قازاقستان تۇرمەلەرىندە ەكسترەميزم، تەرروريزم قىلمىستارى بويىنشا ايىپتالعان 400-گە جۋىق قىلمىسكەر جازاسىن وتەپ جاتىر. بۇل تۋرالى قازاقستان مۇسىلماندارى ءدىني باسقارماسىنىڭ جىل قورىتىندىسى بويىنشا جاساعان ەسەبىندە باياندالعان. 

ءدىني باسقارما ماۋسىم ايىنان باستاپ تۇزەۋ مەكەمەلەرىندە راديكالدى كوزقاراستاعى سوتتالۋشىلار اراسىندا ءتۇسىندىرۋ، الدىن الۋ جۇمىستارىن قولعا العان.

«قازىرگى تاڭدا ەلدەگى تۇزەۋ مەكەمەلەرىندە 400 ادام لاڭكەستىك، ەكسترەميستىك ارەكەتتەرى ءۇشىن جازاسىن وتەۋدە. ولاردىڭ 150 شاقتىسى راديكالدى باعىتتاعى پىكىرلەرىنەن اينىماعان» دەلىنەدى ءدىني باسقارما تاراتقان حابارلامادا.

وسى باعىتتا سوتتالعاندارعا ءتۇسىندىرۋ جۇمىستارىن جۇرگىزەتىن يمامدار كەڭەسى قۇرىلىپ، ولار 723 سوتتالعان ازاماتپەن جەكە جۇمىس ىستەگەن. يمامدار سونداي-اق، 6000-نان استام سوتتالۋشى قاتىسقان كەزدەسۋلەر وتكىزىپ، ءداستۇرلى ءدىنىمىزدىڭ نەگىزگى قۇندىلىقتارىن ناسيحاتتاعان.

سونىمەن قاتار، ءدىني باسقارما تاراتقان حابارلامادا بيىل راديكالدىق باعىت ۇستانعان 802 ازاماتتىڭ ءداستۇرلى يسلامعا ورالعانى تۋرالى ايتىلادى.

قوش. بۇل ءدىني باسقارمانىڭ رەسمي مالىمدەمەسى عانا. ولار 6000-نان استام سوتتالۋشىنى جيناپ الىپ، ۋاعىز جۇرگىزگەنىمەن جات اعىمنىڭ شىرماۋىنا تۇسكەن ازاماتتار ايىعىپ، ءداستۇرلى يسلام دىنىنە ورالادى دەۋ اعاتتىق. كەرىسىنشە، ەكسترەميزم، تەرروريزم قىلمىستارى بويىنشا ايىپتالعان 400-گە جۋىق قىلمىسكەر وزگە دە جازاسىن وتەۋشىلەردىڭ تانىم-تۇسىنىگىن وزگەرتىپ جاتقان جوق پا؟ ولاردىڭ ۋاعىزىمەن ۋلانعان قىلمىسكەرلەر بوستاندىققا شىققان سوڭ، قوعامعا قاۋىپ توندىرمەي مە؟

تۇرمەگە ءجونى ءتۇزۋ ادام تۇسە بەرمەيدى. ونداعىلاردىڭ دەنى قىلمىس جاساپ، سونىڭ جازاسىن وتەپ جاتقاندار. مۇنداي ادامدار ار الدىندا اقتالۋ ءۇشىن نامازعا جىعىلىپ، اللانى تانۋعا قۇلشىناتىنى بار. ولار نەنىڭ اق، نەنىڭ قارا ەكەنىن ايىرىپ بولمايدى. وسىنى ەكسترەميست، تەرروريست سوتتالۋشىلار ءتيىمدى پايدالانىپ، ءوز مۇددەلەستەرىنىڭ سانىن ارتتىرىپ جاتۋى ابدەن مۇمكىن. سوندىقتان دا اباقتىداعى ەكسترەميستتەردىڭ ءوزىن باقىلاۋدا ۇستاۋ كەرەك. ءسىز نە دەيسىز؟

ءشارىپحان قايسار

Abai.kz