الماتى وبلىسىنىڭ ەكس-اكىمى شالباي قۇلماحانوۆتى بىلمەيتىن جان جوق. سول شالبايدىڭ ءىنىسى شايباي قۇلماحانوۆ الماتىنىڭ ىرگەسىندەگى ۇلكەن الماتى سەلولىق وكرۋگىنىڭ قاراپايىم تۇرعىنىنا شاپقىنشىلىق جاساپ، جەرىن تارتىپ الماقشى ەكەن. بۇل تۋرالى رەداكتسيامىزعا ارنايى كەلگەن گۇزەل ساعىنتاەۆا اتتى شيىتتەي ەكى بالاسى بار جاس انا ايتىپ بەردى. ول قۇلماحاناوۆتاردان كورگەن قورلىعىن جىپكە ءتىزىپ، ادىلەتتىلىك ءۇشىن كۇرەسەتىنىن جەتكىزدى.

گۇزەل ساعىنتاەۆا 2002 جىلى الماتى وبلىسى، قاراساي اۋدانىنا قاراستى ۇلكەن الماتى سەلولىق وكرۋگىنەن 15 سوتىق جەر تەلىمىن ساتىپ الىپ، ونى اپكەسى مەيرامگۇل يسماعانبەتوۆانىڭ اتىنا جازدىرىپ قويادى. سول 2002 جىلدان بەرى اتالعان جەردىڭ سالىعىن تولەپ، بۇكىل قۇجاتتارىن زاڭداستىرىپ، يەلەنىپ جۇرەدى.  2014 جىلى ۇلكەن الماتى سەلولىق وكرۋگىنىڭ جەرى الماتى قالاسىنىڭ اۋماعىنا كىرگەن سوڭ، گۇزەل قۇجاتتارىن تۋرالاماق بولىپ، بوستاندىق اۋداندىق جەر بولىمىنە بارادى. سويتسە، جەر بولىمىندەگىلەر بۇل جەردىڭ يەسى ەۆگەني قۇلماحانوۆا (شايباي قۇلماحانوۆتىڭ ايەلى) ەكەنىن ايتادى.

گۇزەل ساعىنتاەۆا، جابىرلەنۋشى انا:

– مەن جەر تەلىمىمنىڭ باسقا يەسى بار ەكەنىن 2014 جىلى بوستاندىق اۋداندىق جەر ءبولىمى ارقىلى ءبىلدىم. سوسىن حالىققا قىزمەت كورسەتۋ ورتالىعىنا بارىپ، جەردىڭ كاداستر ءنومىرى ارقىلى تەكسەرتسەم، جەر مەنىڭ اتىمدا تۇر. ال، جەر ءبولىمى باسقاشا ايتادى. نە ىستەرىمدى بىلمەي، سوتقا بەرمەك بولدىم. ونىڭ اراسىنشا اتالعان جەردى قۇلماحانوۆتار ساتپاق بولىپ، krisha.kz سايتىنا جارناما بەرىپتى. ولارمەن تىلدەسۋگە قانشا جۇرەكسىنسەم دە، ساتىپ الاتىن ادام بولىپ، تەلەفون ارقىلى سويلەستىم. سويتسەم، بۇل جەردى (56 سوتىق، ونىڭ ىشىنە مەنىڭ دە جەر تەلىمىم كىرىپ كەتكەن) ولار سول كەزدەگى الماتى وبلىسىنىڭ  اكىمى شالباي قۇلماحانوۆتىڭ شەشىمىمەن العان كورىنەدى. بىراق، شالباي مىرزا، شايبايعا جەردى قانداي ماقساتتا، نە ءۇشىن بەرگەنىن تۇسىنە المادىم.

گۇزەل ساعىنتاەۆانىڭ ايتۋىنشا، شالباي قۇلماحانوۆ بۇل جەردى 2003 جىلى ءىنىسى شايبايعا مەملەكەتتىك رەزەرۆتەن تەگىن الىپ بەرگەن. نە سەبەپتى؟ مەملەكەتتىك رەزەرۆتەن 56 سوتىق جەردى الاتىنداي شايبايدىڭ قانداي ەڭبەگى بار؟  

گۇزەل ساعىنتاەۆا، جابىرلەنۋشى انا:

– مەن باستاپقىدا جەردى ساتىپ الاتىن ادام بولىپ، شايبايمەن كەزدەسىپ، ونىڭ قولىنداعى قۇجاتتاردىڭ كوشىرمەسىن الدىم. ولار وسى بىرەر جىلدىڭ ىشىندە اتالعان جەردى تۋىستار اراسىندا بىرنەشە رەت ساۋدالاپ، ءبىر-بىرىنە ساتىپتى. مەن قۇلماحانوۆتاردى سوتقا بەردىم. ءبىرىنشى سوتتا (30 ماۋسىم، بوستاندىق اۋدانىنىڭ اۋدانارالىق سوتىنىڭ شەشىمىمەن) ءبىز جەڭىلىپ قالدىق. وتكەن اپتادا بولعان ەكىنشى سوتقا جۋرناليستەردى شاقىردىق. سودان بولار، سوت ء«بىر جەردىڭ ەكى يەسى بولۋى مۇمكىن» دەپ شەشىم شىعارىپ بەردى. بۇل نە سوندا؟ قالايشا ءبىر جەردىڭ ەكى يەسى بولادى؟ تۇسىنە الماي وتىرمىن.

وسى ءبىر جىلعا جۋىق ۋاقىت ىشىندە قۇلماحانوۆتار گۇزەل ساعىنتاەۆاعا، ونىڭ جەرىندە جۇرگەن جۇمىسشىلارعا 4 مارتە قىسىم جاساعان. قورعانسىز كەلىنشەكتى قورقىتىپ ۇركىتۋگە دەيىن بارعان.

گۇزەل ساعىنتاەۆا، جابىرلەنۋشى انا:

– ءبىرىنشى جولى قورشاۋ سالىپ جاتقان جۇمىسشىلاردى كولىگىنە سالىپ الىپ، قالانىڭ شەتىنە شىعارىپ تاستادى. ەكىنشى جولى، تاعى ءبىر جۇمىسشىلاردى (قازاقستاندىق ازاماتتار بولا تۇرا) اۋىلدىق ىشكى ىستەر بولىمىنە اپارىپ، تەرگەتىپتى. ءۇشىنشى جولى، وسىنداي پروبلەمانىڭ ۇستىندە اعام كەلگەن ەكەن، سونىڭ كوزىنشە جۇمىسشىلاردى قورقىتىپ، اڭشىنىڭ قارۋىمەن وق اتقان. ءتورتىنشى جولى، ء«ۇش-ءتورت تەرەكتى كەسىپ تاستادىڭ» دەپ ءاىىب شاعىم ءتۇسىرىپ، تابانىمنان توزدىردى.

ءتۇيىن

شيىتتەي ەكى بالاسى بار، جاس كەلىنشەكتىڭ جانايقايى كىمدى بولسىن تولعاندىرارى حاق. شالبايلار مەن شايبايلاردىڭ ايى وڭىنان تۋىپ تۇرعان زاماندا، انانىڭ كوز جاسى تۇككە تۇرمايتىنىن بىلەمىز. سوندا دا شالبايلاردىڭ شاپقىنشىلىعىنا قارسى ءۇن قوستىق. ءسىز نە دەيسىز؟ 

ءشارىپحان قايسار

Abai.kz