ەلىمىزدەگى ءۇشىنشى قالا مارتەبەسىنە تالپىنعان شىمكەنت قالا كۇنىن تويلاۋدى باستاپ كەتتى، - دەپ جازادى "وڭتۇستىك رابات" گازەتى.

بيىل قالا كۇنى ءبىر جەتى تويلانادى. ءار كۇن دەربەس اتاۋعا يە بولىپ، سونىڭ اياسىندا تۇرعىنداردىڭ شاھارعا دەگەن سۇيىسپەنشىلىگى مەن پاتريوتتىق سەزىمىن وياتاتىن تاربيەلىك ءمانى بار مەرەكەلىك شارالار ءوتىپ جاتىر. بۇعان قوسا، شىم شاھار رەسپۋبليكاداعى ەڭ كونە قالا اتاعىن الۋى مۇمكىن. بۇل تۋرالى قالا اكىمىنىڭ كەڭەسشىسى – ءباسپاسوز حاتشىسى نۇرلىبەك جەڭىسبەك: «تاريحشى ارحەولوگ باۋىرجان بايتاناەۆتىڭ زەرتتەۋىنە قاراساق، شاھارعا 2200 جىل تولىپ وتىر ەكەن. بۇل اتاقتى الۋ ءۇشىن بۇگىندە بۇۇ-نا ءتيىستى قۇجاتتار جىبەرىلدى. ەگەر ول جاق ماقۇلداسا 2017 جىلى شىمكەنت 2200 جىلدىق تاريحى بار قالا اتانىپ، تورقالى تويدى كەڭ كولەمدە اتاپ ءوتۋىمىز مۇمكىن» – دەدى،  جۋرناليستەرمەن باسقوسۋىندا. 

50 ءتۇپ ساندىك اعاش وتىرعىزىلدى

10 قازان – مەرەكەنى شاھار حالقى جالپىقالالىق سەنبىلىك وتكىزۋدەن باستادى. تازالىق اكتسياسىنا وبلىس əكىمى بەيبىت اتامقۇلوۆ پەن قالا اكىمى عابيدوللا ءابدىراحىموۆ قاتىسىپ، حالىق قالاۋلىلارى، ارداگەرلەر جəنە جاستارمەن بىرگە بەكەت باتىر كوشەسىندە 50 ءتۇپ ساندىك اعاش كوشەتىن وتىرعىزدى.

جالپى قالالىق سەنبىلىكتە قالا اكىمدىگىنىڭ 14 قۇرىلىمدىق ءبولىمى مەن جوعارى وقۋ ورىندارىنىڭ ستۋدەنتتەرى، 46 وبلىستىق باسقارما جانە اۋماقتىق مەكەمە قىزمەتكەرلەرى، قالا تۇرعىندارى بەلسەندىلىك تانىتتى. تازالىق جۇمىستارى 59 كوشە مەن 6 ساياباق، گۇلزار، قوشقار اتا وزەنىنىڭ بۇلاق كوزدەرىنەن ورداباسى الاڭىنا دەيىنگى قورعالۋ ايماعىندا جانە دەندروساياباق اۋماعىندا جۇرگىزىلدى. سەنبىلىك كەزىندە ۇيىمداستىرۋ جۇمىستارىنا شىمكەنت قالاسىنىڭ تۇرعىن-ءۇي كوممۋنالدىق شارۋاشىلىق ءبولىمى جانە جەرگىلىكتى اۋدان اكىمدەرى اپپاراتتارىنىڭ ماماندارى بەكىتىلدى. سونىمەن قاتار، 26 تەحنيكا جينالعان قوقىستاردى سىرتقا شىعاردى.

مارافونعا ءتورت مىڭ ادام قاتىستى

11 قازان – شىمكەنتتە جالپىقالالىق جۇگىرۋ مارافونى ءوتتى. جارىس د.قوناەۆ پەن ت.رىسقۇلوۆ كوشەلەرىنىڭ قيىلىسىنان باستالىپ، بəيدىبەك بي داڭعىلىندا جالعاستى. «ناۋ-رىز» الاڭىندا ءوز مəرەسىنە جەتتى. سپورتتىق شاراعا 4000-نان اسا قالا تۇرعىنى قاتىستى. بيىلعى شارانىڭ ەرەكشەلىگى سول، جالپى قاشىقتىق 7 شاقىرىمعا سوزىلدى. مارافوندا ەڭ جاس قاتىسۋشى رەتىندە 8 جاسار نۇرسۇلتان قۇدايبەرگەن تىركەلسە، جاسى ەڭ ۇلكەن اتلەت 66 جاسار مۇحامەدالي جيەنباەۆ بولدى. ايتپاقشى، جارىسقا فرانتسيادان دا ءبىر ازاماتشا ارنايى كەلىپ، بالاسىن ارقالاپ جۇگىردى. ايتا كەتەيىك، شاھار قوناعى ءوز ەلىندە دە جۇگىرۋدەن ءجيى جارىسقا قاتىسىپ تۇرادى ەكەن.

جارىستا جاس ەرەكشەلىگىنە بايلانىستى 18 سپورتشى جەڭىمپاز اتانىپ، قالا əكىمىنىڭ العىس حاتىمەن جۇلدەلى سىيلىقتارعا يە بولدى. ودان بولەك تاعى 5 مارافونشى «جەڭىسكە ىنتاسى ءۇشىن» نوميناتسياسىن يەلەندى.

شىمكەنت – كەشە، بۇگىن جانە ەرتەڭ

12 قازان – اباي ساياباعىنداعى بەينەلەۋ ونەرى مۇراجايىندا «شىمكەنت – كەشە، بۇگىن جانە ەرتەڭ» اتتى فوتوكورمە ۇيىمداستىرىلدى. كورمەگە قالانىڭ وتكەن عاسىرداعى كونە سۋرەتتەرى مەن بۇگىنگى جاڭارعان قالانىڭ كەلبەتى تۇسىرىلگەن فوتولار قويىلدى. قالانىڭ شىرايىن اشاتىن ەلۋگە جۋىق سۋرەت كورەرمەندەردىڭ نازارىنا ۇسىنىلدى.

كورمەگە كەلگەن قالانىڭ باس ساۋلەتشىسى اسقار مامىرباەۆ بولاشاقتا شاھاردىڭ ادام تانىماستاي وزگەرەتىنىن ءسوز ەتتى. كۇنگەيلىك كەنتتىڭ ساۋلەتتىك كەيپىنە كورىك بەرگەن ءزاۋلىم ۇيلەر، مادەنيەت جانە دەمالىس ورىندارى، ساياباقتار مەن نەگىزگى كوشەلەردى جاس فوتوگراف ماقسات شاعىرباەۆ ءتۇسىرىپتى. قالا تۇرعىندارى مەن قوناقتارى تاريحي كادرلار اياسىندا ەستەلىك سۋرەتتەرگە ءتۇسىپ جاتتى. فوتوكورمە 17 قازانعا دەيىن اشىق بولادى.

17 مىڭ بالا زووباققا تەگىن كىرەدى

قالانىڭ زووباعىنا بيىل 35 جىل تولدى. اتاۋلى كۇنى شاھار باسشىسى حايۋاناتتار باعىنا امبەباپ تراكتوردى سىيعا تارتتى. سونىمەن قاتار، وسىدان ءبىر اي بۇرىن تۋىلعان سۋ سيىردىڭ تولىنە گلوريا ەسىمى بەرىلدى.

بۇگىندە شىمكەنت زووباعىنداعى اڭداردىڭ ءتۇرى 200-دەن اسقان، ونىڭ 20-دان استامى قىزىل كىتاپقا ەنگەن. جالپى مۇندا 2000 حايۋانات بار. بۇدان بىلاي بۇل دەمالىس ورنىنا 17 مىڭ جاعداي تومەن وتباسىنىڭ بالاسى 1 جىل بويى تەگىن كىرۋگە مۇمكىندىك الدى. سونىمەن قاتار، قالانىڭ قۇرمەتتى ازاماتتارى مەن جۋرناليستەر قاۋىمى دا زووباققا تەگىن كىرەتىن بولادى. زووباق باسشىلىعى وسىنداي شەشىم قابىلداپتى.

ايتا كەتەيىك، قالا كۇنى مەرەكەسى سەنبى كۇنى ناۋرىز الاڭى، بايدىبەك بي ەسكەرتكىشى جانىندا وتەتىن تەاترلاندىرىلعان حورەوگرافيالىق كورىنىسپەن، ەلىمىزدىڭ ەسترادا جۇلدىزدارىنىڭ مەرەكەلىك گالا-كونتسەرتىنە ۇلاسىپ، وتشاشۋلار بولادى دەپ كۇتىلۋدە.

جانسايا سىدىقباي

Abai.kz