(Aqorda.kz سايتى قر پرەزيدەنتى نۇرسۇلتان نازارباەۆتىڭ «لە فيگارو» گازەتىنە (فرانتسيا) بەرگەن سۇحباتىن ىقشامداپ جاريالادى).

قازاقستان پرەزيدەنتى فرانتسيانىڭ ءىرى باسىلىمىنىڭ ءبىرى – «لە فيگارو» گازەتىنىڭ ءتىلشىسى رەنو جيرارۋعا سۇحبات بەردى. مەملەكەت باسشىسى ەلىمىزدىڭ يادرولىق قارۋدى تاراتپاۋ سالاسىنداعى ءىس-قيمىلى تۋرالى اڭگىمەلەپ، ۋكرايناداعى قازىرگى احۋال تۋرالى جانە سونىڭ توڭىرەگىندەگى وقيعالارعا قاتىستى، سونداي-اق سيريا تۇيتكىلىن شەشۋ جولدارى جونىندە پىكىرىن ءبىلدىردى.

اتاپ ايتقاندا، قازاقستاننىڭ اتوم ەنەرگياسىن بەيبىت ماقساتقا پايدالانۋ باعىتىنداعى باستامالارىنا قاتىستى نۇرسۇلتان نازارباەۆ يادرولىق قارۋدان باس تارتۋ رەسپۋبليكامىزعا ايتارلىقتاي كولەمدە شەتەلدىك ينۆەستيتسيالار اكەلۋگە جانە ەكونوميكانى جاڭعىرتۋ ءۇشىن جاعداي تۋعىزۋعا سەپتىگىن تيگىزگەنىن اتاپ ءوتتى.

مەملەكەت باسشىسى قازاقستاندا از بايىتىلعان ۋراننىڭ حالىقارالىق قورىن قۇرۋ ءتۇرلى ەلدەردىڭ اتوم ەلەكتر ستانسالارى ءۇشىن سەنىمدى وتىن كوزىن قامتاماسىز ەتەتىنىن، وسىلايشا اسا بايىتىلعان ۋران الۋ مۇمكىندىگىن جانە ونىڭ اسكەري ماقساتتا قولدانىلۋ قاۋپىن ازايتاتىنىن ايتتى.

وسى ورايدا قازاقستان پرەزيدەنتى بۇل جوبانىڭ كوممەرتسيالىق پايدا تابۋعا ارنالماعانىنا نازار اۋداردى.

- ەڭ باستىسى،  بۇل – قازاقستاننىڭ يادرولىق قارۋدى تاراتپاۋ ىسىنە قوسقان كەزەكتى ۇلەسى، – دەدى مەملەكەت باسشىسى.

مينسك ۇدەرىسى اياسىنداعى ءتۇرلى تاراپتاردىڭ ارەكەتتەرىنە تۇسىنىكتەمە بەرە وتىرىپ، نۇرسۇلتان نازارباەۆ فرانتسيا پرەزيدەنتى ف.وللاندپەن كەزدەسۋدىڭ نەگىزگى تاقىرىبىنىڭ ءبىرى ەكىجاقتى ىنتىماقتاستىق ماسەلەلەرىمەن قاتار ۋكراينا داعدارىسى بولعانىن ەسكە سالدى. قازاقستان پرەزيدەنتى فرانتسۋز كوشباسشىسىنىڭ ساپارى الدىندا ۋكرايناداعى قاقتىعىس ءورشي تۇسكەنىن،  بىراق بۇل كەزدە ونى رەتتەۋ ءۇشىن ناقتى ديپلوماتيالىق قادامدار جاسالماعانىن ايتتى.

نۇرسۇلتان نازارباەۆ مينسكىدە وتكەن بىرلەسكەن كەزدەسۋدى ۇيىمداستىرۋ مۇمكىندىگىن تالقىلاۋ ءۇشىن كەزەگىمەن گەرمانيا، ۋكراينا جانە رەسەي كوشباسشىلارىمەن كەزدەستى.

قازاقستان پرەزيدەنتى تۇيتكىلدىڭ ءتۇيىنى بۇگىنگى تاڭدا ءالى شەشىلمەگەنىن، بىراق «مينسك-2» كەلىسىمىندە رەسەي مەن ۋكراينا تاراپىنىڭ بارلىق ءىس-قيمىلدارى ايقىن جازىلعانىن ايتتى.

نۇرسۇلتان نازارباەۆ سونداي-اق رەسەيگە قاتىستى سانكتسيالار ايتارلىقتاي ناتيجە بەرمەگەنىن اتاپ ءوتتى.

- بۇل سانكتسيالاردان ۋكراينا داعدارىسىنا ەش قاتىسى جوق ادامدار – رەسەيلىك شاعىن جانە ورتا بيزنەس وكىلدەرى، فرانتسۋز فەرمەرلەرى جاپا شەگۋدە. ساياساتتى ەكونوميكادان بولەكتەگەن ءجون. فرانتسيا قاقتىعىس اۋماعىنداعى شيەلەنىستىڭ ۋشىعۋىنا جول بەرمەۋ جانە سانكتسيالار قاتايماۋى ءۇشىن ءبارىن جاساۋعا ءتيىس. وسى داعدارىستى شەشۋ ءۇشىن ديپلوماتيالىق قادامداردى جالعاستىرۋ قاجەت، – دەدى قازاقستان پرەزيدەنتى.

سيرياداعى احۋالعا قاتىستى مەملەكەت باسشىسى بوسقىندارعا بايلانىستى بۇگىنگى داعدارىس وسى ەلدىڭ ىسىنە وزگە مەملەكەتتەردىڭ بارلىق حالىقارالىق ۋاعدالاستىقتارعا قايشى كەلە وتىرىپ، ورىنسىز ارالاسۋىنان تۋىنداعانىن اتاپ ايتتى. نۇرسۇلتان نازارباەۆ وسىنداي ارەكەتتەردى دوعارۋ بۇل ماسەلەلەردى شەشۋگە مۇمكىندىك بەرەدى دەگەن پىكىر ءبىلدىردى.

بۇل رەتتە ەلباسى استانا ءبىزدىڭ وڭىردە ديپلوماتيالىق حاب بولۋ ءۇشىن بارلىق مۇمكىندىككە يە بولىپ وتىرعانىنا نازار اۋداردى. مىسالى، قازاقستان ازياداعى ءوزارا ءىس-قيمىل جانە سەنىم شارالارى كەڭەسىن شاقىرۋعا باستاماشى بولدى، ول قىتاي، ءۇندىستان جانە پاكىستاندى قوسقاندا، ازيانىڭ 30 ەلىن بىرىكتىرەدى. سونداي-اق قازاقستاننىڭ ەلورداسىندا ەلىمىز باستاماشىلىق ەتكەن  الەمدىك جانە ءداستۇرلى دىندەر ليدەرلەرىنىڭ سەزى تۇراقتى وتەدى. مۇندا ەقىۇ جانە يىۇ سامميتتەرى دە ۇيىمداستىرىلدى.

- ءيا، ءبىز وسى باتىس پەن شىعىستىڭ اراسىنداعى شەكارادا، مازاسىز وڭىردە ديپلوماتيالىق حابقا اينالعىمىز كەلەدى، – دەدى مەملەكەت باسشىسى. 

Abai.kz