1998 جىل. ماسكەۋ مەتروسىندا، زىرلاپ بارا جاتقان پويىز ىشىندە ءبىر قارتتىڭ جۇرەگى توقتاپ قالدى. جەتپىس ءبىر جاستاعى شالدىڭ باسىنان باعى تايعان ەمەس ەدى. بىراق ابىر-سابىر قالىڭ ءنوپىر ونى تانىمادى. جەدەل جاردەم قىزمەتكەرلەرى بەيباقتىڭ مۇردەسىن مايىتحاناعا جەتكىزدى. ونى ىزدەگەن ەشكىم بولمادى. بەس كۇن ءوتتى. دارىگەرلەر بۇل كۇندە مۇردەنى سويىپ، نەدەن ولگەنىن انىقتاپ قويعان. كەلەسى كەزەكتە "قاڭعىباس" دەپ تانىلعان ءمايىت مەدينستيتۋت ستۋدەنتتەرىنىڭ "ەرمەگىنە" اينالدى. سويىپ، تۇرلى تاجىريبەلەر جاسالدى. شالدى "قاڭعىباس" رەتىندە تىركەپ، ارتىندا سۇراۋى جوق مارقۇمداردىڭ مولاسىنا جەرلەمەك بولعان ەدى. سوڭعى ساپار الدىندا ميليتسيا قىزمەتكەرىنىڭ ءبىرى الگى مايىتكە ءبىر قاراپ، قازاقستان كومپارتياسىنىڭ بۇرىنعى ءبىرىنشى حاتشىسىن تاني قويدى. گەننادي كولبيننىڭ ءمايىتى تۋىستارىنا وسىلاي تاپسىرىلدى. جەرلەۋ راسىمىنە جاقىن-جۇراعاتتارىنان باسقا ەشكىم قاتىسپادى. نە كرەمل، نە ۋليانوۆتان رەسمي تۇلعالار كەلمەدى. قازاقستان باسشىلىعى دا ارنايى ساپارتوپ جىبەرمەدى...

گەننادي كولبين ۋليانوۆ وبكومىنان قازاقستانعا كەلگەندە تولەباەۆ كوشەسىندەگى پاتەرىن 33 مىڭ رۋبلگە كۇردەلى جوندەۋدەن وتكىزدى. ال ول كەزدە ءۇش بولمەلى پاتەردىڭ قۇنى 10 مىڭ رۋبل بولاتىن. ال ءۇش قىزى مەن زاتتارىن ترانسپورتتىق ۇشاقپەن جەتكىزۋگە قازاقستان بيۋدجەتىنەن 27 مىڭ 700 رۋبل جۇمسالدى. بۇل دا تۇك ەمەس. ەكى ءيتى مەن ايەلىن ارنايى ۇشاقپەن 7 مىڭ 700 رۋبلعا اكەلدى. 

كولبين قوناەۆتىڭ جۇمىس كابينەتىنە العاش رەت كىرگەندە - ورتادا تۇرعان ۇلكەن گلوبۋسقا قاتتى تاڭ قالدى. "مۇنشاما گلوبۋس قوناەۆقا نە ءۇشىن قاجەت ەدى؟!" دەپ جيىن سايىن ايتۋمەن بولدى. ال قازاقستان رەسپۋبليكاسىنىڭ ۋليانوۆ وبلىسىن وتىز ورايتىن، الەمدە جەر كولەمى بويىنشا 9-ورىندا تۇرعانى قاپەرىنە دە كىرمەدى.

شىمكەنتكە ءبىر بارعان ساپارىندا "قازاق ەتتى جاقسى كورەتىن حالىق ەكەن. ەندى مالدىڭ ىشەك-قارنىن تازالاپ، باسىن كەسىپ الىپ، ساتىلىمعا تەرىسىمەن شىعارامىز" دەپ ءبوستى. "نەگە؟" دەگەن سۇراققا: "سوندا ءار قويدىڭ تەرىسى 1,5-2 كەلى، ال سيىردىڭ تەرىسى 15-20 كەلىدەن تارتادى. بۇل قوسىمشا سالماق. ءسوندى ءبىز قازاقستاندا قوسىمشا 8 مىڭ توننا ەتتىڭ ماسەلەسىن شەشەمىز. بۇل نارسەنىڭ رەسپۋبليكامىزعا پايداسى قانشا ەكەنىن بىلەسىزدەر مە؟!" دەدى. كەيبىر اقىلدى كىسىلەر تەرىنىڭ شيكىزات ەكەنىن، ونى وڭدەپ، حالىق تۇتىناتىن باسقا دا زاتتار جاسالاتىنىن ايتىپ تۇسىندىرمەگەندە - ەلىمىزدە تەرىسى سىپىرىلماعان ەتتىڭ ساتىلۋى دا مۇمكىن ەدى. كولبين رەسپۋبليكانى ەتپەن قامتاماسىز ەتۋ ماسەلەسىنە قاتتى باس قاتىردى. بۇرىنعى ماو تسزە دۋن سەكىلدى جىل قۇستارىن جاپپاي اتىپ الۋ تۋرالى دا باستاما كوتەردى. بىراق باقىتىمىزعا وراي ول كۇنگە جەتكەن جوقپىز... 

قازاق ەشكىمگە يت ءولىم تىلەمەيدى. ابىرويسىز ءولىمدى دە اقتاپ الۋعا تىرىسادى. ءتىپتى، بولمادى دەگەندە ول تۋرالى جاق اشپايدى. ساۋساعىن شۇقشيتىپ، بەتىنە باسپايدى. بىراق كولبيننىڭ يت ءولىمى - ماعان جازىقسىز جاپا شەككەن جاستاردىڭ لاعىنەتى سەكىلدى.

توقتار جاقاش

Facebook-تەگى پاراقشاسىنان

ءتۇپ-نۇسقاداعى تاقىرىپ: "يت ءولىم"