بيىل حالىقارالىق «شابىت» شىعارماشىل جاستار فەستيۆالى اياسىندا «پروزا» اتالىمى بويىنشا جاس قالامگەرلەر بايقاۋى ءوتۋى ءتيىس ەدى. الايدا ول بىزگە بەلگىسىز سەبەپتەرمەن الىنىپ تاستالىپتى.

ونىڭ نەگە ساپ تىيىلىپ، شورت كەسىلگەنىن بىلمەك ماقساتپەن فەستيۆالدىڭ نەگىزگى ۇيىمداستىرۋشىسى - استانا قالاسى مادەنيەت باسقارماسىنا حابارلاستىق. ولاردىڭ بار ايتارى: «باسقارما باسشىسى بولات ماجاعۇلوۆ سولاي دەپ شەشىم قابىلدادى!» دەگەن سوزدەن ارى اسپادى. بىزگە تۇسىنىكسىز بولعانى - حالىقارالىق كونكۋرستان «ادەبيەت» اتالىمى نەگە شەت قالادى؟! ونسىز دا ناسيحاتى از ادەبيەتكە قامقور بولار بىردەن-ءبىر مەكەمە – مادەنيەت باسقارماسى ءوزىمىز كوزايىم قىپ جۇرگەن جالعىز «شابىتىمىزدى» شورت كەسسە، وسى كونكۋرسقا ءۇمىتىن ۇكىلەپ، قالامىن ۇشتاپ، جۇرەگىن لۇپىلتەتىپ وتىرعان جاس قالامگەرلەرگە وبال ەمەس پە؟!

وزدەرىڭىزگە ايان، وتكەن جىلى «ادەبيەت پورتالى» «شابىتتى» وتكىزۋ بارىسىندا «ادەبيەت» اتالىمىن («پوەزيا») مادەنيەت باسقارماسىمەن بىرلەسىپ وتكىزىپ، جاستارعا ۇلكەن قولداۋ كورسەتكەن ەدى. «پوەزيا» اتالىمى بويىنشا پورتال بەتىنە 150-دەن استام جاس اقىننىڭ ولەڭدەرى جاريالانىپ، ولاردى ونلاين تۇردە اشىق باعالاپ، كونكۋرسقا تىركەگەن بولاتىن. ەڭ سوڭىندا قازىلار القاسىنىڭ باعالاۋىمەن 10 اقىن الدىڭعى قاتارعا شىقتى. ولاردىڭ بارلىعى قازىر ادەبيەتتە وزىندىك ايتار ويلارىمەن ەرەكشەلەنىپ جۇرگەن جاستار. «شابىت» جاس ادەبيەتشىلەردىڭ باسىن بىرىكتىرىپ، ءوزارا پىكىر الاماسۋعا جاعداي جاسايتىن ەڭ بەدەلدى ادەبي ايدىن. ءسوز ونەرى قاي ونەردەن كەم؟! قازاق ءسوزدىڭ قادىرىن، قاسيەتىن سەزىنەتىن حالىق دەمەۋشى مە ەدىك؟! مادەنيەتتىڭ ۇلى بولشەگى ادەبيەت ەمەس پە؟! مۇحتار اۋەزوۆ: «بۇل داۋىردە، ءوز ءتىلىن، ادەبيەتىن بىلمەگەن، قادىرلەمەگەن ادام تولىق ءماندى ينتەلليگەنت ەمەس...»، - دەدى عوي. ەندى ءوزىڭىز ويلاڭىزشى، مادەنيەت باسقارماسى باسشىسىنىڭ بۇل قىلىعىن قالاي تۇسىنەمىز؟!

بۇل جاعدايدى جىلى جاۋىپ قويا سالۋعا مۇلدە بولمايدى. «ادەبيەت پورتالى» ادەبيەت سۇيەر قاۋىمنىڭ ارتىپ وتىرعان اق ءۇمىتىن اقتاۋ ءۇشىن ماسەلەنىڭ ودان ءارى قالاي ءوربيتىنىن ءوز باقىلاۋىنا الادى.

ءابۋ اسقار مەكەشۇلى

"ادەبيەت" پورتالى