وقۋشىنىڭ قيعاش جول داپتەرى بەتىنە سالىنعان بۇل سۋرەت «فەيسبۋك» جەلىسىنەن الىندى. سۋرەتتىڭ استىنا پاراقشا يەسى ايدوس جۇقانۇلى: ء«ۇشىنشى سىنىپتاعى كىشكەنتايىم ءتوميريستىڭ سالعانى. مەن ءۇشىن بۇدان اسقان ماراپات جوق» دەپ جازىلعان ەكەن.

بۇل ءتوميريستىڭ تانىمىنداعى تاۋەلسىزدىكتىڭ تۇيسىگى. كۇنى – كۇنباعىس، قىرانى – تورعاي سياقتى بولىپ كەتسە دە، توميريس تاۋەلسىزدىكتىڭ قۇدىرەتىن الا-كەۋىم ساناسىنا سىڭىرە بىلگەن دەرسىڭ. ەڭ باستىسى – ول ءبۇلدىرشىن جۇرەگىنە سىيدىرعان «تاۋەلسىزدىك» دەگەن ءسوزدى جانە ونىڭ قادىرىن بۇكىل ومىرىنە ورنەك ەتەرىنە سەنىم زور.

ال وسى سۋرەتتىڭ استىنداعى كوممەنتاريدە سامات ناسير ەسىمدى «فەيسبۋك» قولدانۋشى: «قازاعىمنىڭ ەلى قازاقشا سويلەيتىن، جەرى ءوز قاراماعىندا، قازاق ءۇشىن قىزمەت ەتەتىن ەل بولcىن. كەزىندە وداقتى ءبارى تاستاپ قاشقاندا، توتاليتاريزمنەن ءتاڭىردىڭ ارقاسىندا قۇتىلعان قازاق ەندى ءوز كۇشىمەن اۆتوريتاريزمنەن دە قۇتىلار. ءسوز بوستاندىعى، پىكىر الۋاندىعى، ادام قۇقى، دەموكراتيا، ساياسي كوزقاراس ەركىندىگى دارىپتەلەتىن قىسىم-قىسپاقسىز قوعامعا قازاق تا لايىق... سيمۆولدىق تاۋەلسىزدىك كۇنىن ەمەس، ناعىز تولىققاندى تاۋەلسىزدىكتى تويلاۋعا جازسىن» دەپ جازىپتى.

قوس قولداپ داۋىس بەرەتىن پىكىر. «تولىققاندى تاۋەلسىزدىكتى تويلاۋ» – كوپتىڭ كوكەيىندە كومىلۋگە شاق قالعان ارمان. سول ارماننىڭ قاجەتتىلىگىن جۇتىم اۋاداي سەزىنگەن قازاق قالعۋدى قويار كۇن قاشان تۋار ەكەن دەپ، تاعى دا ارماندايسىڭ...

ايدوستىڭ «مەن ءۇشىن بۇدان اسقان ماراپات جوق» دەۋى نۇرسۇلتان نازارباەۆتىڭ سەيسەنبى كۇنى استانادا ۋىس-ۋىس وردەن-مەدال تاراتۋ تويىمەن قاتار كەلدى. شۇلەن ىلگەندەرىنىڭ اراسىندا كىم الدا جوسىلعان، كىم جولدان قوسىلعان – ونى، ءسىرا، ماراپاتقا مۇددەلى قازاق قاپەرگە الماعان سىڭايلى. ايتپەسە اكىمدەر مەن مينيسترلەر «قۇلاعىنان سۇيرەپ اكەلگەندەر» ماراپاتتىڭ بۋىنا ماس تا – ماس، باسقا دا – ماس توي ۇستىندە تەڭسەلىپ جۇرگەنىن كوردىك...

بىراق داتكە قۋاتى – ءبىر ءسوزى بولدى: «تاۋەلسىزدىك ەشقاشان ەشتەڭەگە ايىرباستالمايدى»، – دەدى. كوبىكتەي كوپىرگەن كوپ ءسوزىنىڭ ءبىرى بولماسا، بۇل جولعىسى ءجوندى ەستىلدى. تەك ەندىگى جەردە وسى ءسوزىن پۋتين پاتشاعا تىرەپ قويىپ ايتار بولسا، مەن جاقتاعىلاردىڭ جارتىسى ارى اۋىپ كەتكەنىنە وكىنبەس ەدىم.

ال ازىرگە «ايتقانىڭنان قايتپا» دەپ، تومپيعان ءتوميريستىڭ داپتەرگە سالىنعان سۋرەتىن گازەت بەتىنە باسا وتىرىپ: «تاۋەلسىزدىگىمىز ۇزاعىنان بولسىن!» – دەيمىز. بۇگىنگى قىمباتشىلىققا قامالعان قازاق وسى تىلەكتىڭ باياندىلىعىنا بولا، داعدارىستى دا دالباسا كورەرى حاق-اۋ، شىركىن!

ەرمۇرات باپي

«وبششەستۆەننايا پوزيتسيا» پروەكت «DAT» №44 (315) وت 17 دەكابريا 2015 گ.