جەلتوقساننىڭ توعىزى كۇنى «وسكەمەن» شەكارا وتريادىنىڭ «اقساقال» شەكارا زاستاۆاسىنىڭ اۋماعىندا، «بايتانات اۆتو» شەكارالىق باقىلاۋ پۋنكىتىنەن سولتۇستىككە قاراي 5 شاقىرىمدىق قاشىقتىقتا شەكارا ناريادى رەسەيگە قاراي كىرىپ، قايتا شىققان سالتاتتىنىڭ ءىزىن تاپقان. ءىز يەسىنىڭ قاي جەرگە دەيىن بارىپ-قايتقاندىعىن انىقتاۋ ماقساتىندا كەشە رەسەيلىك ارىپتەستەرگە حابار جىبەرىلگەن بولاتىن دەپ حابارلايدى  قر ۇقك شق ءباسپاسوز قىزمەتى.

قازاقستاندىق شەكاراشىلار وسى ءىز ارقىلى 40 جاستاعى ەربول ەسىمدى بايتانات اۋىلىنىڭ تۇرعىنىن ۇستاپ، سۇراققا الا باستاعان كەزدە، رەسەيدىڭ فەدەرالدىق قاۋىپسىزدىك كوميتەتىنە قاراستى فەدەرالدىق شەكارا قىزمەتىنىڭ بارناۋل اۋماعى بويىنشا كەزەكشىسىنەن جاۋاپ تا كەلىپ ءتۇستى. ولار قازاقستاندىق شەكاراشىلاردىڭ بەرگەن اقپاراتى بويىنشا كىرگەن ءىزدى قۋالاي وتىرىپ رەسەي اۋماعىنداعى كرۋگلوە ەلدى مەكەنىندەگى ءبىر ءۇيدىڭ قاقپاسىنا تىرەلىپ، سول ۇيدەن 56 جاستاعى الەكساندر ەسىمدى رەسەيلىكتى جانە 42 جاستاعى سەرگەي ەسىمدى قازاقستاندىقتى ۇستاعان. ولاردان جالپى سالماعى 100 كگ-نىڭ و-جاق، بۇ-جاعىندا بولاتىن ەكى قاپ كەپتىرىلگەن «ماريحۋانا» ەسىرتكىسىن تاركىلەگەن.

بۇل الىنعان اقپاراتتان كەيىن، ءبىزدىڭ ەلدىڭ اۋماعىندا ۇستالعان ەربول بۇدان ءارى قاسارىسۋدان پايدا جوق ەكەندىگىن ءتۇسىنىپ، ەسىرتكىنى رەسەيدە ۇستالعان ادامدارعا ءوزى اپارىپ بەرىپ كەلگەندىگىن مويىندادى. تەرگەۋ امالدارى ءارى قاراي جالعاسۋدا.

اباي-اقپارات