(سۋرەتتە: ءدىلدا ماتايقىزىنىڭ جاس ۇرپاققا ارناپ جازعان وسيەت كىتابىنىڭ مۇقاباسى)

(سۋرەتتە: ءدىلدا ماتايقىزىنىڭ جاس ۇرپاققا ارناپ جازعان وسيەت كىتابىنىڭ مۇقاباسى)

„جەتىم كورسەڭ جەبەي ءجۇر، جاقسىلىعىڭ اللادان قايتادى„ دەيدى اتام قازاق. وسى ءبىر ءتالىمدى ءتامسىلدى ومىرلىك مۇراتىنا اينالدىرا العاندار ناعىز ىزگى جاندار سانالادى. ارينە، نارىقتىق زاماننىڭ زاڭى وسى ەكەن دەپ بايلار تيىن ساناپ، كەدەيلەر تەك قۇلقىن قامىمەن جۇرگەنىن دە بىلەمىز. دەگەنمەن، ارامىزدا جەتىم-جەسىرگە قامقورلىق كورسەتۋدەن ءبىر تانباي كەلە جاتقان ابزال جاندى ادامدار از ەمەس ەكەن.
كوپتىڭ قۇرمەتىنە بولەنگەن ەل اناسى ءدىلدا ماتايقىزى جاقىندا اتا-انانىڭ ايالى الاقانى مەن ۇستىندەگى باسپاناسىنان ايىرىلىپ، ورتالىق مەشىتتى ساعالاپ جۇرگەن الدى ون تورتتە، سوڭى مەكتەپكە ەندى عانا بارعان، ءارى كۇرت اۋرۋىمەن اۋىرىپ، ومىردەن كۇدەر ۇزە باستاعان ءۇش بالاعا اتىراۋ قالاسىنىڭ «الماگۇل» تۇرعىن اۋدانىنداعى ەندى عانا پايدالانۋعا بەرىلگەلى وتىرعان جاڭا ۇيدەن پاتەر الىپ بەرىپتى دەگەندە قۇلاعىمىزدىڭ ەلەڭ ەتكەنى بار.
- جاماعايىن، تۋىسىڭىز با ەدى؟- دەيمىز ءبىز.
- جوعا، - دەيدى ول كىسى. - بىردە مەشىتكە بارىپ وتىرسام وبلىستىڭ باس يمامى نۇرلىبەك ەسماعامبەت «اپاي، وسىندا ءۇي-كۇيى جوق ءۇش بالا ءجۇر، ءارى اۋىرادى، مۇمكىندىك بولسا، قامقورلىققا الساق قايتەدى؟» - دەگەنى بار. مەن سول بويدا الگى بالالارمەن تانىستىم. اتى-جوندەرى نۇرلان، ايدانا، نۇربول بايماشەۆتەر ەكەن. مىنە، سودان بەرى التى ايدان استام ۋاقىت ءوتتى. سەكسەنگە كەلگەن جاسىمدا ءبىراز ەسىكتى قاقتىم. اقىرى ەكى بولمەلى پاتەر الىپ بەردىم.
ءبىز ەكىنشى قاباتتاعى ەسىكتى قاعىپ ەدىك، ىشتەن ايدانا قارىنداسىمىزدىڭ ءوزى كورىنىپ، قۇشاق جايا قارسى الدى. سىڭعىرلاعان جاڭا پاتەر. ەدەندەرىنە كىلەم توسەلىپ، توردە تەلەديدار ورىن تەپكەن. ادەمى ديۆان، اعاش كەرۋەتتەر مەن جايىلعان ءۇر جاڭا توسەك كورپەلەر. اس ۇيدە جيھاز بەن توڭازىتقىش، ىدىس-اياق، گاز پليتاسى، ءتىپتى شاڭسورعىش، ءبارى دە ينە-جىپتەن جاڭا شىققان كۇيىندە.
- وسىنىڭ ءبارىن دەمەۋشىلەر («گولدەن يگل») ارقىلى جۇزەگە اسىردىق. تاياۋ ارادا ۇيگە تەلەفون تارتىلادى. بۇل تۋرالى باسشىلارىمەن كەلىسىلىپ قويىلدى. ەندىگى ماسەلە، وسى بالالاردىڭ ەمدەلۋىنە قول ۇشىن بەرسەم بە دەپ وتىرمىن، - دەدى ءدىلدا ماتايقىزى.
ءبىز بارعاندا بالانىڭ كىشىسى نۇربول مەكتەپتە ەكەن. ەڭ ۇلكەنى نۇرلان «مەن قازىر ليتسەيدە وقىپ جاتىرمىن. ايىنا ءاربىرىمىز از مولشەردە جاردەماقى الامىز. ءدىلدا اجەمىزدىڭ مىنا قامقورلىعى ءبىزدى ۇلكەن قۋانىشقا بولەدى. بۇل جاقسىلىقتى ەشۋاقىتتا ۇمىتپايمىز. جاۋابىمىز - ساباعىمىزدى جاقسى وقىپ، ءتارتىپتى بولۋ» - دەدى.
ال ءدىلدا اپامىز بولسا، بۇل سوزگە ءماز بولىپ «مەن نوۆوبوگات اۋرۋحاناسىندا ىستەگەنىمدە جەتىم-جەسىر، تاستاندى 21 بالانىڭ اتا-انالى بولۋى، كەلەشەكتە ۇلكەن ازامات اتانۋىنا قول ۇشىمدى بەرىپ ەدىم. ەندى، مىنە، تاعى دا ءۇش بالام بار. ولاردىڭ «اجە» دەپ قۇشاعىما قۇلاعانىنىڭ ءوزى مەن ءۇشىن ۇلكەن مەرەي»، - دەپ ءماز بولدى.
شىركىن-اي، وسىنداي جىلۋدى بارىمىزگە بەرسە عوي، «جەتىمدەر» دەگەن اتاۋدان دا الدەقاشان قۇتىلار ەدىك-اۋ!

اباي-اقپارات