وتكەن عاسىردىڭ 80-ءشى جىلدارىنىڭ ورتاسىندا سالىنعان عيماراتقا بيىل كۇردەلى جوندەۋ جۇمىستارى جۇرگىزىلدى جانە قوسىمشا نىساندار سالىنىپ، كەشەن جاڭارىپ شىعا كەلدى. وبلىستىق ءىىد باسشىسى، پوليتسيا گەنەرال-مايورى مۇرات ۇرۇمحانوۆتىڭ ءوتىنىشى بويىنشا وبلىس اكىمى اماندىق باتالوۆتىڭ قولداۋىمەن قايتادان جاڭعىرعان نىساننىڭ قۇرىلىسىنا 365 ميلليون 504 مىڭ 652 تەڭگە جۇمسالىپتى. سپورت كەشەنىنىڭ اشىلۋ سالتاناتىندا ءسوز سويلەگەن وبلىس اكىمى اماندىق باتالوۆ:

– وتكەن عاسىردىڭ 70-ءشى جىلدارى سالىنعان «دينامو» سپورت كەشەنى ىشكى ىستەر ورگاندارىنىڭ قىزمەتكەرلەرى ءۇشىن دەنە شىنىقتىرۋ جاتتىعۋلارىن وتكىزىپ، قىزمەتتىك دايىندىعىن جەتىلدىرۋگە مۇمكىندىك بەرەتىن ورتالىق قىزمەتىن اتقاردى. ودان كەيىن ۋاقىت وزگەرىپ، قايتا قۇرۋ ءداۋىرى كەلدى، جەكەشەلەندىرۋ جۇمىستارى جۇرگىزىلدى، سونداي جاعدايلاردىڭ اسەرىمەن سپورت عيماراتى ابدەن توزىپ، ەسكىرىپ قالدى، – دەپ جاڭا نىساندى كۇردەلى جوندەۋدەن وتكىزۋگە دەيىنگى قيىندىقتاردى اڭگىمەلەپ بەردى. – سپورت كەشەنىنىڭ تولىق جاسالۋىنا قارجى ءبولىنۋىن قاراستىرىپ، دەپارتامەنتكە قايتارىلۋىن كوپتەن ويلاستىرىپ جۇرگەنبىز. بۇعان دەيىن وبلىستىق ىشكى ىستەر دەپارتامەنتىن باسقارعان گەنەرال سەرىك كۇدەباەۆ ماعان كەلىپ، كومەكتەسۋىمدى سۇراعان ەدى. كەيىننەن ونىڭ باستاماسىن جاڭادان كەلگەن دەپارتامەنت باسشىسى گەنەرال-مايور مۇرات ۇرۇمحانوۆ جالعاستىرىپ، بۇگىنگى كۇنى باستامانى اياعىنا دەيىن تولىق جەتكىزىپ وتىر، سپورت كەشەنىن ىسكە تولىق قوستى. سول ءۇشىن بارشاڭىزدى وسىنداي ۇلكەن ءىستىڭ اياقتالۋىمەن قۇتتىقتايمىن. ىشكى ىستەر ورگاندارىنىڭ قىزمەتكەرلەرى ۇدايى جاتتىعىپ، دايىندىقتارىن جەتىلدىرە تۇسەدى دەپ سەنەمىن. ەندى پوليتسيا قىزمەتكەرلەرى ەلباسىنىڭ تاپسىرماسىنا سايكەس جىل سايىن قىزمەتىنە لايىقتىعىن انىقتاۋ ماقساتىندا اتتەستاتسيادان ءوتىپ تۇراتىن بولادى.

سىزدەردىڭ مىندەتتەرىڭىز قوعامنىڭ قاۋىپسىزدىگىن، قۇقىقتارى مەن ەلدىڭ تىنىشتىعىن ساقتاۋ. بۇل قاجىرلى ەڭبەكتى تالاپ ەتەتىن وتە جاۋاپتى جانە قاۋىپكە تولى قىزمەت. سىزدەرگە جانە سىزدەردىڭ وتباسىلارىڭىزعا زور دەنساۋلىق، اماندىق تىلەيمىن!

ودان كەيىن سالتاناتتى شاراعا جينالعانداردى وبلىستىق ىشكى ىستەر دەپارتامەنتىنىڭ باستىعى، پوليتسيا گەنەرال-مايورى مۇرات ۇرۇمحانوۆ پەن «دينامو» سپورت كەشەنىنىڭ سالىنۋىنا بىردەن-ءبىر سەبەپكەر بولعان ىشكى ىستەر ورگانىنىڭ ارداگەرى ۆلاديمير وچەرەتياننىي قۇتتىقتاپ، جۇرەكجاردى تىلەكتەرىن جەتكىزدى.

رەسمي قۇتتىقتاۋدان كەيىن جاڭا كەشەننىڭ تۇساۋكەسەرى جاسالىپ، ىشكى ىستەر ورگاندارىنىڭ ارداگەرلەرى مەن دەپارتامەنت قىزمەتكەرلەرى سپورتتىق-ساۋىقتىرۋ كەشەنىنىڭ ىشكى قۇرىلىمىمەن تانىسىپ شىقتى. جينالعاندارعا بوكس جانە كۇرەس زالدارىن، ءجۇزۋ باسسەينىن، فيتنەس جاتتىعۋ زالىن، ۆولەيبول جانە باسكەتبول زالدارىن، شاعىن اسحانامەن تانىستىرعان ءىىد باستىعى، پوليتسيا گەنەرال-مايورى مۇرات ۇرۇمحانوۆ كوپشىلىكتى كەشەننىڭ اشىلۋ سالتاناتىنا ارنالعان شاعىن فۋتبول جانە ۆولەيبول ويىندارىنىڭ فينالدىق جارىسىنا باستادى. سپورت بىرىنشىلىگىنە وبلىستىق اكىمدىك، ۇقك وبلىستىق دەپارتامەنتى، وبلىستىق ىشكى ىستەر دەپارتامەنتى، الماتى قالاسىنىڭ ىشكى ىستەر دەپارتامەنتى، مەملەكەتتىك قىزمەت جانە سىبايلاس جەمقورلىققا قارسى كۇرەس اگەنتتىگىنىڭ وبلىستىق دەپارتامەنتى، توتەنشە جاعدايلار دەپارتامەنتى كوماندالارى قاتىسىپ، تارتىسقا تولى كەزدەسۋدە باق سىناپ، ەڭ ۇزدىكتەر ارنايى كۋبوك جانە باعالى سىيلىقپەن ماراپاتتالدى. وبلىس اكىمدىگىنىڭ ۆولەيبول كومانداسى قۇرامىندا جارىسقا باستان-اياق قاتىسقان وبلىس اكىمى اماندىق باتالوۆ قىزىقتى ويىن ورنەگىن كورسەتىپ، جاس ماماندارعا ۇلگى بولدى.

ءمادي الجانباي

Abai.kz