http://www.qazaquni.kz/?p=33328

ەكىنشى بولىپ كابينەتىنە شاقىرعان قازاقستان رەسپۋبليكاسى پارلامەنتى سەناتىنىڭ دەپۋتاتى مۇرات باقتيارۇلى بولاتىن. مۇرات اعانىڭ باسشىلىعىندا قىتايدان ورالعان قانداستارىمىزدى الەككە سالعان «شىعۋ پاراعى» كۇشىن جويدى. بۇگىنگى جىرىمىزدى سول مۇرات باقتيارۇلىنا ارنادىق. كەزەگى كەلگەندە اسىل اعالاردىڭ قازاق كوشىنە سىڭىرگەن ەڭبەگىن ءبىر-بىرلەپ ولەڭ جولدارىمەن ەل ەسىنە سالىپ وتىرسام دەگەن ويدامىن. 
امان بولسىن، الاش رۋحتى ارداقتى اعالار!

جاقسى اعا

مۇرات باقتيارۇلىنا

بىرەۋ ەرتە، بىرەۋلەر كەيىن ءبىلدى،
جانىم ىلعي جاقسىعا بەيىم ءجۇردى.
«اينالايىن، ءىنىم!» - دەپ ءتىل قاتاتىن.
اڭسايدى ەكەن قۇلاعىڭ مەيىرلى ءۇندى.

كىمدى اياسىن ۋاقىت مىنا قاتاڭ،
بەرمەيدى ءومىر ەنشىڭدى سۇراماساڭ.
كەرەك ەكەن تاعى دا قوشامەتتەپ، 
قاعاتۇعىن ارقاڭنان جىلى الاقان.

تۇلپارلاردى سىنشى جوق شاپپاي بىلەر،
جابىلارىن قويارعا ەل تاپپايدى جەر.
الىپ ۇشقان ورەكپىپ اقىن كوڭىل،
ىزدەيدى ەكەن ءداۋ ەسىك قاقپاي كىرەر...

ەنشىڭدى الىپ كەتەدى ەل جۇگىرمەسەڭ،
شىقپاۋ كەرەك سول ءۇشىن ءۇنىڭ باسەڭ!
جاقىن تارتىپ جانىڭا شاقىرىپ الدىڭ،
ءسويتىپ جۇرگەن كۇندەردىڭ بىرىندە سەن!

دەگەن جوقسىڭ مىنەزى، ءتۇرى قالاي.
شاي ۇسىندىڭ سالىپ ءبىر شىنىعا ماي!
جۇگىرمەسىن قالايشا شىن ەنتىگىپ، 
شاقىرىپ تۇرسا ادەيلەپ ءىنىنى اعاي؟!

شەتتە قالىپ قازاقتىڭ قارتاڭ، جاسى،
ۋايىم مەن قايعى ەدى ءار تاڭعى اسى.
ءىنىڭ تۇلەپ ءاپ-ساتتە شىعا كەلدى،
حابار تاپتى وزىڭنەن جارتى الماتى.

حابار تاپتى وزىڭنەن بۇكىل قانداس،
قۋاندى-اي ءبىر ەپتى اعا، جۇتىنعان جاس.
اعا كەرەك ىنىگە ايباتى بار،
قۇرىپ توردە وتىرۋ ءۇشىن مالداس!

ءوزىم ەمەس، قامى ءۇشىن الىس قىردىڭ،
اينالامدى تاعى اكەپ تانىستىردىم.
قانشا اداممەن كوش جايلى ىستەس بولسام،
سونشاسىمەن ءوزىڭدى سالىستىردىم.

امان بولشى، ارىسىم، تولاعايىم،
مالعا تولىپ تۇرسا ەكەن قورا دايىم!
مەنى شەتكە بۇل كۇندە سىرىپ قويىپ،
ساعان توتە شىعادى سول اعايىن.

دەپ جۇگىردىڭ قانداستار شەت قالماسىن،
تاپقالى تۇر ۇلى كوش ەسكى ارناسىن!
باعاسىنا اعاسى جەتكەننەن سوڭ،
ساباسىنا تۇسكەندەي «سوتقار» باسىم!

مەن قۋاتىن ارمان دا تۇنىق ارمان،
جاڭىلماسپىن سەن باردا ۇلى جولدان.
ارعى بەتتەن اعايىن اعىلىپ كەلسە،
ات ۇستاسام دەيمىن ءبىر شىعىپ الدان!..

جۇرگەننەن سوڭ جولىندا ۇلى مۇرات،
ۇشام ساعان كوڭىلدىڭ تۇنىعىن اپ!
شاپانىڭدى كيەسىڭ اعايىننان،
مىنگىزەدى اكەلىپ ءبىرى قۇر ات!..

سەنى بەرگەن ىرزامىن ومىرگە، اعا،
وتىرا بەر سەناتتىڭ تورىندە انا!
وردەن ءالى كەۋدەڭە تاعىلادى،
مەندە بارى جىر مەنەن كوڭىل عانا!!!

اۋىت مۇقيبەك

11.11.2015
استانا