بەلگىلى اقىن، قوعام قايراتكەرى اۋىت مۇقيبەك مەملەكەت باسشىسى نۇرسۇلتان ءابىشۇلىنىڭ شەتەلدەگى قانداستاردى ەلگە قايتارۋ تۋرالى «كوشى-قون» ساياساتىن ورىنداۋعا سالعىرت قارايتىن قر پرەمەر-ءمينيسترى كارىم ءماسىموۆى سوتقا بەرەتىنىن ايتتى. اقىن بۇل تۋرالى «فەيسبۋك» جەلىسىندەگى جەكە پاراقشاسىندا مالىمدەگەن.

قازىرگى تاڭدا  تۇراقتى تىركەۋگە تۇرۋ ءۇشىن ىشكى ىستەر مينيسترلىگى كوشى-قون پوليتسياسى تالاپ ەتەتىن سوتتىلىق تۋرالى «انىقتاما» قىتايدان كەلگەن قانداستارىمىزعا كەدەرگى بولىپ وتىرعاندىعى تۋرالى جازعان ەدىك.

جاقىندا «31» ارنا جاڭالىقتارى الماتىداعى ءبىر توپ ەتينيكالىق قازاق قۇجات راسىمدەۋدىڭ قيىندىعىن ايتىپ، ازاماتتىق الۋدىڭ ازاپتى جولىنان قاجىعاندىقتارىن جەتكىزگەنىن حابارلادى.

قىتاي تاراپىنان مۇلدە بەرىلمەيتىن انىقتامانى تالاپ ەتەتىن رەسمي ورىندار كوشىپ كەلەتىن قانداستاردىڭ جولىن بوگەپ تۇر دەيدى. ءتىپتى، قۇجات ماسەلەسى رەتتەلمەي قازاقستانعا كەلگەندەردىڭ ءبىرازى قىتايعا قايتا كوشىپ كەتىپتى. ال كارىم ءماسىموۆ تىزگىنىن ۇستاپ وتىرعان قازاقستان ۇكىمەتى ازاماتتىق الۋ جايىن ءالى دە بىرجاقتى رەتتەۋگە اسىعار ەمەس.

اۋىت مۇقيبەك، قوعام قايراتكەرى، اقىن:

- نەگىزى، بۇل كەدەرگىنى قۇقىقتىق - نورماتيۆتىك كۇجاتتار ارقىلى قىتايدان كەلگەن قانداستارىمىزدان تالاپ ەتىلمەيتىندەي ەتىپ رەتتەۋگە ابدەن بولادى.

قازاقستان رەسپۋبليكاسى ىشكى ىستەر ءمينيسترىنىڭ 2015 جىلعى 4 جەلتوقسانداعى №992 بۇيرىعىمەن بەكىتىلگەن «شەتەلدىكتەرگە جانە ازاماتتىعى جوق ادامدارعا قازاقستان رەسپۋبليكاسىندا ۋاقىتشا جانە تۇراقتى تۇرۋعا رۇقساتتار بەرۋ قاعيدالارىنىڭ» 10 تارماعىنىڭ 7) تارماقشاسىنا (بوسقىندار دەپ تانىلعان نەمەسە قازاقستان رەسپۋبليكاسىندا پانا ۇسىنىلعان شەتەلدىكتەر مەن ازاماتتىعى جوق ادامداردى جانە ەگەر حالىقارالىق شارتتا وزگەشە كوزدەلمەسە، قىتاي حالىق رەسپۋبليكاسىنان كەلەتىن ەتنيكالىق قازاقتاردى قوسپاعاندا);  دەگەن ەسكەرتۋدى قوسا سالسا جەتىپ جاتىر.

بۇل انىقتامانى قىتايدان كەلەتىن ەتنيكالىق قازاقتاردان تالاپ ەتۋدىڭ قاجەتى جوق!

ويتكەنى، استاناداعى قىتاي ەلشىلىگىنىڭ قر سىرتقى ىستەر مينيسترلىگىنىڭ كونسۋلدىق دەپارتامەنتىنە وسى «سوتتىلىق» ماسەلەسىنە وراي بەرگەن جاۋابىندا  «پاسپورتتاردى بەرۋ تۋرالى» 2006 جىلعى 29 ساۋىردەگى قحر زاڭىنا سايكەس بۇل ساناتتاعى قىتاي ازاماتتارىنا ۇلتتىق پاسپورتتار راسىمدەلمەيدى (اقپارات قوسا تىركەلگەن) ء(سىزدىڭ 25.09.2015 جىلعى 8-8-4-43/2758-ي حاتقا) دەلىنگەن!

ۇلت كوشباسشىسى نۇرسۇلتان نازارباەۆ جولعا قويعان ۇلت جوسپارى – «100 ناقتى قادام» باعدارلاماسىنىڭ II. بولىمىندە زاڭنىڭ ۇستەمدىگىن قامتاماسىز ەتۋ كوزدەلگەن.

سوعان بايلانىستى، وسى مامىر ايىنىڭ 16-كۇنىنەن باستاپ، ەكى اپتا ىشىندە ۇكىمەت بۇل ماسەلەنى جوعارىداعىداي ەتىپ رەتتەمەسە، پرەمەر-مينيستر كارىم ءماسىموۆتى سوتقا بەرەتىنىمدى مالىمدەيمىن! سول ءۇشىن، وسى ماسەلەگە مۇددەلى جانە جانكۇيەر قانداستارىمىزدىڭ ماعان حابارلاسۋىن وتىنەمىن.

نۇرزات توعجان

Abai.kz