ء(ابىش اعاممەن باقۇلداسۋ)

جۇرەگىمىز جىلاپ، جانىمىزدى جۇباتاتىن ءسوز تاباي الماي ءسىزدى دە كوزىمىز قيماي قارا جەردىڭ سۋىق قوينىنا تاپسىردىق ءابىش، اعا! كەشەدەن بەرى ءوزىڭىزدى جوقتاپ ازا تۇتقان حالقىڭىز ءسىزدى نارعا دا، تولاعايعا دا، تاۋعا دا، اۋليەگە دە تەڭەپ ماحابباتىن ءبىلدىرىپ جاتىر. باسقا جۇرت ءسىزدى كىمگە تەڭەسە دە ءوز ەركى، بىراق مەن ءۇشىن ءسىز ەڭ الدىمەن - وسى ءسوزدىڭ ۇلى ماعىناسىنداعى ادام ەدىڭىز. سىزبەن سويلەسكەنىمدە ادام جانىنان جارقىراعان ۇلى ساۋلەنىڭ مەيىرىمىنە جىلىنعانداي كوڭىلىم ەلجىرەپ سالا بەرەتىن. پەندەلىك تىرلىكتەن جالىققانىمدا ادامدىق پاراساتتى اڭساپ، ءسىزدى ىزدەۋشى ەدىم، ءابىش اعا.
جازعان شىعارمالارىڭىزدا ادامعا ءتان ماحاببات، ادامعا ءتان تازالىق، ادامعا ءتان ۇلىلىق، ادامعا ءتان تەرەڭدىك، ادامعا ءتان بيىكتىك، ادامعا ءتان پاراسات مول بولدى. قۇداي جاراتقان بولمىسىڭىزدا ادامعا ءتان وسالدىق بولعان شىعار، بىراق، پەندەگە ءتان وسالدىق بولعان ەمەس. ءومىردىڭ مۇز-ايدىنىندا تايعاناپ كەتكەن كەزىڭىزدە تالاي دۇشپاندارىڭىز سىرتىڭىزدان نەشە ءتۇرلى ءسوزدى قارشا بوراتقاندا دا ءسىز ولارعا قارسى ءبىر اۋىز ءسوز ايتپادىڭىز. ويتكەنى، ءسىز ەش ۋاقىتتا دا مىنا بىزدەر سياقتى، ادامداردى جاقسىعا نەمەسە جامانعا بولگەن جوقسىز.. دۇشپان دەيمىن-اۋ!. ءسىزدى ءوزىنىڭ دۇشپانى ساناعاندار بولعان شىعار، بىراق ءسىز ەشكىمدى دە دۇشپان ساناعان جوقسىز، وزىڭىزگە. 
بۇگىن جەلتوقساننىڭ قاق ورتاسى بولعانىنا قاراماستان كۇن ەرەكشە شۋاعىن شاشىپ، سارىرقانىڭ دالاسىن جىلىتىپ جىبەردى. استاناعا كەلگەنىمە التى جىلدان اسقان مەن، قىستىڭ ورتاسىندا بۇل قالادان تۇڭعىش رەت تاپ وسىنداي قۇبىلىستى بايقاپ تۇرمىن. بالكىم، بۇل ءسىزدىڭ اسپانعا ۇشىپ بارا جاتقان جانىڭىزدان تاراعان جىلىلىقتىڭ سوڭعى قىزۋى شىعار. 
قوش بول، ابىز اعا! ەندى ءسىزدىڭ عۇمىرى ماڭگىلىك ەكىنشى ءومىرىڭىز باستالدى. جەلتوقساننىڭ قارا سۋىعىندا توڭعان كەزىمدە ءوزىڭىزدى ەسكە الىپ، سوناۋ كوزىڭدى تالدىراتىن بيىكتەگى اسپانعا قاراپ، پاراسات ساۋلەسىن ىزدەپ، ءالى تالاي ساعىناتىن بولامىن اسىل بەينەڭىزدى.

امانگەلدى كەڭشىلىكۇلى

Facebook-تەگى پاراقشاسىنان