ەلىمىزدە تاتۋ-ءتاتتى ءام تەرەزەسى تەڭ ءومىر ءسۇرىپ جاتقان قازاق ۇلتى مەن وزگە دە ۇلت وكىلدەرىنىڭ اراسىنا وت تاستاعان «camonitor.kz» دەيتىن سايتتىڭ تاقىرىبى  تالقىعا ءتۇسىپ جاتىر (كەشە بۇل ماسەلەگە قاتىستى ساياساتتانۋشى ايدوس سارىم مەن راسۋل جۇمالىلار ءوز ويىن ايتقان بولاتىن). قازاقتىڭ رۋحى سەرگەك ازاماتتارىن «شوۆينيستەر» دەپ اتاعان، سول «شوۆينيستەردىڭ» ۇياسى – Abai.kz اقپاراتتىق پورتالى دەپ اتاعان سۇلتانعاليەۆكە بۇگىن بەلگىلى ساياساتكەر جاسارال قۋانىشالين جاۋاپ بەرىپ وتىر.

- سۇلتانبەك سۇلتانعاليەۆتى مەن ءار كەزدە كوزىم شالعان ونىڭ كەيبىر «ساياساتتانۋشىلىق» شيماي-شاتپاقتارىنان بىلەمىن. سودان بايقاعانىم – ونىڭ ۇلتتىق تامىرىنان اجىراپ قالعان دۇبارالىعى، ۇرداجىق تايىزدىعى، تۇرپايى توپاستىعى، جالپى العاندا – كلاسسيكالىق ۇلگىدەگى ماڭگۇرتتىگى.

وسىعان وراي ءبىر-ەكى رەت وعان ەشقانداي، بىلايىنشا ايتقاندا، «تسەرەمونياسىز»، ياعني – مايموڭكەسىز ءوز پىكىرىمدى ايتىپ، ورنىنا قويعان، ءۇنىن وشىرگەن كەزدەرىم دە بولعان. سول پىكىرىمدى قازىر ارحيۆىمنەن تاۋىپ الىپ، مىسال رەتىندە ودان وسى جەردە ءبىر ءۇزىندى كەلتىرە كەتسەم دە بولار ەدى، الايدا، ۋاقىتتىڭ تىعىزدىعى بۇعان مۇمكىندىك بەرمەي تۇر... سوندىقتان، البەتتە، ونىڭ Camonitor-داعى قازاق ۇلتشىلدارىنا قاتىستى ايتقان مىنا ساندىراقتارىنا دا مەن استە تاڭدانبايمىن.

ول بۇيتپەسە ماڭگۇرت بولار ما ەدى... دەمەك، ۇلتقا قارسى ساندىراقتارىنا وراي قانداي دالەلدى ءۋاج ايتساڭ دا، بۇزىلىپ قالعان پاتەفون تاباقشاسى ءتارىزدى ءوزىنىڭ «سۆوياسىن» سوعا بەرەتىن بۇگىنگى زاماننىڭ №1-ءشى ماڭگۇرتى الجاس ءاماروۆيچتى قالاي قابىلداساق، سونىڭ ءبىر سىڭارى – مۇنى دا ءدال سولاي قابىلداۋ كەرەك. ءسويتىپ، ونىڭ مۇنداي بىلگىشسىگەن سوزىنە اسا ءمان بەرمەي، اتى «قازاق»، زاتى ماڭگۇرت باسقا دا سورماڭدايلارعا قالاي قاراساق، بۇعان دا حالقىمىز، ۇلتىمىز ءۇشىن ەش پايداسى جوق قۋىس كەۋدە ءبىر جان رەتىندە اياۋشىلىقپەن مۇسىركەي قاراپ، «يت ۇرەدى، كەرۋەن كوشەدى» ءپرينتسيپىن ۇستانعان ءجون.

ال، وسىنداي پاقىرلارعا ارنايى ءسوز بەرىپ، ولاردى ۇلت مۇددەسى ءۇشىن كۇرەسىپ جۇرگەن ازاماتتاردى عايباتتاۋ ماقساتىندا پايدالانۋشىلار جونىندەگى ماسەلە، ارينە، ول – بولەك اڭگىمە تاقىرىبى...

جاسارال قۋانىشالين,

ساياساتتانۋشى

Abai.kz