قوعامدىق ۇيىم بەلسەندىلەرى ون سەگىزگە تولعان مارجان تۇرلىباەۆانىڭ ول جەردە ەمدەلىپ جاتقانىنا سەگىز جىلعا جۋىقتاعانىن ايتادى، - دەپ حابارلايدى 31 ارنا.

ون سەگىز جاستاعى مارجان تۇرلىباەۆانى وسىدان جەتى-سەگىز جىل بۇرىن بالالار ۇيىنەن اسىراپ العان وگەي اناسى كۇيەۋىمەن بىرگە ۇرىپ-سوعۋىن جيىلەتكەن.

ءارتۇرلى سىلتاۋمەن سوققىعا جىعىلعان جاس قىزدى اقىرى ولار اقىل ەسى كەمدەر ۇيىنە جاۋىپ تىنعان. “تالاي ادامعا ءوزىمنىڭ ساۋ ەكەنىمدى دالەلدەسەم دە وگەي انامنىڭ ارەكەتىنە توقتاۋ بولا الماي وتىرمىن” دەيدى.

“يت شىنجىر جاتاتىن. سول شىنجىردى الدى دا كۇيەۋى قوسىلىپ ۇردى. بولدى ءلاززات قىزىڭنان كۇيدىم دەپ، مەنى قۋىپ جىبەردى. ءبىر ەمەس، ەكى ەمەس، تالاي مارتە بولعان جاعداي بۇل”، – دەيدى مارجان تۇرلىباەۆا.

“ەشقانداي ءوزىنىڭ جىندى مىنەزىن كورسەتپەگەن دەيدى. ال كورسەتپەسە، نەگە جاتىر ماڭگىلىك جىندىحانادا؟”، – دەيدى قوعامدىق ۇيىمنىڭ مۇشەسى باعيلا جاساتايقىزى.

قورلىق كورسەتىپ، جۇيكە اۋرۋلارىن ەمدەيتىن ارنايى ورىنعا جاتقىزعان ونىڭ وگەي اناسى كورىنەدى.

قوعامنان وقشاۋلانعان قىز كامەلەتكە تولعان سوڭ، شىمكەنتتەن قازىر تۇركىستانعا كوشىرىلگەن. ماماندار مارجاندى ءماجبۇرلى ەمگە قابىلداعانىمەن، ونىڭ ەسى دۇرىستىعىن ەسكەرىپ، ەشقانداي ءدارى-دارمەك بەرمەيتىنىن ايتتى. ال كۇتۋشىلەر قىزدىڭ جۇيكەسى سىر بەردى دەگەنگە كۇمانمەن قارايدى.

“قىز بالانى مۇنداي جەردە ۇستاۋ وبال. ءتورت جىلدىڭ ىشىندە وعان وتە قيىن بولدى. بىراق ول ەشكىممەن ارالاسپادى. ءوزى اقىلدى قىز”، – دەيدى پسيحونەۆرولوگيالىق الەۋمەتتىك مەكەمەنىڭ دارىگەر-پسيحياترى شاحيدا نۇروۆا.

اۋرۋحانادا جاتسا دا، مارجان ەبىن تاۋىپ تۇركىستان قالالىق پروكۋراتۋراسىنا شاعىم ءتۇسىرىپتى. ءوز شاعىمىندا قايتادان پسيحولوگيالىق-مەديتسينالىق ساراپتاما جۇرگىزۋدى سۇراعان.

“بۇل ارىزدى قاراۋ قۇزىرەتىنە وراي، شەشىم قابىلداۋ ءۇشىن ەڭبەك، الەۋمەتتىك قورعاۋ جانە كوشى-قون كوميتەتىنىڭ وڭتۇستىك قازاقستان وبلىسى بويىنشا دەپارتامەنتىنە جولدادىق”، – دەيدى تۇركىستان قالاسىنىڭ پروكۋرورى ماحات زۇلپىحاروۆ.

ساۋ باسىمەن اقىل-ەسى اۋىتقىعانداردىڭ اراسىنان تابىلعان مارجاننىڭ دەرەگىنە قاتىستى قۇزىرلى مەكەمەلەر تەكسەرۋدى باستاپ كەتتى. اقىل-ەسىنە قاتىستى ساراپتاما دا تاعايىندالماق. قوعامدىق ۇيىم بەلسەندىلەرى مەديتسينالىق زەرتتەۋلەرگە ءتيىستى باقىلاۋ ورناتسا دەپ وتىر.

31 ارنا