قازاقستان ۇكىمەتىن 1997-1999 جىلدارى باسقارعان قازاقتىڭ ارداگەر ۇلدارىنىڭ ءبىرى نۇرلان بالعىمباەۆ ومىردەن وزدى. كولدەنەڭ كوزگە كوپ كورىنە بەرمەيتىن نۇرلان وتەپۇلى كەيىنگى جىلدارى ناۋقاسقا شالدىعىپ، اۋرۋدىڭ زاردابىن تارتىپتى. «سوندا دا مويىعانىن بىلدىرگەن ەمەس» دەپ جازادى مارقۇممەن سوڭعى ۋاقىتتاردا جۇزدەسىپ قالعان  ساياساتكەر  ءامىرجان قوسانوۆ الەۋمەتتىك جەلىدەگى (FB) جازباسىندا.

نۇرلان بالعىمباەۆ ەل ەكونوميكاسى ەكپەتتەپ جاتقان جىلدارى ۇكىمەتتى باسقاردى. سول قيىندىقتاردان قايىسپاي، تىعىرىقتان جول تابا ءبىلدى. ۇساق ساياسات، ينتريگا دەگەننىڭ بىرىنە مويىن بۇرماي، تۋراشىلدىعىنا سالىپ، تۋرا تارتتى. ول ناعىز پرمەر بولىپ ەدى. نۇرلان وتەپۇلىنىڭ باتىلدىعىن، باتىرلىعىن دارىپتەپ ايتىپ جۇرەتىن اقىن اۋىت مۇقيبەك بىلاي دەيدى:

-         نۇرلان وتەپۇلى قازاقستان رەسپۋبليكاسىنىڭ پرەمەر-ءمينيسترى بولعان 1997 - 1999 جىلدارى قازاق كوشىنىڭ ەڭ ءبىر قارقىن الا باستاعان مەزگىلى ەدى. مىسالى، 1997-2001 جىلدار ارالىعىندا ەلىمىزگە الىس-جاقىن شەتەلدەن 82 مىڭ 335 قانداسىمىز ورالىپتى. ەكونوميكالىق قيىنشىلىقتان ەندى-ەندى كوزىن اشىپ، ەڭسەسىن كوتەرە باستاعان  مەملەكەت ءۇشىن بۇل از كورسەتكىش ەمەس. مەن دە سول بالعىمباەۆ تۇسىندا (1998) كەلگەن لەكتىڭ ىشىندە ەدىم. ەڭ باستىسى، سول جىلدارى قازاق ۇكىمەتىنىڭ الىستان كەلگەن اعايىندارعا دەگەن قامقورلىعى مەن ىقىلاسى ەرەكشە بولاتىن. اكىمشىلىك كەدەرگى دەگەنىڭىز اتىمەن جوق ەدى! «سوتتىلىق» تۋرالى قۇزىرلى ورىندار اۋىز اشپايتىن! جەڭىلدىكتەر دە جەتكىلىكتى-تۇعىن... سونىڭ ءبىر پاراسى، ارينە، ارداقتى ازامات، مەملەكەت جانە قوعام قايراتكەرى، مەملەكەتشىل تۇلعا وسى نۇرلان اعامىزدىڭ ەڭبەگى ەكەنى ايدان انىق.

ءبىز ءسىزدىڭ سول ەڭبەگىڭىزدى ماڭگى ۇمىتپايمىز، نۇرلان اعا!

اللا جاتقان جەرىڭىزدى جانناتتان قىلسىن!

ارتىڭىزدا قالعان اياۋلى جارىڭىز بەن بالا-شاعاڭىزعا ءسىزدىڭ جاساي الماي كەتكەن جاسىڭىزدى جاساۋعا ءناسىپ ەتسىن جاپپار يەم!

باقىل بول، ارداقتىم!!!

 (ء«بىزدىڭ سوڭعى كەزدەسۋىمىز. ونىڭ ومىردەن وزارىنا تۋرا ءۇش اي قالىپتى».

 بودرۋم، تۇركيا. 14 شىلدە، 2015 جىل».

مارعۇلان سەيسەمباەۆتىڭ الەۋمەتتىك جەلىدەگى جەكە پاراقشاسىنان الىندى).

نۇرلان بالعىمباەۆ ءار جىلدارى مۇناي جانە گاز وندىرىسىندە مينيستر قىزمەتىن، «قازاقويل» مۇناي-گاز ۇلتتىق كومپانياسىنىڭ پرەزيدەنتى قىزمەتىن اتقاردى. 1997 جىلدان 1999 جىلدارعا دەيىن قازاقستان رەسپۋبليكاسىنىڭ پرەمەر-ءمينيسترى بولدى.

كەيىنىرەك «قازاقويل» ۇلتتىق مۇناي-گاز كومپانياسىن» جانە «قازاقستاننىڭ مۇناي ينۆەستيتسيالىق كومپانياسىن» باسقاردى.

2007 جىلدىڭ جەلتوقسانىندا پرەزيدەنت كەڭەسشىسى قىزمەتىنە تاعايىندالىپ، 2009 جىلعا دەيىن جۇمىس ىستەدى. ودان كەيىن Eni يتالياندىق مۇناي-گاز كومپانياسى ۇيىمىنىڭ جوبالارىن جۇزەگە اسىرۋ باس ديرەكتور قىزمەتىندە بولدى.

  اقش-تىڭ  ماسساچۋسەتس ۋنيۆەرسيتەتىندە ءبىلىم العان. «شەۆروندا» تاجىريبە جيناقتاپ، مۇناي جانە گاز ونەركاسىبى ءمينيسترى قىزمەتىندە بولعان.

مەملەكەتتىك قىزمەتتەن كەتكەننەن كەيىن بالعىمباەۆ جەكە بيزنەسپەن اينالىسىپ، «قازاقستاننىڭ مۇناي ينۆەستيتسيالىق كومپانياسىن» باسقاردى.

مۇنايشى بالعىمباەۆتار اۋەلەتىنەن شىققان نۇرلان وتەپۇلى قازاق جەرىندەگى «قارا التىندى» يگەرۋگە ۇلشەۋسسىز ۇلەس قوستى. مارقۇمنىڭ ومىردەگى جارقىن ىستەرى كەيىنگىلەرگە ونەگە بولسىن. جانناتتا نۇرى شالقىسىن.

Abai.kz ۇجىمى