى كوزىم شالىپ قالدى. وندا بىزدەگى ماقتاماۋدى وتىنگەن سايىن، ماداقتالاتىن باسشىلار مەن جەكە باسقا تابىنۋشىلىق دەگەن قوعامعا دەندەپ كەتكەن قۇلدىق پسيحيلوگيا تۋرالى ايتىلىپتى. راس، قازاق – باسشىسىن ماقتاۋدان دۇنيەجۇزىندە ۇزدىك ۇشتىككە كىرىپتى. الدىمىزدا اشىق ديكتاتورلىق مەملەكەتتەر سولتۇستىك كورەيا مەن وزبەكستان. سودان كەيىن بارىپ ءبىز تۇرمىز.

تاڭ قالدىم. قىسقاسى، حالىق ەگىنى بىتىك شىقسا دا، مالى تولدەسە دە، ەڭ اقىرى قايعىسىز ىشكەن قارا سۋىنا دا شۇكىر ەتىپ، باسشىسىنا العىسىن ايتىپ، ونىڭ تىلەۋىن تىلەپ وتىرادى، بىزدە. بۇل ءبىر جاعىنان كەزىندە كامپەسكەلەۋدەن جانە تاپقان دۇنيەسىن، ءتىپتى، قويىنان قىرىققان جۇنىنە دەيىن ۇكىمەتكە وتكىزىپ زارەزاپ بولعان حالىقتىڭ كەڭشىلىكتەگى جاساعان شۇكىرى، پاتشاسىنا ايتقان العىسى شىعار. حالىق – تاۋبەشىل، شۇكىرشىل.

ەندى ساياساتكەرلەر اراسىندا ەلباسىن ماقتاۋدان الدىنا جان سالماي جۇرگەن باسشىلار از ەمەس. جاعىمپازدىقتىڭ ءدۇدامال دوداسى الدەقاشان باستالىپ كەتكەن.

جاقىندا ازاتتىق سايتى ەلباسىن ماقتاۋشىلاردىڭ ءبىرسىپىراسىن ءتىزىپ شىعىپتى (http://www.azattyq.org/contentinfographics/infographics/27399828.html).

ۆلاديمير نەحوروشەۆ، ەكس-دەپۋتات (2011 ج)

«قازىر جۇرت: بۇل ادامنىڭ بويىندا كۇن بار، ونىڭ نۇر-ساۋلەسى جولىمىزعا جارىعىن تۇسىرە بەرسىن، دەيدى. نۇرسۇلتان ءابىشۇلى قۇداي بەرگەن دانىشپان. ونىڭ نۇر-ساۋلەسى ەلىمىزدى ودان ءارى نۇرلاندىرا بەرسىن»

قانات ساۋداباەۆ، ءماجىلىس دەپۋتاتى (2012 ج)

«قازاقستاننىڭ دامۋ جولى مەن نۇرسۇلتان نازارباەۆتىڭ جاڭا تاۋەلسىز مەملەكەت قۇرعان ستراتەگياسى، جاسامپاز ەڭبەگى الەمدەگى كوپتەگەن ەلدەردە سالماقتى تالداۋلار مەن تەرەڭ زەرتتەۋلەردىڭ نىسانىنا اينالدى».

مۇحتار قۇل-مۇحامەد، قر پرەزيدەنتىنىڭ كەڭەسشىسى (2012 ج)

«اقش ءۇشىن دجوردج ۆاشينگتون مەن توماس دجەففەرسون قانداي تۇلعا بولسا، نازارباەۆ تا سونداي دەڭگەيدەگى تۇلعا. ەشقانداي كوتەرمەلەۋسىز-اق، نازارباەۆ – بارلىق قازاقستاندىقتار ءۇشىن ەلدىڭ نەگىزىن سالۋشى».

باقىتجان جۇماعۇلوۆ، ەكس-بعم (2012 ج)

«پلانەتارلىق دەڭگەيدەگى  ساياساتكەر نۇرسۇلتان ءابىشۇلىنىڭ حالىقارالىق دەڭگەيدەگى ۇسىنىستارى قولداۋ تاۋىپ وتىر. بولاشاقتى بولجاعان اباي بابامىز قانداي ۇلى بولسا، حالىق، زامان سىنىنان مۇدىرمەي ءوتىپ كەلە جاتقان نازارباەۆ تا سونداي تۇلعا».

سماعۇل راحىمباي، جازۋشى (2012 ج)

«ايتارى جوق، ەلباسىمىز – راسىندا قايتالانباس قاسيەتتى، دارا تۇلعا».

ولجاس سۇلەيمەنوۆ، اقىن (2013 ج)

ء«بىز دامۋىمىزدىڭ 25 جىلىندا جاقىنداعان التىن قيما – ۇلى ساياساتكەر نۇرسۇلتان نازارباەۆتىڭ ساياسي ونەرى ارقاسىندا قول جەتكىزگەن ۇلكەن تابىسىمىز».

ءابساتتار قاجى دەربىسالى، ەكس-باس ءمۇفتي (2013 ج)

«حان ابىلاي مەن وزگە دە سۇلتاندار قازاقتىڭ باسىن بىرىكتىرە الماي ومىردەن ءوتتى. ولاردىڭ الدىندا قانشاما رەت حالىق رەتىندە جويىلىپ كەتۋ قاۋىپى تۇردى. حالىقتى مۇنداي قاۋىپتەن قۇتقارۋ الاننىڭ قالاۋىمەن نۇرسۇلتان نازارباەۆقا بۇيىردى».

ارىستانبەك ءمۇحاماديۇلى، قر مادەنيەت جانە سپورت ءمينيسترى (2015 ج)

«ەندى نۇرسۇلتان ءاىشۇلى، شىنىن ايتقاندا باقىتتى كەزدە ءومىر ءسۇرىپ جاتىرمىز عوي. تاۋەلسىزدىكتىڭ، ءسىزدىڭ ارقاڭىزدا».

ميحايل پودولياكوۆ،  قوستاناي قالالىق ارداگەرلەر كەڭەسىنىڭ توراعاسى، (2015 ج)

«ەلباسى كەز-كەلگەن ماقتاۋ سوزگە لايىق. ول قاراپايىم، كوپشىل ادام. جاقسى جانە اقجارقىن ادامعا ءتان قاسيەتتەردىڭ بارلىعى ءبىزدىڭ ەلباسىمىزدىڭ بويىنان كەزدەسەدى. سوندىقتان پرەزيدەنتتى جاقسى كورمەۋ مۇمكىن ەمەس».

مىرزاتاي جولداسبەكوۆ، پروفەسسور، ابىز (2015 ج)

«مەنىڭ “كەمەڭگەر” دەگەن ماقالام تاۋەلسىزدىك مەرەكەسىنەن ءبىر كۇن بۇرىن شىقتى. مەن وندا ءبارىن جازىپ ەدىم. تاڭەرتەڭ يمانعالي تاسماعانبەتوۆ قوڭىراۋ شالىپ، «اعا، قۇتتى بولسىن. ماقالاڭىز شىعىپتى. كەرەمەت جازىپسىز» – دەدى. ارتىنشا نۇرەكەڭنىڭ ءوزى حابارلاستى. «مىرزەكە سەن تاۋەلسىزدىكتىڭ شەجىرەشىسى بولدىڭ دەدى».  مەن دە قۋاندىم. پرەزيدەنتتەن مۇنداي باعالانۋ دەگەن كەز-كەلگەننىڭ باسىنا بۇيىرا بەرمەيدى. ول اللانىڭ قازاققا بەرگەن سىيى»

نۇرگەلدى ابدىعانيۇلى

Abai.kz